UGENESISI 34 - IsiNdebele 2012 Translation

¹ UDina indodakazi kaJakopo ayibelethelwa nguLeya waphuma wayokubukela abantazana bendawo leyo.

² Kwathi lokha uTjhekemu umsa kaRhamori umRhivi omphathi wendawo nakambonako wamthatha wamgagadlhela, ngendlela leyo wamrhubutjha.

³ Ihliziywakhe yanamathela kuDina indodakazi kaJakopo, wamthanda wabe wamsomasoma.

⁴ UTjhekemu wathi kuyise uRhamori: “Ngibawa ungithathele umntazana lo abe mkami.”

⁵ Lokha uJakopo nakezwa bonyana uDina indodakazakhe usilaphaziwe, amadodanakhe gade asekweluseni nomhlambakhe. Yeke wazithulela abe abuya ekweluseni.

⁶ URhamori nabakhambisani bakhe baya kuJakopo bona bayokukhuluma naye.

⁷ Kusesenjalo amadodana kaJakopo abuya emrhuleni ngombana gade sele ezwile okwenzekileko. Amadoda lawo bekaqumbelene agcwele ipotjwana ngobuhlola obenziwe nguTjhekemu ngokulala nendodakazi kaJakopo, into engakameli ukwenziwa kwa-Israyeli!

⁸ URhamori wenza isiphakamiso wathi kiwo: “Ihliziyo yendodanami uTjhekemu iyancithika ngomntwanenu. Yeke ngizoyibawela umkhamanzi.

⁹ Thathelanani nathi, siphani amadodakazenu bese nithatha amadodakazethu.

¹⁰ Hlalani nathi. Inarha ibanzi phambi kwenu, hlalani ninzinze kiyo. Dlisani umhlambenu nanyana kukuphi, nizizuzele ipahla enarhenapha.”

¹¹ UTjhekemu wathi kuyise lakaDina nabafowabo: “Naningivumelako ngifumene umusa kini, ngizaninikela nanyana yini eniyibiza kimi.

¹² Ningangibiza nanyana lilobolo eliphezulu kangangani ngomakoti nesipho esikhulu, ngizanikhokhela lokho enikubizako kimi. Kwaphela nginikelani umntazana abe mkami.”

¹³ Ngebanga lokobana udadwabo uDina gade asilaphaziwe, amadodana kaJakopo aphendula ngobuqili nakakhuluma noTjhekemu noyise uRhamori.

¹⁴ Bathi kibo: “Asikwazi ukwenza into enjalo, akwazeki ukunikela udadwethu indoda engakasoki. Lokho kungaba lihlazo kithi.

¹⁵ Singavumelana nawe kwaphela nange nivuma ukufana nathi ngokusoka boke abaduna benu.

¹⁶ Nanenze njalo, sizaninikela amadodakazethu bese sithatha amadodakazenu. Sizakuhlala nani sibe munye.

¹⁷ Kodwana naningavumelani nathi nisoke, sizakuthatha umntazanethu, sifuduke.”

¹⁸ Isiphakamiso sabo sabonakala sisihle kuRhamori nendodanakhe uTjhekemu.

¹⁹ Isokana ebegade kungelihlonitjhwako ngakwabo azange lone isikhathi, lenza njengombana batjhwile ngombana gade lithathekile ngendodakazi kaJakopo.

²⁰ Yeke uRhamori nendodanakhe uTjhekemu baya esangweni ledorobho labo ukuyokhuluma namadoda womuzi, bathi kiwo:

²¹ “Abantwaba banobuntu nathi. Yeke bavumeleni bahlale enarhenapha badlisele khona ifuywabo. Qalani inarha ibanzi mahlangothi woke. Nje-ke asendiselaneni nabo.

²² Kodwana naku umbandela abavuma ngawo bona bahlale nathi sibe munye nabo: Akusokwe boke abaduna bethu njengombana nabo basokile.

²³ Ngithi sibulele ngombana imihlambabo, ipahlabo nayo yoke ifuywabo izakuba ngeyethu. Kwethu sekuvuma ukuze bahlale phakathi kwethwapha!”

²⁴ Woke amadoda agade anekghono lokulwa avumelana noRhamori nendodanakhe uTjhekemu. Yeke woke omduna wasokwa, okutjho boke abanekghono lokulwa.

²⁵ Elangeni lesithathu lokha basese seenhlungwini, amadodana amabili wakaJakopo, uSimiyoni noLevi, abanakwabo kaDina, bobabili bathatha iinsabula zabo bazingenela edorobheni ngaphandle kwesiliyo, babulala boke abaduna.

²⁶ Babulala uRhamori nendodanakhe uTjhekemu ngesabula bathatha uDina ngekumbeni kaTjhekemu bakhamba naye.

²⁷ Amanye amadodana kaJakopo aya lapha kuneendumbu khona, aphanga idorobho ngombana udadwabo wasilaphazelwa lapho.

²⁸ Athatha imihlambabo yezimvu neembuzi, iinkomo zabo nabodumbana babo nakho koke kwabo okungedorobheni nokungaphandle emmangweni.

²⁹ Athumba woke amakhobokabo, abantwababo nababafazi babo. Aphanga koke okungeenkumbeni.

³⁰ UJakopo wathi kuSimiyoni noLevi: “Ningibangele ihlekelele ngokungenza isizondo ebantwini balapha okumaKanana namaPerizi. Nginedlanzana labantu, yeke nange bangazihlanganisa balwe nami, mina nomzami sizokurhayilwa.”

³¹ Kodwana baphendula uyise bathi: “Bekumele aphathe udadwethu njengengwadla na?”