UGENESISI 32 - IsiNdebele 2012 Translation

UJakopo uzilungiselela ukuhlangana no-Esewu

¹ UJakopo wangena indlelakhe, khonapho iingelozi zakaZimu zahlangana naye.

² Kwathi lokha uJakopo nazibonako wathi: “Leli libutho lakaZimu!” Wathiya indawo leyo bonyana yiMarhanayimu.

³ UJakopo wathuma iinthunywa phambi kwakhe kumfowabo u-Esewu enarheni yeSeyiri kwa-Edomu.

⁴ Wathi kizo: “Tjelani ikosami u-Esewu bonyana incekwayo uJakopo ithi, ‘Bengiseze ngikhonze kwaLabani bekube gadesi.

⁵ Ngineenkomo nabodumbana, izimvu neembuzi, amakhoboka namakhobokakazi. Nje-ke ngithi angithumele umlayezo lo ekosinami kobanyana ngifumane umusa emehlwenayo.’ ”

⁶ Iinthunywa zabuyela kuJakopo zathi: “Sifikile kwamfowenu u-Esewu, nje-ke usendleleni uzokuhlangabeza, ukhamba namakhulu amane wamadoda.”

⁷ UJakopo wethukwa khulu bewakhathazeka ngalokho. Wahlukanisa abantu akhamba nabo, imihlambi yezimvu neembuzi, yeenkomo neyamakamela ngeenqhema ezimbili.

⁸ Wadlumbana wathi: “Kuzakuthi u-Esewu nakasahlela isiqhema esinye nokho kube nesinye esiphunyurhako.”

⁹ Yeke uJakopo wathandaza wathi: “Maye Zimu kabamkhulu u-Abrahamu, Zimu kababa u-Isaka! Somnini wena owathi kimi angibuyele enarhenekhethu neenhlotjeni zami begodu wathi uzangiphumelelisa,

¹⁰ ngimncani khulu bonyana ungabeze ube nomusa ongaka bewutjengise nokwethembeka okungaka kimi mina ncekwakho. Iye, benginedondolo kwaphela lokha nangiyama iJordani le, kodwana gadesi sele ngiziinqhema ezimbili.

¹¹ Ngibawa kobana ungisindise esandleni somfowethu u-Esewu ngombana ngiyamesaba. Nginevalo lokobana uzangisahlela abe abulale abonobantwana nabantwana ababavikeleko.

¹² Somnini wena ngokwakho uthe ngambala uzangiphumelelisa bewenze iinzukulwana zami zibe ngangehlabathi yelwandle engabalekiko.”

¹³ Wahlwa ubusukobo lapho, wakhethela umfowabo u-Esewu isipho phakathi kwalokho agade anakho:

¹⁴ iimbuzi ezisikazi ezimakhulu amabili neempongo ezimatjhumi amabili, izimvu ezisikazi ezimakhulu amabili namaqama amatjhumi amabili,

¹⁵ amakamela asikazi amatjhumi amathathu namakamedlana wakhona, iinkomazi ezimatjhumi amane neenkunzi ezilitjhumi, abodumbana abasikazi abamatjhumi amabili nabaduna abalitjhumi.

¹⁶ Koke lokhu wakubeka ezandleni zeensebenzi zakhe, wakuhlukanisa ngemihlambi wathi kizo: “Khambani phambi kwami, nitjhiye isikhala hlangana nemihlambi.”

¹⁷ Wayala isisebenzi esimrholi wathi: “Lokha umfowethu u-Esewu nakahlangana nawe bese abuze bonyana ungewakabani, uthathelaphi nokobana umhlambi ongaka lo ngewakabani,

¹⁸ uthi kuye, ‘Ngewencekwakho uJakopo. Usisipho esithunyelelwe ikosakhe u-Esewu. Ngikhuluma nje useenthendeni zethu.’ ”

¹⁹ Wayala nesisebenzi sesibili, sesithathu nazo zoke ezinye ezaziraga imihlambi wathi: “Nani nitjho njalo ku-Esewu nanihlangana naye.

²⁰ Niqiniseke bonyana nithi, ‘UJakopo incekwakho useenthendeni zethu.’ ” UJakopo wayala njalo ngombana wadlumbana wathi: “Ngizomthoba ummoya ngezipho engimthumelela zonezi. Ngemva kwalokho sengingaqalana naye. Mhlamunye uzangamukela.”

²¹ Yeke izipho zakaJakopo zakhamba phambi kwakhe, kodwana yena wahlwa ubusukobo ekampeni.

UJakopo ubindana nomuntu othize ebusuku

²² Ngobusukobo uJakopo wavuka wathatha abafazi bakhe ababili, amakhohlwakhe amabili namadodanakhe alitjhumi nanye bayama izibuko leJabokhi.

²³ Ngemva kobana abayamise umlanjana, wayamisa nayo yoke ipahlakhe.

²⁴ Kuthe bona uJakopo asale yedwa, kwafika umuntu othize wabindana naye bekwasa.

²⁵ Umuntu loyo nakabona bonyana akahluli uJakopo wamkghodlha inyonga beyakhwamuka nakalokhu abindana naye njalo.

²⁶ Wathi kuJakopo: “Ngilisa ngikhambe, nakhu kuyasa.” Kodwana uJakopo wathi: “Angizukulisa ungakangibusisi.”

²⁷ Umuntu loyo wambuza wathi: “Ungubani ibizo lakho?” Yena wathi: “NginguJakopo.”

²⁸ Umuntu wathi: “Ibizo lakho akusazokuba nguJakopo, kodwana uzakuba ngu-Israyeli ngombana uwunawunene nabozinyana nabantu bewahlula.”

²⁹ UJakopo wabuza wathi: “Alo, wena, ibizo lakho ngubani?” Kodwana waphendula wathi: “Ungibuzelani ibizo lami?” Wabusisa uJakopo khonapho-ke.

³⁰ UJakopo wathiya indawo leyo bonyana yiPeniyeli asithi: “Ngambala ngibonene nozinyana ubuso nobuso, khonapho ipilwami yabulungeka.”

³¹ Kwathi uJakopo nakadlula ePenuweli wabona ilanga liphuma. Gade ahluza ngombana inyongakhe beyirhwahlaphele.

³² Kungebangelo bekube namhlanjesi ama-Israyeli akawugomi umsipha wenyonga ngombana umuntu loyo wakghodlha umsipha wenyonga kaJakopo.