UGENESISI 31 - IsiNdebele 2012 Translation

UJakopo ubalekela uLabani

¹ UJakopo wezwa bonyana amadodana kaLabani gade asithi: “UJakopo lo, sese athethe koke okungokwakababa. Uzinonise khulu ngakho koke ubaba anakho.”

² Wabona bonyana uLabani akasese mehlweni njengaphambilini.

³ USomnini wathi kuJakopo: “Buyela emuva enarheni yaboyihlo neenhlobeni zakho. Ngizakuba nawe.”

⁴ Yeke uJakopo wathumela ilizwi kuRarheli noLeya bonyana beze emmangweni emhlambinakhe.

⁵ Wathi kibo: “Ngilemuke bonyana ubabenu akasese mehlweni kimapha njengombana gade angakho ngaphambilini, kodwana uZimu kababa ungisizile.

⁶ Nani niyazi bonyana ngisebenzele ubabenu ngamandlami woke.

⁷ Phezu kwalokho yena wangidlelezela ngokuphambanisa umrholwami kalitjhumi. Nokho uZimu akakamvumeli kobana angilimaze.

⁸ Bekathi lokha nakathi uzangikhokhela ngomhlambi omabalabala, woke umhlambi uzale iimvana neembuzana ezimabalabala. Athi lokha nakathi uzangikhokhela ngomhlambi onemitleza, woke uzale iimvana neembuzana ezinemitleza.

⁹ Nje-ke uZimu uthathele ubabenu ifuyo wayinikela mina.

¹⁰ “Ngesikhathi sokujarhwa ngakhe ngabhudanga, ngathi nangiqalako ngabona bonyana iimpongo ezijarha umhlambi ngezimabalabala, ezinemitleza nezimapharaphara.

¹¹ Ingilozi kaZimu yathi kimi ebhudangweni, ‘Jakopo!’ ngathi, ‘Ngilapha!’

¹² Yaraga yathi, ‘Qala, zoke iimpongo ezijarha umhlambi ngezimabalabala, ezinemitleza nezimapharaphara. Lokhu kwenzeka ngombana ngibone koke uLabani akwenze kuwe.

¹³ NginguZimu weBhethe-Eli lapha wazesa khona ilitje nalapha wenze khona isifungo kimi. Nje-ke suka enarheni le bese ubuyela emuva enarheni yekhenu.’ ”

¹⁴ URarheli noLeya baphendula bathi: “Sisese nesabelo elifeni lakababa na?

¹⁵ Angithi usithatha njengamaphandle! Akakasithengisi kwaphela, kodwana ugomojele koke esikhokhelwe ngakho.

¹⁶ Ngambala woke umnono uZimu awumuke ubabethu ungowethu nabantwabethu. Yeke yenza nanyana yini uZimu akutjele bona uyenze.”

¹⁷ UJakopo walungisa, wakhweza abantwabakhe nabafazi bakhe phezu kwamakamela,

¹⁸ waraga yoke imihlambakhe okutjho yoke ifuyo azifumanela yona ePadana-Aramu, wanqomba kuyise u-Isaka enarheni yeKanana.

¹⁹ Lokha uLabani nayokurhuna izimvu, uRarheli weba imihlalandlini yakayise.

²⁰ Phezu kwalokho uJakopo wakhukhuthela uLabani umAramu ngokungamtjeli bonyana uyabaleka.

²¹ Wabaleka nakho koke agade anakho, wayama umlambo iYufrathe wanqomba eentatjaneni zakwaGiliyadi.

ULabani wenza isivumelwano noJakopo

²² Kwathi elangeni lesithathu uLabani wabikelwa bonyana uJakopo ubalekile.

²³ ULabani wabutha iinhlobo zakhe, wagijimisa uJakopo amalanga alikhomba. Wambambela eentatjaneni zakwaGiliyadi.

²⁴ UZimu waziveza kuLabani umAramu ngebhudango ebusuku wathi kuye: “Utjheje ikulumakho noJakopo.”

²⁵ UJakopo gade ahlome itendakhe eentatjaneni zakwaGiliyadi lokha uLabani namfumanako. ULabani nomndenakhe nabo bahloma amatendabo lapho.

²⁶ ULabani wathi kuJakopo: “Yintobani oyenzileko le? Ungikhukhuthele ngokuraga amadodakazami njengeembotjhwa epini.

²⁷ Ungebeleleni bewabaleka sidu na? Nangathana fese wangibikela, bengizokwenzela umnyanya wokukulayelisa ngethabo nangokukuvumela ingoma sililise abosotjherere namaharibha.

²⁸ Azange usangipha nethuba lokuncwanga abantwana babantwabami namadodakazami ngibalayelise. Uyazi wenze ubudlhadlha bakodlhadlha.

²⁹ Nginamandla wokunilimaza, kodwana ubusuku bayizolo uZimu waboyihlo uthe kimi, ‘Utjheje ikulumakho noJakopo.’

³⁰ Ngiyabona bonyana ngambala usendleleni ngombana uhlulukele khulu ukubuyela kwenu. Alo-ke webeleni abozinyana bami?”

³¹ UJakopo waphendula wathi kuLabani: “Ngibalekile ngombana gade ngesaba. Ngadlumbana bonyana uzangemuka amadodakazakho.

³² Kodwana nange ufunyana nanyana ngubani ogugudlhele abozinyana bakho, uzakuhlukana namabele. Ngikhombisa phambi kweenhlobo zethwezi bonyana yini yakho engiyithetheko. Nawuyifunyanako, ithathe.” UJakopo gade angazi bonyana uRarheli webe abosingazimabo.

³³ Yeke uLabani wangena ngetendeni lakaJakopo, lakaLeya neencekukazi ezimbili; kodwana azange afunyane litho. Naphuma etendeni lakaLeya waya kelakaRarheli.

³⁴ URarheli gade athethe imihlalandlini wayibeka ngaphakathi kwesala sekamela wahlala phezu kwayo. ULabani waphumbutha koke ngetendenapho kodwana azange afunyane litho.

³⁵ URarheli wathi kuyise: “Ubaba angathukutheli nangibona ngitshimalele phasi ngingasikimi ubaba nangenako, ngisesikhathini.” Yeke wabhenyegula kodwana azange ayifunyane imihlalandlini.

³⁶ UJakopo wathukuthela wasola uLabani wathi: “Ngikone ngani? Ngikwenze sono bani nawulokhu utjha kangaka ngami nje?

³⁷ Iye, uphumbuthe yoke ipahlami! Alo, ufunyaneni-ke okungekwakho? Kuveze ukubeke phambi komndenakho nowami ukuze kuphele intwele phakathi kwami nawe!

³⁸ Sele kuminyaka ematjhumi amabili yoke ngihlala nawe. Izimvu neembuzi zakho azange zipholoze, nami azange khengigome amaqama womhlambakho.

³⁹ Azange khengikulethele iinlwana ezidatjulwe ziinyamazana zommango; kube kukonakalelwa kwami koke lokho. Ngaphezu kwalokho ubize ikokhelo kimi malungana nanyana yini eyetjiweko emini namkha ebusuku.

⁴⁰ Ngiphile makghwakghwa nawe: Emini bengikhanzingwa mtjhiso kuthi ebusuku ngigongobaliswe makhaza. Bengihlwa ngiqale ngamehlo wayizolo!

⁴¹ Ngiphile njalo iminyaka ematjhumi amabili yoke endawenakho. Ngikusebenzele iminyaka elitjhumi nane kobana ngifumane amadodakazakho amabili neminyaka esithandathu ukufumana umhlambi. Khonapho waphambanisa umrholwami katjhumitjhumi.

⁴² Nangathana uZimu wabobaba, uZimu ka-Abrahamu, uZimu ohloniphekako ku-Isaka gade angasi nami, ngiqinisile ngithi ngabe ungiqotjhe ngimkhonoze. Kodwana uZimu ubonile umtlhagwami nomjuluko wezandla zami bekwathi ebusukwini bayizolo wakusola.”

⁴³ ULabani waphendula uJakopo wathi: “Abantazanaba madodakazami, abantwanaba bantwabami, nomhlambi lo ngewami. Koke okubonakokhu kuthi mina. Kodwana yini engabe ngisayenza namhlanje ngamadodakazami lawa, namkha ngabantwana ababelethwe ngiwo?

⁴⁴ Yeke mina nawe asenze isivumelwano, kube bufakazi phakathi kwami nawe.”

⁴⁵ UJakopo wathatha ilitje walijamisa laba lilitje lesikhumbuzo.

⁴⁶ ULabani wathi eenhlotjeni zakhe: “Buthelelani amatje.” Ngambala benza njalo bawakghubelela aba siqorho. Nabaqeda lapho bagomela esiqorhwenapho.

⁴⁷ ULabani wasibiza bonyana yiYegari-Sahaduta, kodwana uJakopo wasibiza bonyana yiGaledi.

⁴⁸ ULabani wathi: “Isiqorhwesi singufakazi phakathi kwami nawe namhlanjesi.” Kungebangelo kwathiwa yiGaledi.

⁴⁹ Godu kwathiwa yiMitsipha ngombana uLabani wathi: “Inga uSomnini angaba mlindi phakathi kwami nawe lokha nasisemakudana.

⁵⁰ Nakwenzeka uhlukumeze amadodakazami namkha uthathe abanye abafazi ngaphandle kwamadodakazami, ngitjho nanyana kungekho obonako, khumbula bonyana uZimu ungufakazi phakathi kwami nawe.”

⁵¹ Godu uLabani wathi: “Nasi isiqorho engisikghubelele phakathi kwami nawe begodu nanti nelitje lesikhumbuzo.

⁵² Isiqorho esingakimi nelitje lesikhumbuzo elingakuwe bufakazi besivumelwano sokobana angeze ngasidlula ngize ngakuwe bona ngikulimaze, nawe angeze wasidlula uze ngakimi bona ungilimaze.

⁵³ UZimu kayihlo u-Abrahamu nabozinyana bakababa uNarhori bazakugweba phakathi kwethu.” UJakopo wafunga ngoZimu ohloniphekileko kuyise u-Isaka.

⁵⁴ Wenza umhlatjelo entabeni, wamema iinhlobo zakhe bona zizogoma. Ngemva kobana sele bagomile, bahlala ubusukobo entabenapho.

⁵⁵ Ekuseni ngakusasa uLabani wancwanga abantwana babantwabakhe namadodakazakhe wawabusisa. Wabuyela kwakhe.