UGENESISI 30 - IsiNdebele 2012 Translation

¹ Lokha uRarheli nakabona bonyana akabeletheli uJakopo abantwana, wafela udadwabo umona. Wathi kuJakopo: “Ngipha abantwana, nakungasinjalo ngizakufa!”

² UJakopo wamthukuthelela wathi: “Kanti senginguZimu okuvale bona ungabelethi na?”

³ URarheli wathi: “Nangu uBhilirha incekukazami. Lala naye khona azakubelethela emathangenami, yeke nami ngizakuba ngunobantwana ngaye.”

⁴ Yeke wamnikela uBhilirha incekukazakhe kobana abe mkakhe. UJakopo walala naye.

⁵ UBhilirha waba sidisi. Wabelethela uJakopo indodana.

⁶ URarheli wathi: “UZimu ungigwebele, walalela isibawo sami, wangipha indodana.” Ngebangelo wamthiya bona nguDani.

⁷ UBhilirha incekukazi kaRarheli waba sidisi godu wabelethela uJakopo indodana yesibili.

⁸ URarheli wathi: “Ngibindene nodadwethu ngamandla amakhulu, ngamhlula.” Alo-ke wayithiya bona nguNafitali.

⁹ Kuthe lokha uLeya nakabona bonyana akasabelethi, wathatha uZilipha incekukazakhe, wamnikela uJakopo bona abe mkakhe.

¹⁰ Yeke uZilipha incekukazi kaLeya wabelethela uJakopo indodana.

¹¹ ULeya wathi: “Ngehlelwe litjhudu!” Yeke wayithiya bona nguGadi.

¹² UZilipha incekukazi kaLeya wabelethela uJakopo indodana yesibili.

¹³ ULeya wathi: “Maye nginamile! Ngambala amaqhakazana azongibiza ngonosinamile.” Yeke wayithiya ibizo bona ngu-Atjheri.

¹⁴ Kwathi ngesikhathi sokuvunwa kwekoroyi uRubeni waphuma waya emasimini wafese wathola ikofe, wayilethela unina uLeya. URarheli wayibona wathi: “Akhe ungiphe ikofe leyo oyiphathelwe yindodanakho.”

¹⁵ ULeya waphendula wathi: “Akukaneli ukungithathela indodami na? Nanje usalinga ukuthathela indodanami ikofe yayo?” URarheli wathi: “Nangabe indodanakho ingangipha ikofe yayo, khona-ke ungalala noJakopo ubusukobu.”

¹⁶ Kuthe bona uJakopo abuye emasimini, uLeya waphuma wayomhlangabeza, wafese wathi: “Uzolala nami ubusuku banamhlanjesobu ngombana ngikuqatjhe ngekofe yendodanami.” Nje-ke walala naye ubusukobo.

¹⁷ UZimu wezwa umthandazo kaLeya, waba sidisi bewabelethela uJakopo indodana yesihlanu.

¹⁸ ULeya wathi: “UZimu ungikhokhele ngombana nganikela indodami incekukazami.” Nje-ke wayithiya ibizo bona ngu-Isakari.

¹⁹ ULeya waba sidisi godu bewabelethela uJakopo indodana yesithandathu.

²⁰ Wathi: “UZimu ungiphe isipho esihle, kwanjesi indodami izakuba ngemkhawulwenami ngombana ngiyibelethele amadodana amathandathu.” Yeke wayithiya ibizo bona nguZebuloni.

²¹ Ngemva kwalokho wabelethela uJakopo indodakazi, wayithiya bona nguDina.

²² Yeke uZimu wakhumbula uRarheli, wezwa umthandazwakhe wavula isibeletho sakhe.

²³ Waba sidisi wabeletha indodana, wathi: “UZimu ungithule ihlazo lami.”

²⁴ Wayithiya ibizo bona nguJosefa asithi: “Inga uSomnini angangingezelela ngomsana omunye godu.”

Ukwanda kwemihlambi kaJakopo

²⁵ Ngemva kokobana uRarheli abelethe uJosefa, uJakopo wathi kuLabani: “Ngivumela ngigoduke, ngibuyele enarhenekhethu.

²⁶ Nginikela abafazi bami engabafumana ngokubasebenzela kuwe kanye nabantwabami. Nawe uyazi bona ngakusebenzela kuhle kangangani.”

²⁷ ULabani wathi kuye: “Ungangivumela khengithi kuwe: Nginjingile. Ngokuba khona kwakho kimapha, uSomnini ungibusisile.

²⁸ Ngitjela bona ungibulalelaphi, ngizakukhokhela.”

²⁹ UJakopo waphendula wathi: “Nawe uyazi bona ngakusebenzela kangangani nokobanyana imihlambakho yanda kangangani ngaphasi kwesandla sami.

³⁰ Iye, okuncani gade unakho ngaphambi kokobana ngifike, nokho ngemva kwalokho kwanda khulu. USomnini wakubusisa ngokuba khona kwami kuwapha. Alo, mina ngiyokuthoma nini-ke ngezomzami?”

³¹ ULabani wathi: “Ufuna ngikunikeleni?” UJakopo waphendula wathi: “Angifuni ikokhelo. Ngizokusoloko ngikwelusela umhlambakho nange singavumelana kilokhu:

³² Ngizakhamba hlangana nemimhlambakho namhlanje ngikhuphe zoke iinlwana ezinemibala engakajayeleki. Ngizakuthatha zoke iimvana ezinzima nazo zoke iimbuzi ezimabalabala nezinemitleza. Lokho-ke kuzakuba yikokhelwami.

³³ Ukwethembeka kwami kuzakubonakala kuhle ngesikhathi esizako lokha nawuzokuhlola umhlambami: Nawufunyana iimbuzi ezingasimabalabala nezinganamitleza nezimvu ezingasinzima, uzakwazi bona zetjiwe ngimi.”

³⁴ ULabani waphendula wathi: “Kulungile, akube njengombana usitjho.”

³⁵ Kodwana khona mhlokho, uLabani wakhetha zoke iimpongo ezimabalabala nezimtleza, nazo zoke iimbuzi ezisikazi ezimabalabala nezimtleza, okutjho zoke ezinamabala amhlophe nezimvu zoke ezingasinzima, wazibeka ezandleni zamadodanakhe.

³⁶ ULabani wabeka ibanga lekhambo lamalanga amathathu phakathi kwakhe noJakopo. UJakopo yena welusa inengi lemihlambi yakaLabani.

³⁷ UJakopo wathatha amaswazi kapopuliri, i-alimondi newamapalatani wawahluba amaqolwawo ngokwenza imitleza ukuze kubonakale ubumhlope bamaswazi lawo.

³⁸ Wabeka amaswazi awahlubileko lawo ngaphambi komhlambi weembuzi ngeenkerebheni lapha uselela khona amanzi. Umhlambi lowo gade ulungele ukujarhwa lokha nawuzokusela amanzi,

³⁹ bekuthi lokha nawujarhana phambi kwamaswazi lawo, uzale iimbuzana ezinamabala amhlophe, ezimtleza nezimabalabala.

⁴⁰ UJakopo wahlukanisa izimvu eembuzini. Waqalisa izimvu eembuzini ezimitleza nezinzima lokha nazijarhanako. Ngokwenza njalo wazenzela imihlambi angazange ayihlanganise neyakaLabani.

⁴¹ Kwathi umhlambi weembuzi oqinileko nawujarhanako, uJakopo wabeka amaswazi phambi kwawo ngeenkerebheni ukuze ujarhanele phambi kwamaswazapho.

⁴² Kodwana azange abeke amaswazi phambi komhlambi obogabogako. Ngaleyondlela umhlambi obogabogako waba ngewakaLabani kwathi oqinileko waba ngewakaJakopo.

⁴³ Yeke koke uJakopo anakho kwanda. Azange abe nezimvu neembuzi kwaphela kodwana waba namakhobokakazi, amakhoboka, amakamela nabodumbana.