UGENESISI 3 - IsiNdebele 2012 Translation

Ukungalaleli kwabantu uZimu

¹ Inyoka gade inobuqili ukudlula ezinye iinlwana zommango uZimu azenzileko. Yabuza umfazi yathi: “Kuliqiniso bona uZimu unalele ukudla kinanyana ngimuphi umuthi osesivandeni na?”

² Umfazi waphendula wathi: “Awa, singadla isithelo sananyana ngimuphi umuthi esivandeni,

³ kodwana uZimu uthe, ‘Ningadli isithelo somuthi ophakathi nesivande begodu ningawuthinti ukuze ningafi.’ ”

⁴ Inyoka yathi: “Awa, anikazukufa!

⁵ Kuhlekuhle uZimu uyazi bonyana mhlana nisidlako, amehlwenu azokuvuleka, nibe nokwazi koke njengoZimu.”

⁶ Umfazi waqala umuthi, wabona iinthelo ezihle neziyengako. Phezu kwalokho beziganukeja ngombana ziyahlakaniphisa. Yeke wakha iinthelo kiwo wadla, wanikela nendodakhe egade inaye, nayo yadla.

⁷ Ngalokho bobabili amehlwabo avuleka, bazibona bakhamba hlubule. Nje-ke bazithungela iimvunulo ngamakari wamakhiwani.

⁸ Ekupholeni kwelanga bezwa uSomnini uZimu akhamba esivandeni, yeke umuntu nomkakhe babhaqela uZimu hlangana nemithi yesivande.

⁹ USomnini uZimu wabiza umuntu wathi: “Kanti ukuphi na?”

¹⁰ Yena waphendula wathi: “Ngikuzwe ukhamba esivandeni, ngesaba ngombana ngihlubule; nje-ke ngizifihlile.”

¹¹ UZimu wathi kuye: “Ngubani okutjele bonyana uhlubule? Kghani udle emthini engakuyala ngawo bona ungawudli?”

¹² Umuntu wathi: “Awa, umfazi owangipha yena bona abe nami, nguye ongiphe isithelo somuthi, yeke nami ngadla.”

¹³ Nje-ke uSomnini wathi emfazini: “Yintobani oyenzileko le?” Umfazi waphendula wathi: “Yinyoka engirhwalileko, yeke ngadla.”

¹⁴ USomnini uZimu wathi enyokeni: “Ngebanga lokobana wenze lokhu, wena unikelelwe: yoke ifuyo yekhaya izokubaleka neenlwana zoke zommango zikunine. Uzakurhurhuba ngesisu, udle ithuli lehlabathi imihla yoke yepilwakho.

¹⁵ Ngizakubeka ubutha phakathi kwakho nomfazi, naphakathi kweenzukulwana zakho neenzukulwana zakhe; zona zizakutshidlha ihlokwakho wena ulume isithende sazo.”

¹⁶ Emfazini uZimu wathi: “Ngizokwandisela ubuhlungu ekuzithwaleni kwakho, ubelethe ngobudisi obukhulu. Uzakutjhisakalela indodakho, kodwana yona izakukubusa.”

¹⁷ Endodeni uZimu wathi: “Njengombana ulalele umfazi wabe wadla emthini engakwalela bonyana udle kiwo; ihlabathi seyinikelelwe ngebanga lakho: Imihla yoke yepilwakho uzakusebenza nzima ukufumana ukudla kwakho kiyo,

¹⁸ kodwana izakuvezela ameva nabosotokolo bewudle iimila zommango.

¹⁹ Ukudla kwakho uzakujulukela bewubuyele ehlabathini. Iye, wathathwa kiyo begodu njengombana ulithuli nje, uzakubuyela ethulini.”

²⁰ Indoda yathiya umkayo bona ngu-Eva ngombana gade azokuba ngunina wabo boke abaphilako.

²¹ USomnini uZimu wenza iimvunulo zesikhumba, nje-ke wembathisa indoda nomkayo.

²² USomnini uZimu wathi: “Kazi umuntu sele anokwazi koke. Ngaleyondlela sese afana nathi. Yeke akukafaneli avunyelwe bona elule isandla sakhe adle emthini wokuphila ukuze aphile isiphelani.”

²³ Nje-ke uSomnini uZimu wamqotjha umuntu esivandeni se-Edeni ukuze alime ihlabathi athethwe kiyo.

²⁴ Kuthe sele amqotjhile umuntu, wabeka amakerubhi ngepumalanga esangweni lesivande. Amakerubhi lawo gade anesabula yomlilo ebenyezelako, alinde indlela eya emthini wokuphila.