UGENESISI 29 - IsiNdebele 2012 Translation

UJakopo ufika kwaLabani

¹ UJakopo waraga ngekhambo lakhe lokuya enarheni yabantu bangepumalanga.

² Khonapho wabona umthombo emmangweni, kwakulele imihlambi emithathu yezimvu eqadi kwawo ngombana bekusezwa izimvu lapho. Umlomo womthombo lowo wawugutjuzeswe ngelitje elikhulu.

³ Bekuthi yoke imihlambi nasele iphelele lapho, abelusi bagede ilitjelo balisuse emlonyeni womthombo bese baseza izimvu. Nabaqedako basibekele umthombo lowo ngelitjelo.

⁴ UJakopo wabuza abelusi wathi: “Bafowethu, nibuya tjhuba liphi?” Baphendula bathi: “Sibuya ngeRharana.”

⁵ Wabuza godu wathi: “Niyamazi uLabani, umsa kaNarhori na?” Baphendula bathi: “Iye, siyamazi.”

⁶ Wabuza wathi: “Usaphila na?” Bamphendula bathi: “Iye, usaphila. Qala nasiya indodakazakhe uRarheli isiza nomhlambakhe.”

⁷ UJakopo wathi kibo: “Alo, njengombana kusesemini ekulu kangaka nje begodu akukabi sikhathi sokubuthelela umhlambi. Kubayini ningawusezi ubuyele emadlelweni na?”

⁸ Baphendula bathi: “Asikwazi ukwenza njalo kungakafiki yoke imihlambi bese-ke kugedwa ilitjeli emlonyeni womthombo. Ngemva kwalapho-ke sele kungasezwa izimvu.”

⁹ Kwathi uJakopo asakhuluma nabo, kwafika uRarheli nezimvu zakayise ngombana gade angumelusazo.

¹⁰ Lokha uJakopo nakabona uRarheli nomhlambi kamalumakhe uLabani, wanqomba emthonjeni wageda ilitje, waseza izimvu zakamalumakhe.

¹¹ Yeke uJakopo wancwanga uRarheli bewathoma wakhihla isililo.

¹² UJakopo watjela uRarheli bonyana usihlobo sakayise nokobana uyindodana kaRabega. Yeke uRarheli wagijima wayokutjela uyise.

¹³ Kwathi bona uLabani ezwe ngeendaba zakaJakopo umzukulwanakhe wagijima bona amhlangabeze. Wamgona wamncwanga emhlathini, wamngenisa ngekhaya. UJakopo wadembela uLabani koke kwekhabo.

¹⁴ ULabani wathi kuye: “Ngambala usihlobo sami seengazi.” Ngemva kobana uJakopo sele ahlezi kwaLabani inyanga yoke,

UJakopo utjhada noLeya noRarheli

¹⁵ uLabani wathi kuye: “Ukuthi usihlobo sami akutjho bonyana sekumele ungisebenzele simahla. Ungathanda bonyana ngikukhokhele kangangani?”

¹⁶ ULabani gade anamadodakazi amabili, izibulo kwakunguLeya, omncani kunguRarheli.

¹⁷ Amehlo kaLeya gade angasibukhali, kodwana uRarheli gade anejamo begodu amuhle.

¹⁸ UJakopo wathanda uRarheli, nje-ke wathi kuLabani: “Ngizakusebenzela iminyaka elikhomba mayelana nendodakazakho encani uRarheli.”

¹⁹ ULabani wathi: “Kuzaba ngcono ngimnikele wena kunobanyana ngimnikele enye nje indoda. Yeke hlala kimapha.”

²⁰ UJakopo wasebenza iminyaka elikhomba bona afunyane uRarheli. Kodwana kwaba kwangathi malanga ambalwa kuye ngebanga lethando agade athanda ngalo uRarheli.

²¹ Yeke uJakopo wathi kuLabani: “Nginikela umkami. Isikhathi sami sengisiqedile, sengifuna ukumngena.”

²² Nje-ke uLabani wenza umnyanya, wamema boke abantu bendawo leyo.

²³ Kodwana kwathi sekurhwaqele wathatha indodakazakhe uLeya wayisa kuJakopo, uJakopo walala nayo.

²⁴ ULabani gade anikele uLeya incekukazakhe, uZilipha, njengesipho somtjhado.

²⁵ Kwathi nakusako, uJakopo wathi: “Madekhethu, nguLeya lo!” Waya kuLabani wathi: “Yintobani ongenze yona le? Angithi bengisebenzela uRarheli? Alo, ungigalajelani?”

²⁶ ULabani waphendula wathi: “Kumphambo ekhethwapha bona omncani angenda qangi omkhulu angakendi.

²⁷ Lindalinda bekuphele iveke yobukhazi le, ngizabe sengikunikela uRarheli nayibe uzangisebenzela eminye iminyaka elikhomba.”

²⁸ UJakopo wenza njalo. Kuthe bona iveke yobukhazi iphele, uLabani wanikela uJakopo indodakazakhe uRarheli bona abe mkakhe.

²⁹ ULabani wapha uRarheli incekukazakhe, uBhilirha, njengesipho somtjhado.

³⁰ UJakopo wangena uRarheli. Ngambala wathanda uRarheli khulu kunoLeya. Yeke wasebenzela uLabani eminye iminyaka elikhomba.

Abantwana bakaJakopo

³¹ Kuthe uSomnini nabona bonyana uLeya akathandwa, yavula isibeletho sakhe, yavala sakaRarheli.

³² ULeya waba sidisi bewabeletha indodana. Wayithiya bona nguRubeni ngombana wathi: “Ngambala uSomnini ubone umtlhagwami. Ngiqinisile indodami izangithanda kwanjesi.”

³³ Waba sidisi godu, wabeletha enye indodana, wathi: “USomnini ungiphe enye indodana godu ngombana uzwile bona angithandwa.” Yeke wayithiya bona nguSimiyoni.

³⁴ ULeya godu waba sidisi, wabeletha indodana godu, wathi: “Kwanjesi indodami izakunamathela kimi ngombana ngiyibelethele amadodana amathathu.” Yeke wayithiya bona nguLevi.

³⁵ Godu waba sidisi, wabeletha enye indodana, wathi: “Gadesi ngizakudumisa uSomnini.” Yeke wayithiya bona nguJuda. Ngemva kwalapho imbelekwakhe yajama.