UGENESISI 28 - IsiNdebele 2012 Translation

¹ U-Isaka wabiza uJakopo wambusisa bewamyala wathi kuye: “Ungathathi umfazi emadodakazini weKanana.

² Khamba uye ePadana-Aramu kwaBhetuweli ubamkhulwakho wekhenomkhulu, uzithathele khona umfazi emadodakazini kamalumakho uLabani.

³ Inga uZimu oSabekako angakubusisa, wande ngembeleko ukuze kuvele iinkoro ngeenkoro kuwe.

⁴ Akuphe wena neenzukulwana zakho isibusiso esaphiwa u-Abrahamu bona uthumbe inarha okhonze kiyo, inarha uZimu ayinikela u-Abrahamu.”

⁵ Yeke u-Isaka watjhaphulula uJakopo wangena indlela, wanqomba ePadana-Aramu kwaLabani umsa kaBhetuweli umAramu omnakwabo kaRabega unina kaJakopo no-Esewu.

⁶ U-Esewu walemuka bonyana u-Isaka ubusise uJakopo bewamthumela ePadana-Aramu bona azithathele khona umfazi ngombana nambusisako wamyala bona angathathi umfazi weKanana.

⁷ Walemuka godu bonyana uJakopo ulalele uyise nonina, waya ePadana-Aramu.

⁸ Lokho kwamenza wabona bonyana abantazana beKananaba bamkghabhudlha kangangani uyise u-Isaka.

⁹ Nje-ke waya kwa-Itjhimayeli, indodana ka-Abrahamu. Phezu kwabafazi agade asele anabo, wazithathela uMarhalathi, indodakazi ka-Itjhimayeli, ongudadwabo kaNebayothi.

Ibhudango lakaJakopo eBhethe-Eli

¹⁰ UJakopo wasuka eBheritjheba wanqomba eRharana.

¹¹ Wafika kwandawo, wathatha elinye lamatje lapho walisamela ngombana besele litjhingile. Walala ubusukobo lapho.

¹² Wabhudanga abona umqaqado usuka phasi uya ezulwini neengilozi zakaZimu zazehla zenyuka emqaqadwenapho.

¹³ Wabona uSomnini ijame ngehla kwalapho, ithi: “NginguSomnini, uZimu kayihlomkhulu u-Abrahamu noZimu kayihlo u-Isaka. Ngizokupha inarha olele kiyo leyo wena neenzukulwana zakho.

¹⁴ Iinzukulwana zakho zizakuba zinengi njengethuli lehlabathi. Uzakwanda unabele ngetjingalanga, ngepumalanga, ngetlhagwini nangesewula. Zoke iinkoro zephasi zikhanukele ukubusiswa njengawe nanjengeenzukulwana zakho.

¹⁵ Qala, nginawe begodu ngizakuvikela kuphi nakuphi lapha ukhamba khona bengikubuyisele enarheni le. Angeze ngakutjhiya ukufikela ngiphetha engikuthembise khona.”

¹⁶ Kwathi lokha uJakopo nakaphaphamako wadlumbana wathi: “Ngambala uSomnini ukhona endaweni le, awukhuzi bengingazi!”

¹⁷ Wethukwa wathi: “Indawo le iyasabeka! Akunalitho elinye, le yindlu kaZimu! Leli, lisango lezulu!”

¹⁸ Wavuka ngamasa wathatha ilitje abegade alisamele walijamisa laba sikhumbuzo. Walizesa ngamafutha.

¹⁹ Wathiya indawo leyo bona yiBhethe-Eli, nanyana umuzi lowo bewuphele ubizwe bona yiLuzi.

²⁰ Nje-ke uJakopo wenza isifungo wathi: “Nange uZimu angaba nami abe angivikele ekhambeni lameli, angiphe ukudla ngigome nezambatho ngembathe

²¹ bengibuyele ekhaya kubaba ngiphephile, uSomnini ube nguZimami.

²² Khona-ke ilitje engilibeke lapha njengesikhumbuzweli lizakuba yindlu kaZimu. Begodu ngiyathembisa bonyana kikho koke ongipha khona, ngizakunikela kwetjhumi.”