UGENESISI 27 - IsiNdebele 2012 Translation

UJakopo ufunyana isibusiso ku-Isaka

¹ U-Isaka besele aluphele namehlwakhe sele afifiyela angasaboni. Wabiza u-Esewu izibulo lakhe wathi kuye: “Ndodanami!” Wasabela wathi: “Baba!”

² U-Isaka wathi kuye: “Qala sengimdala, kanti nelanga lami angilazi.

³ Yeke thatha iinhlabano zakho, okusilanda nemisubelakho, uphume ubuzimba uyongifunela inyamazana.

⁴ Ungilungisele iinkhanakhana engizithandako, ungilethele zona ngigome bese ngiyakubusisa ngaphambi kobana ngihlongakale.”

⁵ URabega gade alalele lokha u-Isaka nakakhuluma no-Esewu indodanakhe. Kwathi lokha u-Esewu nakafulathelako bona ayokuzumela uyise inyamazana,

⁶ uRabega wathi kuJakopo indodanakhe: “Qala, ngizwe ngandlebenye uyihlo asithi kumnakwenu u-Esewu,

⁷ ‘Ngilethela inyamazana ungiphekele ngayo iinkhanakhana ngigome ukuze ngikubusise phambi kwakaSomnini ngaphambi kobana ngihlongakale.’

⁸ Nje-ke ndodanami, lalelisisa kuhle bese wenza engikutjela khona:

⁹ Khamba uye emhlambini ukhethe iimbuzana ezimbili ezinonileko ukuze ngiphekele uyihlo iinkhanakhana azithandako.

¹⁰ Uzazithatha uzise kuye agome bese akubusise phambi kobana ahlongakale.”

¹¹ Kodwana uJakopo wathi kuRabega unina: “Uyazi bona u-Esewu unoboya, kodwana mina nginesikhumba esitjhelelako.

¹² Nange kungenzeka angithinte, kuzakuba inga ngiyamnyaza bese ngizibizela iinthuweleliso kuneembusiso.”

¹³ Unina wamphendula wathi: “Nakube kuneenthuweleliso azize phezu kwami, ndodanami. Wena yenza lokho engikutjela khona. Khamba uyongithathela iimbuzanezo.”

¹⁴ Yeke wakhamba, walethela unina iimbuzanezo. Unina wapheka iinkhanakhana ezithandwa nguyise.

¹⁵ Khonapho uRabega wakhupha izambatho zakanokutjho zaka-Esewu indodanakhe ekulu ebegade azibekile, wathi indodanakhe encani uJakopo ayizembathe.

¹⁶ Wembesa izandla zakhe kanye nengcenye yentamakhe enesikhumba esibutjhelelezi ngesikhumba sembuzi.

¹⁷ Wamnikela iinkhanakhana kanye nesikwa asilungisileko.

¹⁸ Nje-ke waya kuyise wafika wathi: “Baba!” U-Isaka wathi: “We! Ungongubani ndodanami?”

¹⁹ UJakopo wathi kuyise: “Ngingu-Esewu izibulo lakho. Ngenze njengombana ungitjelile. Ngiyakurabhela hlala kuhle udle inyama engikulethele yona, khona uzangipha isibusiso sakho.”

²⁰ U-Isaka wathi: “Hawu, uyifumene njani msinyana kangaka ndodanami?” UJakopo waphendula wathi: “USomnini uZimakho ungisizile ngayifumana.”

²¹ U-Isaka wathi kuJakopo: “Tjhidela eduze ngikuthinte ndodanami ukuze ngazi bonyana ngambala ungu-Esewu indodanami namkha njani.”

²² Ngambala uJakopo watjhidela, uyise wamphumbutha, wadlumbana wathi: “Ilizwi ngelakaJakopo, kodwana izandla ngezaka-Esewu.”

²³ Azange alemuke bona nguJakopo ngombana izandla zakhe bezinoboya njengezaka-Esewu ukwenzela bona abusiswe.

²⁴ Kwathi nanyana sele ambuzisisa asithi, “Uthi ungu-Esewu kwamambala nje?” uJakopo wathi, “Iye baba, nginguye.”

²⁵ U-Isaka wathi: “Ngilethela inyama oyizumileko ndodanami, ngigome ukuze ngikubusise-ke.” UJakopo wamnikela yona newayini, wadla wasela.

²⁶ Yeke uyise wathi kuye: “Tjhidela lapha ndodanami, ungincwange emhlathini.”

²⁷ Ngambala waya kuye wamncwanga. Kuthe lokha u-Isaka nakezwa umnuko wezambatho zakhe wambusisa wathi: “Awuzwa-ke, iphunga lendodanami linjengephunga lesimu ebusiswe nguSomnini.

²⁸ UZimu akakuphe umbethe wezulu, avundise ihlabathakho! Akuphe inala yekoroyi neyesitjhidela sewayini!

²⁹ Izizwe zikusebenzele, abantu bakukhothamele. Ube yikosana yabafowenu namadodana kanyoko akukhothamele. Abakunikelelako banikelelwe, nabakubusisako babusiswe.”

³⁰ Emva kobana u-Isaka aqede ukubusisa uJakopo, bewasuka phambi koyise, qala nango umnakwabo u-Esewu afika abuya ekuzumeni.

³¹ Naye wafika wapheka iinkhanakhana wazisa kuyise wathi kuye: “Bengithi ubaba akavuke ahlale ukuze agome inyama indodanakhe emlethele yona, khona ubaba azangipha isibusiso sakhe.”

³² Uyise u-Isaka wabuza wathi: “Kanti ungubani wena na?” U-Esewu waphendula wathi: “Ngimi indodanakho, izibulo lakho, u-Esewu.”

³³ U-Isaka wabethwa livalo bewaqhaqhazela wathi: “Kanti bekungubani okhambe wayokuzuma inyamazana wangilethela yona bona ngiyigome phambi kobana ufike? Ngiqeda ukumbusisa khona nje, ngiqinisile uyokubusiseka loyo!”

³⁴ Kuthe bona u-Esewu ezwe amezwi kayise, wathwala imikhono ehloko warhahlawula wathi: “Nami ngibusisa baba!”

³⁵ Kodwana u-Isaka wathi: “Umfowenu ufike ngobugirikijani, wathatha isibusiso sakho.”

³⁶ U-Esewu wathi: “Akubabali kuthiwa nguJakopo nje! Sele kungokwesibili angidlelezela: Wahlangula amalungelwami wobuzibulo, nje udzwebule isibusiso sami! Ubaba azange angibekele isibusiso na?”

³⁷ U-Isaka waphendula wathi: “Sengimenze ikosana phezu kwakho begodu ngenza zoke iinhlobo zakhe zaba ziinsebenzi zakhe. Ngimsekele ngekoroyi nangesitjhidela sewayini. Alo, ngizabe ngisakwenzelani nje ndodanami?”

³⁸ U-Esewu wathi kuyise: “Kanti ubaba unesibusiso sinye kwaphela na? Ubaba akangibusise nami.” Wathoma wakhihla isililo.

³⁹ Yeke u-Isaka wathi kuye: “Umuzakho uzakuba kude nehlabathi evundileko, Ube kude nombethe wezulu

⁴⁰ uphile ngesabulakho. Uzakusebenzela umfowenu, kodwana lokha nawururharurhako uzakuhluthula ijogi lakhe lisuke entanyenakho.”

UJakopo ubalekela kwaLabani

⁴¹ U-Esewu wabambela uJakopo ivunda ngebanga lesibusiso asinikelwe nguyise. Wadlumbana wathi: “Akufike amalanga wokuzilela ubaba, khona ngizakubulala umfowethu uJakopo lo.”

⁴² URabega wezwa ngokusongela kwaka-Esewu indodanakhe ekulu. Yeke wathumela bona kubizwe uJakopo indodanakhe encani, wathi kuye: “Umfowenu u-Esewu uziduduza ngomkhumbulo wokukubulala.

⁴³ Nje-ke ndodanami, yenza engikutjela khona: Balekela kwamnakwethu uLabani eRharana.

⁴⁴ Hlala naye isikhatjhana umfowenu abe aqole.

⁴⁵ Ngizakuthumela ilizwi kobana ubuye ekhaya nasele umfowenu aqolile begodu akhohliwe ngalokho owamenza khona. Angifuni ukuniloba ngalanga linye.”

⁴⁶ URabega wathi ku-Isaka: “Sengidinwe kuphila ngebanga labomalukazanyana bamaRhithaba. Nange uJakopo angathatha umfazi ebantazaneni bamaRhithi abafana nebenarha le, khona ngiqinisile ngithi ipilwami izaba lilize lakolize.”