UGENESISI 26 - IsiNdebele 2012 Translation

U-Isaka uhlala eGerari

¹ Kwabakhona indlala enarheni ngaphandle kwaleyo eyakhe yabakhona ngaphambilini esikhathini saka-Abrahamu. U-Isaka wakhamba wayokukhonza kwa-Abimeleki, ikosi yamaFilista, eGerari.

² IKosi yabonakala ku-Isaka yathi: “Ungehleli eGibhide, hlala enarheni engizakutjela bonyana uhlale kiyo.

³ Khonzakhonza enarheni le. Ngizakuba nawe bengikubusise. Iye, ngizakupha wena neenzukulwana zakho zoke iinarhezi, ngiqinise isifungo engasenza kuyihlo u-Abrahamu.

⁴ Ngizakwenza iinzukulwana zakho zibe zinengi njengeenkwekwezi emkayini bese ngizinikela zoke iinarhezi. Zoke iinkoro zephasi zikhanukele ukubusiswa njengeenzukulwana zakho,

⁵ ngombana u-Abrahamu wangilalela wagcina okufaneleko: imiyalwami, iimiso zami nemithethwami.”

⁶ Yeke u-Isaka wahlala eGerari.

⁷ Kwathi lokha amadoda wendawo leyo nakathoma ukumbuza ngomkakhe wathi: “Awa, lo ngudadwethu.” Wesaba ukuthi “mkami” ngombana wadlumbana bonyana amadoda wendawo leyo azambulala ngenca kaRabega isiphalaphala sakhe.

⁸ U-Isaka wakhonza lapho isikhathi eside. Ngelinye ilanga u-Abimeleki ikosi yamaFilista yathi nayihlola enzasi ngefesidere yabona u-Isaka akitakitana nomkakhe uRabega.

⁹ Yeke u-Abimeleki wabiza u-Isaka wathi: “Ngambala mkakho lo! Alo, bekutheni nawuzakuthi ngudadwenu?” U-Isaka wamphendula wathi: “Kungombana ngidlumbene bona ngizakufa ngebanga lakhe.”

¹⁰ U-Abimeleki wathi: “Yintobani osenze yona le? Bekulula bona enye yamadoda ilale nomkakho, nje-ke bewuzosithwesa umlandu.”

¹¹ Yeke u-Abimeleki wayala woke umuntu wathi: “Nanyana ngubani othinta indoda le nomkayo, ngiqinisile ngithi uzakubulawa.”

¹² U-Isaka watjala isivuno enarheni leyo. Kwathi kiwo lowo mnyaka wavuna ngamakhulu kilokho akutjeleko. USomnini wambusisa,

¹³ wasoloko andlondlobala bewaba yinjinga yomuntu:

¹⁴ Waba nemihlambi yezimvu, yeembuzi neyeenkomo kanye neenceku ezinengi. AmaFilista amfela umona

¹⁵ abe aphetha ngokudibizesa yoke imithombo eyenjiwa ziinceku zakayise u-Abrahamu asaphila.

¹⁶ Yeke u-Abimeleki wathi ku-Isaka: “Suka kithapha ngombana sele usibhedlha ngamandla.”

¹⁷ U-Isaka wafuduka-ke wayokuhloma itende lakhe emrhobeni weGerari, wanzinza lapho.

¹⁸ Warhubha imithombo ebeyenjiwe ngesikhathi sakayise u-Abrahamu negade idibizeswe maFilista ngemva kokuhlongakala kwakhe. Wayithiya amabizo uyise agade ayithiye wona.

¹⁹ Iinceku zaka-Isaka zemba emrhobeni zafumana umthombo wamanzi ayalukako.

²⁰ Kodwana abelusi bakaGerari baphikisana nabelusi baka-Isaka bathi: “Amanzi la ngewethu!” Yeke u-Isaka wathiya umthombo lowo bona yi-Esekhe ngombana batjhijilana naye.

²¹ Iinceku zaka-Isaka zemba omunye umthombo godu, nalapho kwaba nokuqabana, yeke wawuthiya ibizo bona yiSitina.

²² Wafuduka lapho wemba omunye umthombo. Lapho-ke azange kubekhona ukuqabana, nje-ke wawuthiya bona yiRerhobhothi, asithi: “Iye, gadesi uSomnini usiphe iindawo ezivulekileko, nje-ke sizakuphumelela enarheni le.”

²³ Ukusuka lapho u-Isaka wafudukela eBheritjheba.

²⁴ Ngobusukobo uSomnini waziveza kuye wathi: “NginguZimu kayihlo u-Abrahamu. Yeke ungasabi ngombana nginawe. Ngizokubusisa bengingezelele isibalo seenzukulwana zakho ngebanga lencekwami u-Abrahamu.”

²⁵ Khonapho u-Isaka wakhela uSomnini i-aldari bewayithandaza. Wahloma itende lakhe lapho, iinceku zakhe zemba omunye umthombo.

Isivumelwano saka-Isaka no-Abimeleki

²⁶ U-Abimeleki ogade avela eGerari wafika kuye akhambisana no-Arhuzathi umlulekakhe noPhikoli induna yamabuthwakhe.

²⁷ Nje-ke u-Isaka wababuza wathi: “Kubayini nizongibona? Angithi nina nangiphatha njengesitha benangiqotjha phakathi kwenu?”

²⁸ Baphendula bathi: “Awa mntanthu, kwembukile emehlwenethu bonyana uSomnini unawe, yeke sadlumbana sathi, ‘Kghani angeze senza isivumelwano sesifungo phakathi kwethu, iye, phakathi kwamaGerari nawe?’ Nje-ke sibawa ukwenza isivumelwano nawe

²⁹ bona ungasikhubazi njengombana nathi singazange khesikukhubaze, kodwana sakuphatha kuhle besakulisa wakhamba ngokuthula. Sifuna isivumelwanesi ngombana uSomnini ukubusisile.”

³⁰ U-Isaka wabahlabisa, bagoma bebasela.

³¹ Ngakusasa kwakhona ekuseni amadoda lawo enza isivumelwano sesifungo omunye komunye. Ngemva kwalapho u-Isaka wabatjhaphulula, bakhamba ngokuthula.

³² Khona mhlokho iinceku zaka-Isaka zafika zambikela ngomthombo eziwembileko, zathi: “Siwafumene amanzi!”

³³ Wathiya umthombo lowo bona yiTjhiba. Bekube kunamhlanje ibizo lomuzi lowo laziwa bonyana yiBheritjheba.

Abafazi baka-Esewu

³⁴ Kuthe u-Esewu naneminyaka ematjhumi amane, watjhada uJehudithi indodakazi kaBheri umRhithi noBhasemathi indodakazi ka-Eloni umRhithi.

³⁵ Abafazabo baphilisa u-Isaka banoRabega ipilo ebuhlungu.