UGENESISI 24 - IsiNdebele 2012 Translation

URabega uthathwa ngu-Isaka

¹ U-Abrahamu bese aluphele namalanga ayile. USomnini bekambusise ngeendlela zoke.

² Wathi encekwinakhe ekulu ebeyiphethe koke kwendlwakhe: “Beka isandla sakho ngaphasi kwenyongami,

³ kobana ngikufungise ngoSomnini uZimu wezulu nephasi, bona angekhe wathathela indodanami umfazi emadodakazini webantwini beKanana engihlala phakathi kwabo,

⁴ kodwana bona uzakuya enarheni yekhethu neenhlobeni zami ukuyokuthathela khona indodanami u-Isaka umfazi.”

⁵ Inceku yambuza yathi: “Alo, ngenzeni lokha umntazana loyo nange angabhala ukuza nami enarheni le? Kungabe kuzakufuneka bona ngithathe indodanakho ngiyibuyisele enarheni owavela kiyo na?”

⁶ U-Abrahamu wathi kiyo: “Qinisekisa bona awubuyiseli indodanami lapho.

⁷ USomnini uZimu wezulu owangikhupha emzini wakababa, enarheni yeenhlobo zami nowakhuluma nami wangithembisa ngesifungo wathi, ‘inarha le ngizayinikela eenzukulwaneni zakho’, nguye ozakuthumela ingilozi ikhambe phambi kwakho bona uphumelele ukuthathela indodanami umfazi lapho.

⁸ Nangabe intombi leyo ayikazimiseli ukuza nawe, khona angekhe ube nomlandu esifungweni samesi. Kwaphela nje ungalingi ubuyisele indodanami lapho.”

⁹ Ngokunjalo-ke inceku yabeka isandla sayo ngaphasi kwenyonga yekosayo, u-Abrahamu, yafunga isifungo mayelana nendaba leyo.

¹⁰ Inceku yathatha amakamela alitjhumi wekosayo yasuka yakhamba iphethe izipho ezihle ezibuya ekosinayo. Yanqomba e-Aramu-Naharayimu ekumumuzi wakaNarhori.

¹¹ Yafika yaguqisa amakamela hlanu komthombo ngaphandle komuzi lowo, belisele lithambeme ilanga, kusikhathi abafazi abaphuma ngaso ukuyokukha amanzi.

¹² Khonapho yathandaza yathi: “Somnini, Zimu wekosami u-Abrahamu, yiba nomusa ku-Abrahamu ikosami, ungenze ngihlangane nomuntu ofaneleko.

¹³ Nakhu ngijame esiyalwini lapha amadodakazi womuzi lo akhelela khona amanzi.

¹⁴ Akuthi nangithi kelinye lamatlawu, ‘Ngiyakurabhela, akhese wethule umjekakho ngisele’, lona-ke lithi, ‘Awa ungasela begodu ngizokuseza namakamelakho’ ngizakwazi-ke bonyana ngilo olikhethele incekwakho, u-Isaka. Lokho kuzakuba siboniso bona mbala uyenzele umusa ikosami.”

¹⁵ Kwathi ingakaqedi nokuthandaza, veliyani uRabega ngemzini abeke umjeka wamanzi emahlombe. Yena bekayindodakazi kaBhetuweli indodana kaMilika obegade amkaNarhori umnakwabo laka-Abrahamu.

¹⁶ Bekamntazana omuhle osajame ibele, ongakhange akhe ayanywe lisokana. Yena-ke wehlela ngesiyalwini, wazalisa umjekakhe ngamanzi, wakhuphuka.

¹⁷ Inceku ka-Abrahamu yagijima, yamhlangabeza yathi: “Ndodakazi, akhese ungiseze kancancani amanzi angemjekenakho lawo.”

¹⁸ URabega wathi: “Awa, ikosami ingasela.” Yeke wethula umjeka wayibambela, yasela.

¹⁹ Kuthe bona aqede ukuyiseza, wathi: “Namakamela wekosami ngizowakhelela abe aqede ukusela woke nje.”

²⁰ Warhaba wathululela amanzi ngapha kuselela ngakhona iimbandana, wagijimela ngemthonjeni, wanande akha amanzi bewawaseza woke amakamelayo.

²¹ Indoda leyo yathula, yamqala, ifuna ukubona nakube uSomnini uphelelise ikhambo layo namkha awa.

²² Kwathi bona amakamela aqede ukusela, indoda leyo yathatha incina legolide elifakwa epumulweni elinobudisi bamagremu angaba mahlanu nesiquntu kanye neenkhono zegolide ezinobudisi obumagremu alikhulu netjhumi.

²³ Yabese ithi: “Ngiyakurabhela akhese ungitjele, uyindodakazi kabani wena? Endlini kayihlo kungaba khona amalalo lapha singalala khona na?”

²⁴ Umntazana waphendula wathi: “Mina ngiyindodakazi kaBhetuweli umsa kaNarhori noMilika.”

²⁵ Wangezelela wathi: “Sineenhlanga nelusereni eyaneleko kanye nelawu lapha ningalala khona ebusuku.”

²⁶ Yeke indoda leyo yaguqa yahloma ihloko phasi phambi kwakaSomnini

²⁷ yathi: “Akadunyiswe uSomnini ongakhange atjhiye isisa nokwethembeka kwakhe ku-Abrahamu ikosami. Nakungimi, uSomnini uZimu ungirholele endleleni eya endlini yeenhlobo zekosami.”

²⁸ Umntazana wagijima wayokutjela unina nabodadwabo ngokwenzekileko.

²⁹ URabega begade anomfowabo uLabani. Yena-ke waphuma wagijimela endodeni leyo emthonjeni

³⁰ ngombana abone incina lepumulo neenkhono kudadwabo. Godu wezwa lokha uRebega nabatjela bona indoda leyo itheni. Yeke waphuma wagijimela kiyo, wayifunyana isajame emakamelenayo hlanu komthombo.

³¹ Wathi kiyo: “Muntu obusiswe nguSomnini, namba siye ekhaya. Kubayini ujame ngaphandlapha ngombana nakhu sengikulungiselele ekhaya bekunendawo yamakamelakho?”

³² Yeke indoda leyo yakhamba naye kwabo. Sebafikile uLabani wakhumula amakamela, wawanikela iinhlanga nelusereni. Wabuye walethela indoda leyo nabakhambisani bayo amanzi bona baqophe iinyawo zabo.

³³ Nje-ke kwabekwa ukudla phambi kwendoda leyo, kodwana yona yathi: “Awa, angekhe ngadla ngingakatjho into engiyizele lapha.” ULabani wathi: “Awa yeke, khuluma-ke.”

³⁴ Nje-ke yathi: “Mina ngiyinceku ka-Abrahamu.

³⁵ USomnini uZimu yabusisa ikosami khulu beyanjinga. Yayipha izimvu, iimbuzi, iinkomo, isiliva negolide, amakhoboka namakhobokakazi, amakamela nabodumbana.

³⁶ Umka kosami uSara, wabelethela ikosami indodana asele aluphele, yeke ikosami yanikela koke enakho endodaneni.

³⁷ Begodu ikosami yangifungisa ngesifungo yathi, ‘Ungakhe ungathathela indodanami umfazi emadodakazini weKanana okuyinarha engihlala kiyo.

³⁸ Kodwana khamba uye ebantwini bekhethu, ekorwenami, uyithathele umfazi khona indodanami.’

³⁹ Ngayibuza ikosami ngathi, ‘Alo, ngenzeni lokha umntazana loyo nange angabhala ukukhamba nami?’

⁴⁰ Yona yaphendula yathi, ‘USomnini engikhamba phambi kwakhe, uzokuthumelela ingilozi bona ikuphumelelise ekhambeni lakho ukuze ufunyanele indodanami umfazi ekorwenami nebantwini bekhethu.

⁴¹ Uzakutjhaphuluka esifungweni samesi kwaphela, ikani nje nawuye ebantwini bekhethu bakwalela naye. Ngaleyondlela wena uzabe utjhaphulukile esifungweni samesi.’

⁴² “Nje-ke kuthe bona ngifike emthonjeni namhlanje, ngathandaza ngathi, ‘Somnini, Zimu wekosami u-Abrahamu, ngiyakurabhela hle, phumelelisa ikhambo lami engize ngalo lapha.

⁴³ Nakhu uSomnini lapha ngijame khona hlanu kwanaku umthombo; nakwenzeka kuvela umntazana bona azokukha amanzi lapha bese ngimbawa bona angiseze amanzi kancancani ngemjekenakhe,

⁴⁴ nangabe uyavuma bonyana ngisele abe akhelele namakamelami amanzi, akube nguye loyo umntazana omkhethileko, Somnini, bona abe mfazi wendodana yekosami.’

⁴⁵ “Ngithe ngingakaqedi umthandazwami wesidu, veliyani uRabega nomjeka wamanzi awubeke emahlombakhe, bewehlela ngemthonjeni ukuyokhelela amanzi. Ngithe nangithi kuye, ‘Ndodakazi, akhese ungiseze amanzi.’

⁴⁶ Wethula msinyana umjeka emahlombakhe wathi, ‘Awa, yewusele kosami, namakamelakho ngizowaseza.’ Nje-ke ngasela bewaseza namakamelami.

⁴⁷ “Ngabese ngiyambuza-ke ngathi, ‘Uyindodakazi kabani?’ Wangiphendula wathi, ‘Mina ngiyindodakazi kaBhetuweli umsa kaNarhori noMilika.’ Yeke ngamfaka incina epumulwenakhe neenkhono emikhonwenakhe.

⁴⁸ Ngaguqa ngahloma ihloko phasi phambi kwakaSomnini. Ngadumisa uSomnini uZimu wekosami u-Abrahamu, yona eyanginqophisa endleleni ekungiyo ukuze ngizokuthathela indodana yekosami indodakazi yomnakwabo lekosami.

⁴⁹ Nje-ke nakube nizokutjengisa ukwethembeka neqiniso ekosinami njengeenhlobo, ngitjelani, nakhona nakube akuzukuba njalo, nitjho ukuze nami ngizibone bonyana ngiphuma ngayiphi.”

⁵⁰ ULabani noBhetuweli baphendula bathi: “Ndoda, indaba le ivela kuSomnini, yeke thina akukho esingakutjho kuwe.

⁵¹ NakunguRabega nangu yena; mthathe ukhambe naye abe mfazi wendodana yekosakho kanjengombana uSomnini akubonisile.”

⁵² Kuthe bona inceku yaka-Abrahamu izwe abakutjwileko, yahloma ihloko phasi phambi kwakaSomnini.

⁵³ Yakhupha amagugu welisiliva negolide nezinye izinto zokwembathwa yazipha uRabega. Yapha umnakwabo nonina izipho ezikhethekileko.

⁵⁴ Yeke inceku nabantu ebe banayo bagoma, basela, balala ubusukobo lapho. Kuthe nabavukako ekuseni yathi: “Ngibawa isiphande ngibuyele ekosinami.”

⁵⁵ Kodwana umfowabo kaRabega banonina bathi: “Akhese uvumele umntazana ahlalahlale nathi amalangana alitjhumi nje kwaphela, ngemva kwalokho angakhamba-ke.”

⁵⁶ Kodwana inceku yathi: “Awa hle, njengombana uSomnini uZimu asele aphumelelise ikhambo lami nje, masani ukungibambezela. Ngivumelani ngibone enganatjani ngibuyele ekosinami.”

⁵⁷ Bona bathi: “Yeke, asibize umntazana sizwe bona yena uthini.”

⁵⁸ Nje-ke bambiza uRabega bambuza bathi: “Uyathanda ukukhamba nomuntu lo na?” Yena waphendula wathi: “Iye, ngizakukhamba.”

⁵⁹ Nje-ke aboLabani balayelisa udadwabo uRabega nembelesakhe bona bakhambe nenceku yaka-Abrahamu kanye nabantu bakhe.

⁶⁰ Babusisa uRabega bathi: “Dadwethu, sengathi ungaba ngunina weenkulungwana ngeenkulungwana; kwangasuthi iinzukulwana zakho zingathumba amadorobho wamanabazo!”

⁶¹ Yeke uRabega neencekukazi zakhe babhinca bakhwela amakamelabo balandela indoda leyo. Kwaba njalo-ke ukukhamba kwenceku nayithatha uRabega sele igoduka.

⁶² Ngesikhatheso u-Isaka gade ahlala ngesewula yenarha emthonjeni we-Larhayi-Royi.

⁶³ Kwathi malanga ntambamba asaphumile bona abethwe mumoya emmangweni, wathi nakathi mehlo suka, qala, nako amakamela asiza.

⁶⁴ URabega naye wathi nakathi uyaqala, wabona u-Isaka. Yeke wahlika msinyana ekameleni

⁶⁵ bewabuza inceku yaka-Abrahamu wathi: “Ngubani umuntu loya okhamba emmangwenapha asiza kithi na?” Inceku yamphendula yathi: “Yikosami-ke leya.” Nje-ke uRabega wathatha isiyaya wazigubuzesa.

⁶⁶ Inceku yafese yadembela u-Isaka koke okwenzekileko.

⁶⁷ Nje-ke u-Isaka wangenisa uRabega ngetendeni lapha gade kuhlala khona unina uSara. Wamthatha waba mkakhe begodu wamthanda. Yeke watjhiriyeka ekutjhiyweni ngunina.