UGENESISI 23 - IsiNdebele 2012 Translation

Ukuhlongakala kwakaSara nokubulungwa kwakhe

¹ USara waphila iminyaka elikhulu namatjhumi amabili nalikhomba.

² Wahlongakalela eKhiriyathi-Araba okuyiRhebroni enarheni yeKanana. U-Abrahamu wangena ngetendeni lakaSara bona amhloboke abe amlilele.

³ Kuthe bona asikime hlanu kwesidumbu somkakhe wakhamba wayokukhuluma namaRhithi wathi:

⁴ “Ngisikhonzi nomqhamuka phakhathi kwenu, yeke ngithengiselani indawo yamazindla khona ngizakubulunga ohlongakeleko wami.”

⁵ AmaRhithi aphendula u-Abrahamu athi:

⁶ “Mhlonitjhwa, besithi akhese usilalele! Thina sikuthatha njengekosana enamandla kithapha. Ohlongakeleko wakho ungambulunga kinanyana ngiliphi lamazindla wethu elikhethwa nguwe. Akakho noyedwa wethu ongagodla izindla lakhe bona ubulunge ohlongakeleko wakho.”

⁷ Yeke u-Abrahamu wasikima, wahloma ihloko phasi phambi kwamaRhithi okubabantu bendawo leyo,

⁸ wathi kibo: “Nangabe niyavuma bona ngimbulunge ohlangakeleko wami lapha, nje-ke ngizweni bese ningirabhelela ku-Efroni umsa kaTsorhari

⁹ bona angithengisele irholo leMakaphela, ekungelakhe ngemaphethelweni wesimakhe. Mbaweni angithengisele lona ngenani elizeleko phambi kwenu, khona lizakuba yindawami yokubulungela.”

¹⁰ U-Efroni naye begade ahlezi namaRhithi. Waphendula u-Abrahamu phambi kwebandla kanye nomphakathi woke ogade usesangweni ledorobho, wathi:

¹¹ “Awa mhlonitjhwa, akhe ungilalele: Isimu leyo ngikuthengisela yona nerholo eliphakathi kwayo ngikuthengisela lona. Ngizakuthengisela phambi kwabantu bekhethwaba bona babe bofakazi. Zibulungele ohlongakeleko wakho khona.”

¹² Godu u-Abrahamu wahloma ihloko phasi phambi kwabantu bendawo,

¹³ wakhuluma ku-Efroni, boke abantu bendawo bamlalele, wathi: “Nangabe uzimisele mbala ukuyithengisa, ngiyakurabhela ngilalela: Ngizakukhokhela intengo yesimu le, yamukela inani layo ukuze ngibulunge ohlongakeleko wami.”

¹⁴ U-Efroni waphendula u-Abrahamu wathi:

¹⁵ “Bengithi umhlonitjhwa akhe angilalele: Indawo ebiza amakhilogremu amane nesiquntu wesiliva, bekuyini nje lokho phakathi kwami nawe? Yewuzibulungele ohlongakeleko wakho.”

¹⁶ U-Abrahamu wavuma okutjhiwo ngu-Efroni, wabe wamlinganisela ubudisi benani alibizileko phambi kwamaRhithi. Kwaba lisiliva elimakhilogremu amane nesiquntu ukuya ngobunjalo besiliva elalamukelwa barhwebi.

¹⁷ Ngokunjalo-ke isimu ka-Efroni ebegade iseMakaphela eduze neMamre, irholo kanye nemithi yoke esemikhawulweni yendawo leyo, kwadluliselwa

¹⁸ ku-Abrahamu njengepahlakhe. Lokhu kwenziwa phambi kwamaRhithi woke abegade eze esangweni ledorobho lekhabo ka-Efroni.

¹⁹ Ngemva kwalokhu u-Abrahamu wabulunga umkakhe uSara erholweni lesimu yeMakaphela engepumalanga yeMamre endaweni yeRhebroni enarheni yeKanana.

²⁰ Nje-ke isimu kanye nerholo elabe likiyo kwadluliselwa maRhithi ku-Abrahamu njengepahlakhe bona kube yindawo yokubulungela.