UGENESISI 22 - IsiNdebele 2012 Translation

Ukuzizinywa kwaka-Abrahamu

¹ Emva kwesikhathi esithize uZimu wazizinya u-Abrahamu. Wambiza wathi: “Abrahamu!” U-Abrahamu wasabela wathi: “Somnini, ngilapha.”

² Nje-ke uZimu wathi: “Thatha indodanakho ekukuphela kwayo leyo noyithandako u-Isaka, ukhambe nayo uye endaweni yeMoriya. Ufike lapho uyenze isihlabelo phezu kwenye yeentaba engizakutjengisa yona.”

³ Kwathi ekuseni ngakusasa, wavuka wabophela udumbanakhe. Kuthe sele abande iinkuni zomhlabelo, wathatha iinceku ezimbili nendodanakhe u-Isaka, wakhamba waya endaweni uZimu amlayele yona.

⁴ Elangeni lesithathu u-Abrahamu waphakamisa amehlo, wayibonela kude indawo leyo.

⁵ Nje-ke wathi eencekwini zakhe: “Salani lapha nodumbana, mina nomsana lo sisaya phetjheyapha. Sisayokulotjha khona, sizakubuya godu kinapha.”

⁶ U-Abrahamu wathwesa u-Isaka iinkuni zomhlabelo, yena-ke waphatha umukhwa namalahle avuthako. Bakhamba bobabili njalo.

⁷ U-Isaka wabiza uyise wathi: “Baba!” U-Abrahamu wasabela wathi: “Iye ndodanami!” U-Isaka wathi: “Amalahle avuthako neenkuni nanzi sinazo; alo, imvana yomhlabelo yona iphi?”

⁸ U-Abrahamu waphendula wathi: “Ndodanami, uZimu uzazibonela yena imvana yomhlabelo.” Bakhamba bobabili njalo.

⁹ Kwathi bona bafike endaweni lapho uZimu abalayele khona, u-Abrahamu wakha i-aldari, wabeka neenkuni phezu kwalo. Wabopha indodanakhe u-Isaka izandla neenyawo, wayilalisa e-aldarini phezu kweenkuni.

¹⁰ Welula isandla wathatha umukhwa bona aqunte indodanakhe intamo.

¹¹ Kodwana ingilozi kaSomnini yamrhuwelela isezulwini yathi: “Abrahamu! Abrahamu!” Waphendula wathi: “Somnini, ngilapha!”

¹² USomnini wathi: “Ungabeki isandla sakho phezu komsana! Ungasamenzi litho! Nje-ke sengiyazi bona uyamesaba uZimu ngombana ungakhange ungigodlele indodanakho okukuphela kwayo.”

¹³ U-Abrahamu wathi nakaphakamisa amehlo wabona iqama ngemva kwakhe libanjwe ngeempondo emthini ositjhutha. Waya walithatha wenza umhlabelo wokutjhiswa esikhundleni sendodanakhe.

¹⁴ U-Abrahamu wathiya indawo leyo ibizo elithi: “Mbala uSomnini wabonelela.” Njengombana kusatjhiwo nanamhlanjesi kuthiwa: “Entabeni kaSomnini, kuzakubonelelwa.”

¹⁵ Ingilozi kaSomnini yarhuwelela u-Abrahamu kwesibili isezulwini

¹⁶ yathi: “Ngizifunga ngokwami, kutjho mina uSomnini, njengombana ukwenzile lokhu, wangagodla indodanakho, iye ekukuphela kwayo,

¹⁷ ngiqinisile ngizokubusisa ngenze iinzukulwana zakho zibe njengeenkwekwezi emkayini nanjengetjhwabatjhwaba magegana nelwandle. Iinzukulwana zakho zizakuthumba amadorobho wezitha zazo.

¹⁸ Zoke iinkoro zephasi zikhanukele ukubusiswa njengeenzukulwana zakho ngombana ulalele ilizwi lami.”

¹⁹ Nje-ke u-Abrahamu wabuyela eencekwini zakhe, bakhamba babuyela eBheritjheba, lapha u-Abrahamu anzinza khona.

Amadodana kaNarhori

²⁰ Isikhatjhana ngemva kwalokho kwabikwa ku-Abrahamu bona uMilika umkaNarhori umfowabo naye ubelethe amadodana.

^21-23 Wona ngu-Utsi izibulo, uBhuzi umntanabo, uKhemuyeli, uKesedi, uRhazo, uPilidatjhi, uYidilafu noBhetuweli. UMilika wabelethela uNarhori umfowabo ka-Abrahamu abantwana ababunanabo. UKhemuyeli waba nguyise laka-Aramu. UBhetuweli waba nguyise lakaRabega.

²⁴ URewuma umngena wakaNarhori naye waba namadodana, wona bekunguThebarha, uGarhamu, uTarhatjhi noMaka.