UGENESISI 21 - IsiNdebele 2012 Translation

Ukubelethwa kwaka-Isaka

¹ USomnini watjheja uSara, wenza kuye njengombana athembisa.

² U-Abrahamu gade sele aluphele, uSara waba sidisi, wambelethela indodana ngesikhathi uZimu athi izakubelethwa ngaso.

³ U-Abrahamu wathiya umsanakhe ambelethelwa nguSara loyo bona ngu-Isaka.

⁴ Wasoka u-Isaka, umsanakhe, lokha nakanamalanga abunane njengombana uZimu gade amyalile.

⁵ U-Abrahamu besele aneminyaka elikhulu lokha nakabelethelwa u-Isaka, umsanakhe.

⁶ USara wathi: “UZimu ungilethele isihleko; woke okuzwako lokhu uzokuhleka nami.”

⁷ Godu wathi: “Ngubani obekangatjho ku-Abrahamu bona uSara angabe asamunyisa na? Nokho ngimbelethele indodana asele aluphele.”

⁸ Umntwana wakhula. Kwathi mhlana alunyulwako, u-Abrahamu wenza umnyanya omkhulu.

⁹ USara wabona u-Itjhimayeli owabelethelwa u-Abrahamu nguHagari umGibhide, ahleka ngokukokomeja.

¹⁰ Wathi ku-Abrahamu: “Qotjha ikhobokakazeli kanye nendodanalo ngombana indodana yekhobokakazeli akukafuzi bona idle ilifa nendodanami, u-Isaka.”

¹¹ Lokhu kwamtshwenya u-Abrahamu ngombana u-Itjhimayeli naye bekuyindodanakhe.

¹² Kodwana uZimu wathi ku-Abrahamu: “Ungatshwenyeki ngomsana nekhobokakazi lakho. Yenza koke uSara akutjela khona ngombana iinzukulwana zakho zizokuthiyelelwa ngo-Isaka.

¹³ Begodu ngizakwenza nendodana yekhobokakazi bona ibe sisizwe esikhulu ngombana nayo iziingazi zakho.”

¹⁴ Kwathi ekuseni ngelanga elilandelako, u-Abrahamu wathatha isikwa nesikhumba samanzi wakubeka emahlombe kaHagari. Yeke wathi akakhambe nomntwana. Wakhamba-ke uHagari kodwana walahleka erhalawumbeni leBheritjheba.

¹⁵ Kwathi bona amanzi aphele ngesikhumbeni, uHagari watjhiya umntwana ngaphasi komutjhana.

¹⁶ Wakhamba wayozihlalela kudanyana naye ibanga elingaba mujikijelo womsebe ngombana wadlumbana wathi: “Angifuni ukubona umntwana nakahlongakalako.” Kwathi asahlezi lapho, wakhihla isililo.

¹⁷ UZimu wezwa umsana abubula, yeke ingilozi yakaZimu yarhuwelela uHagari isezulwini yathi kuye: “Kwenzenjani ngawe wena Hagari? Ungasabi ngombana uZimu uzwile ukububula komsana lapha alele khona.

¹⁸ Sikima! Khamba usikimise umsana, umbambe ngesandla umqinise ngombana mina ngizomenza abe sisizwe esikhulu.”

¹⁹ Yeke uZimu wavula amehlwakhe, wabona umthombo wamanzi. Waya wazalisa isikhumba bewaseza nomsana.

²⁰ UZimu gade anomsana loyo, yeke wakhula kuhle erhalawumbeni. Waba ngusomsebe

²¹ ahlala erhalawumbeni leParana. Unina wamthathela umfazi eGibhide.

Isivumelwano saka-Abrahamu no-Abimeleki eBheritjheba

²² Kwathi ngesikhatheso u-Abimeleki nendunakhe emphathi webutho uPhikoli, waya ku-Abrahamu wafese wathi: “Mbala uZimu unawe kikho koke okwenzako ndoda.

²³ Nje-ke funga kimapha ngoZimu bona angekhe ube mkhohlisi kimi, ebantwaneni neenzukulwaneni zami. Njengombana bengithembekile kuwe, nawe thembeka kimi nenarheni okhonze kiyo.”

²⁴ U-Abrahamu wathi uzakufunga,

²⁵ kodwana wakhalala ku-Abimeleki ngomthombo wamanzi obugade uthunjwe ziinsebenzi zaka-Abimeleki.

²⁶ U-Abimeleki wathi: “Angazi bona ngubani owenze lokhu. Nawe akhange ungitjele ngendaba le, yeke nami ngiyitjhwama namhlanjesi nje.”

²⁷ U-Abrahamu wathatha izimvu, iimbuzi neenkomo wazinikela u-Abimeleki. Yeke amadoda amabili lawo enza isivumelwano.

²⁸ Kodwana u-Abrahamu wagodla iimvana ezisikazi ezilikhomba kilezo azinikele u-Abimeleki.

²⁹ Khonapho u-Abimeleki wambuza wathi: “Sitjho ukuthini isenzo sakhwesi, sokobana ugodle iimvana ezisikazi ezilikhomba na?”

³⁰ U-Abrahamu waphendula wathi: “Nawamukela iimvana ezilikhombezi, khona-ke uzakuba ngufakazami bonyana ngimi owemba umthombo lo.”

³¹ Yeke, indawo leyo yathiywa ibizo bona yiBheritjheba ngombana kwaba kulapha amadoda amabili la enza khona isifungo.

³² Kwathi emva kokobana sebasenzile isivumelwaneso eBheritjheba, u-Abimeleki noPhikoli induna yebutho babuyela enarheni yamaFilista.

³³ Yeke u-Abrahamu watjala umuthi womtamariski eBheritjheba, bewalotjha uSomnini uZimu onguSiphelani khonapho.

³⁴ U-Abrahamu wahlala enarheni yamaFilista isikhathi eside.