UGENESISI 20 - IsiNdebele 2012 Translation

U-Abrahamu no-Abimeleki

¹ U-Abrahamu wafuduka eMamre waya esewula yeKanana wafese wahlala hlangana neKadetjhi neTjhuri. Lokha nasese sikhonzi eGerari

² wabiza uSara ongumkakhe bona ngudadwabo. Yeke u-Abimeleki, ikosi yeGerari, yathumela iinceku zayo bona ziyokuthatha uSara abe mkayo.

³ Kodwana ebusuku uZimu wabonakala ku-Abimeleki ngebhudango wathi: “Ufile wena ngebanga lomfazi omthetheko ngombana umfazi lo ungowenye indoda.”

⁴ U-Abimeleki bekangakamnamathi, yeke wathi: “Somnini, alo uzakuhlunguphaza abantu abanganamlandu na?

⁵ Angithi ngu-Abrahamu othe kimi uSara ngudadwabo. Naye uSara loyo uthe iye, u-Abrahamu mnakwabo. Nje-ke ngenze lokhu ngesazelo esimsulwa nezandla zami zimhlophe.”

⁶ Yeke uZimu wamphendula ebhudangweni wathi: “Iye, ngiyazi bona ukwenze lokhu ngesazelo esimsulwa. Ngimi okulondileko bona ungenzi isono kimi, ngikho ngingakhange ngikuvumele bona umnamathe.

⁷ Nje-ke buyisela umfazi endodenakhe ngombana imuphorofidi begodu izakuthandazela bona uphile. Kodwana nawungambuyiseliko angikutjeli, ngiyakuhlebela uzokufa wena kanye nakho koke kwakho.”

⁸ Kwathi ekuseni ngakusasa u-Abimeleki wabiza iimphathimandla zakhe, kuthe bona azitjele koke okwenzekileko, zethuka kokwethuka.

⁹ Yeke u-Abimeleki wabiza u-Abrahamu wambuza wathi: “Yintobani osenze yona le? Ngikwenzeni into embi kangaka bona ungabeze ungibangele isonokazi esingaka nombuswami? Uyazi ungenze into engenziwako.”

¹⁰ Wangezelela wathi: “Ubangelwe yini bona wenze into enje?”

¹¹ U-Abrahamu waphendula wathi: “Bengizitjela bona akukho nakanye ukwesaba uZimu endaweni le, nje-ke ngadlumbana bona abantu balapha bazangibulala ngenca yomkami lo.

¹² Yena mkami, kodwana eqinisweni ungudadwethu, sibantwana bendoda yinye, sahlukene ngabomma.

¹³ Nje-ke kwathi uZimu nangenze bona ngizulazule kude nobuphephelo bendlu kababa, ngathi kuye, ‘Nasi indlela ongabonakalisa ngayo ukwethembeka kimi, nanyana kukuphi lapha siya khona: Batjele bona ngingumnakwenu.’ ”

¹⁴ U-Abimeleki wathatha izimvu, iimbuzi neenkomo kanye namakhoboka namakhobokakazi, wanikela u-Abrahamu lokha nakabuyisela uSara umkakhe kuye.

¹⁵ Wathi ku-Abrahamu: “Inarhami inabile, hlala nanyana kukuphi lapha uthanda khona.”

¹⁶ KuSara wathi: “Nginikele umnakwenu amakhilogremu alitjhumi nanye nesiquntu wesiliva. Lokhu kulitshwayo lobumsulwa bakho phambi kwabo boke abanawe kanye nabanye abantu.” Ngalokho uSara wahlanjululwa.

¹⁷ U-Abrahamu wathandaza kuZimu. UZimu waphilisa u-Abimeleki, umkakhe kanye namakhobokakazi ukuze kukghoneke ukuba nabantwana godu.

¹⁸ Iye, uSomnini bekavale yoke imbeleko yabantu bengubo esigodlweni saka-Abimeleki ngenca kaSara umka Abrahamu.