UGENESISI 2 - IsiNdebele 2012 Translation

¹ Yeke kwapheleliswa izulu nephasi kanye nendalo yoke.

² Ngelanga lekhomba uZimu gade asele aqedile umsebenzakhe. Ngelanga lekhomba waphumula kiwo woke umsebenzakhe.

³ Yeke uZimu wabusisa ilanga lekhomba bewalicwengisa ngombana kwaba lilanga aphumula ngalo kiwo woke umsebenzi wokudala.

Isivande se-Edeni

⁴ Nasi indaba yezulu nephasi: Lokha uSomnini uZimu nakenza iphasi nezulu,

⁵ bekunganamsesana emmangweni begodu kunganasimila esele similile ehlabathini ngombana uSomnini uZimu gade angakanisi izulu ephasini. Begodu gade kunganamuntu ongalima ihlabathi.

⁶ Kodwana kwenyuka ikungu phasi yaswakamisa ihlabathi.

⁷ Yeke uSomnini uZimu wabumba umuntu ngethuli lehlabathi, waphefumulela eempumulweni zakhe umphefumulo wokuphila. Ngaleyondlela umuntu waba nokuphila.

⁸ USomnini uZimu gade ahlome isivande e-Edeni ngepumalanga; wathatha umuntu agade ambumbile wambeka lapho.

⁹ Yeke uSomnini uZimu wamilisa yoke imihlobo yemithi eganukejako nelungele ukudliwa. Kwathi phakathi kwesivandeso wamilisa umuthi wokuphila nomuthi wokwazi koke.

¹⁰ Kwavinyilika umlambo e-Edeni wathelelela isivande; ukusukela lapho umlambo lo wahlukana waba maphakgha amane.

¹¹ Ibizo lephakgha lokuthoma yiPitjhoni; lona ligeleza libhoduluke inarha yeRhavila lapha kunegolide khona.

¹² Igolide lenarha leyo lihle khulu kunoburegu obunuka kamnandi nelitje le-oniksi.

¹³ Ibizo lephakgha lesibili yiGirhoni; lona ligeleza libhoduluke yoke inarha yeKutjhe.

¹⁴ Ibizo lephakgha lesithathu yiThigrisi; lona ligeleza magegana nepumalanga ye-Asiriya. Bese kuthi lesine kube yiYufrathe.

¹⁵ Kwathi lokha uSomnini uZimu nathatha umuntu ambeka esivandeni se-Edeni bona asisebenze abe asitjheje,

¹⁶ wamyala wathi: “Ungazidlela ngokuthanda kwakho nanyana ngimuphi umuthi osesivandeni,

¹⁷ kodwana ungawudli umuthi wokwazi koke ngombana mhlana uwudlako uzokufa kokufa.”

¹⁸ USomnini uZimu wathi: “Akusikuhle bona umuntu ahlale yedwa. Yeke ngizomenzela umsizi omfaneleko.”

¹⁹ Nje-ke uSomnini uZimu wabumba ngehlabathi zoke iinlwana zommango neenyoni zoke zomkayi. Waziletha emuntwini ukuze abone bonyana uzithiya amabizo athini. Lokho umuntu agade azakuthiya isilwana ngakho, bekuzakuba libizo laso.

²⁰ Yeke umuntu wathiya yoke ifuyo, zoke iinyoni zomkayi neenlwana zoke zommango amabizo. Kodwana umuntu akhange azifunyanele umsizi omfaneleko kizo.

²¹ Nje-ke uSomnini uZimu wenza umuntu bona alale ubuthongo obukhulu. Kwathi asalele njalo, uZimu wakhupha linye leembambo zomuntu wabese uvala itjhubelo ngenyama.

²² Yeke uSomnini uZimu wabumba umuntu wengubo ngembambo ayithatha emuntwini wembaji, wamthatha wamusa emuntwini wembaji loyo.

²³ Umuntu wembaji wathi: “Lo, lithambo lamathambami nenyama yenyamami! Uzakubizwa bona mfazi ngombana uthethwe endodeni.”

²⁴ Ngebangeli indoda izakutjhiya uyise nonina inamathele emfazinayo bese baba nyamanye.

²⁵ Bobabili, indoda nomfazayo gade bahlubule nokho bangananhloni ngalokho.