UGENESISI 19 - IsiNdebele 2012 Translation

Ukubhujiswa kweSodoma neGomora

¹ Iingilozi ezimbili zafika eSodoma khona mhlokho ntambama, uLothi begade ahlezi esangweni ledorobho. Kuthe nakazibonako wasikima wayozihlangabeza wafese waguqa phambi kwazo wahloma ihloko phasi.

² Wathi kizo: “Bahlonitjhwa, ngiyarabhela hle, phambukelani endlini yencekwenu niqophe iinyawo zenu nilale ubusukobu. Seningavuka ekuseni ningene indlelenu.” Kodwana zaphendula zathi: “Awa, ungatshwenyeki, nokho besingase silale ecabazinapha.”

³ ULothi wasoloko azitomatomela bezaphambukela ngakwakhe. Yeke wazilungiselela okugonywako ngokuzibhagela isikwa esinganangumelo, zagoma.

⁴ Kwathi iinthekeli zingakayi ukuyolala, kwafika woke amadoda weSodoma ngokungasakhethi, kungamakhulu namancani, aphuma iindawo ngeendawo, abungelela indlu kaLothi.

⁵ Abiza uLothi, ambuza athi: “Aphi amadoda aphambukele kwakho lawo, entambama nje? Sikhuphele wona, sifuna ukuwalala!”

⁶ ULothi waphuma ngendlini wavala umnyango,

⁷ wathi kiwo: “Bomngani ngiyanirabhela hle, ningenzi ubuhlola obunje!

⁸ Qalani lapha, nginabantazana ababili abasese matlawana. Ngizanikhuphela bona, nje-ke ningenza intando yenu ngabo. Kodwana ningenzi litho ngabantwaba ngombana bangaphasi kwephahla lendlwami.”

⁹ Kodwana amadoda weSodoma athi: “Suka lapha wena.” Arhuwelela athi: “Umrhali lo weza lapha njengesikhonzi, khonanje sele afuna ukuzenza umgwebi! Nakunguwe sizakuhlolela ukudlula amadoda lawo!” Adudulela uLothi emnyango bona awufohloze.

¹⁰ Kodwana amadoda amabili ebegade angendlini, alalamela uLothi, amdosela kiwo ngaphakathi abe avala umnyango.

¹¹ Abetha woke amadoda wedorobho agade asemnyango lawo ngobuphofu bona angasazi ukuthi umnyango ungakuphi.

¹² Yeke amadoda amabili lawo athi kuLothi: “Kukhona abanye onabo lapha na? Unabakhwenyani, amadodana, amadodakazi nanyana ngiziphi iinhlobo zakho ngedorobhenapha na? Bakhuphe endaweni le,

¹³ ngombana sizoyibhubhisa. Sizwakele isililo kuSomnini ngabantu bedorobheli, yeke usithume bona sizolibhubhisa.”

¹⁴ Yeke uLothi waphuma wakhuluma nabakhwenyani bakhe ebe babone abantazana bakwakhe, wathi kibo: “Rhabani niphume lapha ngombana uSomnini sele abandamele ukuzolibhubhisa idorobheli.” Kodwana bathatha bonyana lihlaya.

¹⁵ Kwathi nakusako iingilozi zarhabisa uLothi zathi: “Yenza msinyana, thatha umkakho namadodakazakho amabili la nibaleke ukuze ningabhubhi ngebanga lezono zedorobheli!”

¹⁶ Kodwana uLothi wadidizela. Nje-ke amadoda lawo amdzwebula ngomkhono kanye nomkakhe namadodakazakhe amabili abakhuphela ngaphandle kwedorobho, bajama lapho. Lokhu kwenzeka ngombana uSomnini waba nezwelo kuLothi.

¹⁷ Kuthe bona abakhuphele ngaphandle kwedorobho enye yawo yathi: “Balekani, nisindise ipilwenu! Ningaqali emuva beningajami emrhobeni. Balekelani eentatjaneni, khona ningazukubhujiswa.”

¹⁸ Kodwana uLothi waphendula wathi: “Awa, kungakhe kungaba njalo Kosami, ngiyakurabhela.

¹⁹ Qala, incekwakho ifumene umusa omkhulu phambi kwakho begodu ungitjengise isirhawu esikhulu ngokusindisa ipilwami. Yeke angikwazi ukubalekela eentatjaneneziya ngombana ihlekelele le ingahle ingehlele ngife.

²⁰ Qala nakuya umuzi oseduze ngaphetjheya begodu mncani nabantu bakhona balidlanzana. Yeke ngivumela ngiphephele kiwo ukuze ipilwami isinde.”

²¹ Yona yathi: “Kulungile ngiyavuma, angekhe ngawubhubhisa umuzi owutjhoko lowo.

²² Kodwana rhaba ubalekele khona ngombana angikwazi ukwenza litho ungakafiki lapho.” (Kungebangelo umuzi lowo wabizwa bona iTsowari.)

²³ Lokha uLothi nakangena eTsowari, ilanga bese liphumile.

²⁴ Nje-ke uSomnini wanisa isibabuli esivuthako phezu kwedorobho leSodoma neGomora. Umlilo lowo bewehla uvela ezulwini.

²⁵ USomnini wawarhayila bunjalo-ke amadorobho lawo nemirhula yakhona yoke, boke abahlali bawo kanye neemila zoke zehlabathi.

²⁶ Kwathi lokha nakwenzeka lokhu, umkaLothi waqala emuva, yeke waphenduka isiduli setswayi.

²⁷ Ekuseni ngelanga elilandelako u-Abrahamu wavuka wabuyela endaweni lapha agade ajame khona phambi kwakaSomnini.

²⁸ Waqalela enzasi iSodoma neGomora, inarha nomrhoba woke. Wabona ilifu lentuthu lithunya liphuma ehlabathini njengentuthu yembawula.

²⁹ Lokha uZimu nakabhubhisa amadorobho womrhoba, lapha bekuhlala khona uLothi, wasindisa uLothi loyo ekubhujisweni. Ngokwenza njalo wakhumbula u-Abrahamu nakarhayila amadorobho lawo.

ULothi namadodakazakhe

³⁰ ULothi gade esaba ukuhlala eTsowari, yeke wakhuphuka wayokuhlala eentabeni, yena namadodakazakhe womabili. Bahlala ngerholweni bobathathu njalo.

³¹ Indodakazi ekulu yathi kumntanabo: “Ubaba selaluphele begodu ayikho enye indoda endaweni le esingalala nayo njengemvelo yabantu boke.

³² Yeke namba, sidakise ubaba ngewayini khona sizakghona ukulalana naye ukuze sizizuzele iinzukulwana ngobabethu lo.”

³³ Khona ngobusuku bamhlokho baseza uyisabo iwayini. Indodakazi ekulu yangena, yalalana noyise. Kodwana uyise akhange ezwe lokha indodakazi leyo nayilalako nalokha nayivukako.

³⁴ Ngelanga elilandelako indodakazi ekulu yathi kencani: “Ngilele nobaba izolo ebusuku. Nje-ke asimdakise godu nanamhlanjesi ebusuku bona nawe ulale naye ukuze sobabili sizizuzele iinzukulwana ngobabethu lo.”

³⁵ Iye, namhlokho baseza uyise iwayini godu, indodakazi encani yazilungiselela, yalalana noyise. Kodwana uyise akhange ezwe lokha indodakazi leyo nayilalako nalokha nayivukako.

³⁶ Ngokunjalo-ke womabili amadodakazi kaLothi aba sidisi ngemva kokulalana noyise.

³⁷ Indodakazi ekulu yabeletha indodana yayithiya ibizo lakaMowabi. Waba ngukhokho wamaMowabi wanamhlanje.

³⁸ Indodakazi encani nayo yabeletha indodana, yayithiya ibizo bona nguBhen-Ami. Yena-ke waba ngukhokho wama-Amoni wanamhlanje.