UGENESISI 18 - IsiNdebele 2012 Translation

UZimu uthekela u-Abrahamu noSara

¹ USomnini wabonakala ku-Abrahamu hlanu kwemithi yeMamre ahlezi phambi komnyango wetende lakhe nelanga libabula kusemini.

² Wavusa amehlo msinyazana wabona amadoda amathathu ajame kudanyana phambi kwakhe. Kwathi bona awabone wasuka emnyangweni wetende warhaba wawahlangabeza, waguqa wahloma ihloko phasi.

³ Wathi: “Bahlonitjhwa, nakube ngifunyene isisa emehlwenenu, bengithi ningadluli incekwenu ngendlela.

⁴ Akhe kulethwe amanzana niqophe iinyawo zenu, nizigedle ngaphasi komuthi.

⁵ Mina ngizaje nginifunyanela isiphaphatha ukuze nifunyane amandla amatjha. Kuzakuthi emva kwalokho nikwazi ukuragela phambili nekhambo lenu. Angithi ngilo ibanga elinenze nadlula kwamapha?” Wona aphendula athi: “Siyathokoza; siyakwamukela lokho.”

⁶ U-Abrahamu warhabela ngetendeni wathi kuSara: “Rhaba uthathe upumpana weflowuru esefiweko, uyibhice wenze iimphaphatha.”

⁷ U-Abrahamu wagijimela emhlambini weenkomo wafese wakhetha ikunzana ehle nenonileko wayinikela inceku yarhaba yayihlaba.

⁸ U-Abrahamu wathatha amakghamatha nebisi elihlaza kanye nenyama yekunzana ebe seyilungisiwe, wabeka ukudlokho phambi kwamadoda lawo. Wawatenda ngaphasi komuthapho, adla.

⁹ Wona ambuza athi: “Uphi umkakho uSara?” U-Abrahamu waphendula wathi: “Ukhona, ungetendeni.”

¹⁰ Enye yawo (okutjho uSomnini) yathi: “Ngiqinisile, umnyaka ozako ngesikhathesi ngizakubuya kuwe. USara umkakho uzabe sele anendodana.” USara walalela indaba leyo angetendeni ngemva komnyango.

¹¹ U-Abrahamu banoSara bebasele baluphele khulu, uSara bekangasayi esikhathini sakhe.

¹² Nje-ke uSara wahleka yedwa adlumbana athi: “Njengombana ngimdala ngiphelile nje, nomyenami naye selaluphele kangaka, uthi ngingabe ngisakitwakitwa yindoda na?”

¹³ Yeke uSomnini wabuza u-Abrahamu wathi: “USara uhlekeleni abe azibuze athi, ‘Kodwana kungenzeka ngibe nomntwana sele ngiluphele kangaka’?

¹⁴ Kungabe kukhona okungabhalela uSomnini na? Ngesikhathi esifaneleko, umnyaka ozako ngesikhathesi ngizakubuya begodu noSara uzabe sele anendodana.”

¹⁵ Ngebanga lokobana uSara gade asesaba, wakuphika lokho wathi: “Azange khengihleke mina.” Kodwana uSomnini wathi: “Hawu, Sara, uhlekile.”

U-Abrahamu urabhelela iSodoma

¹⁶ Amadoda lawo asikima akhuphuka bona ayokuqala iSodoma ngenzasi emrhobeni; u-Abrahamu wawaphekelela.

¹⁷ Yeke uSomnini wadlumbana wathi: “Ngingamfihlelelani u-Abrahamu lokho engizokwenza na?

¹⁸ Angithi vele uzokuba nguyise wesizwe esikhulu nesinamandla begodu neenkoro zoke zephasi zikhanukele ukubusiswa njengaye?

¹⁹ Iye, ngimkhethe bona ayale abantwabakhe neenzukulwana zakhe emva kwakhe bonyana babulunge iindlela zami ukuze benze okufaneleko nokulungileko. Khona-ke ngizakwenzela u-Abrahamu engimthembise khona.”

²⁰ Nje-ke uSomnini wathi ku-Abrahamu: “Isililo ngeSodoma neGomora sikhulu nesono sakhona sikhulu kangangobana

²¹ ngizokwehla bonyana ngiyokuhlola ukuthi ubukhohlakali beSodoma engibubonileko ngebabantu boke na? Nakungasinjalo ngizakwazi bona kufanele ngenzeni.”

²² Yeke amadoda amabili asuka anqopha ukuyela ngeSodoma, kodwana u-Abrahamu wasala ajame phambi kwakaSomnini.

²³ Kamva watjhidela kuSomnini wambuza wathi: “Ingabe kwamambala uSomnini uzokubhubhisa abalungileko kanye neenkhohlakali na?

²⁴ Nangabe kungaba khona abantu abamsulwa abamatjhumi amahlanu ngedorobheni, uSomnini uzalibhubhisa na? Angekhe uSomnini ababalele indawo ngebanga labamsulwa abangaphakathi kwayo na?

²⁵ Angiboni bona uSomnini angayenza into yokobana abhubhise abamsulwa kanye neenkhohlakali! Akukghoneki lokho! Umgwebi wephasi loke uzagweba ngokulungileko!”

²⁶ USomnini wathi: “Nakube ngingafumana abantu abamsulwa abamatjhumi amahlanu edorobheni leSodoma, ngizakusindisa yoke indawo ngenca yabo.”

²⁷ U-Abrahamu godu wathi: “Ngombana ngibe nesibindi sokukhuluma noSomnini, nanyana ngilithuli nomlotha nje, akhe ngibawe:

²⁸ Asithi mhlamunye abamsulwa bazakuba ngaphasana ngabahlanu ematjhumini amahlanu? Nalapho uSomnini uzokubhubhisa idorobho loke ngebanga labahlanu tle?” USomnini waphendula wathi: “Nangingafumana abantu abamatjhumi amane nabahlanu abamsulwa angekhe ngalibhubhisa.”

²⁹ U-Abrahamu godu wathi kuSomnini: “Alo, mhlamunye nakufunyaneka lapho abantu abamatjhumi amane kwaphela-ke?” USomnini wathi: “Angekhe ngabhubhisa idorobho nangabe kukhona amatjhumi amane.”

³⁰ U-Abrahamu wathi: “USomnini angangipheleli ihliziyo hle nangikhulumako godu. Alo, mhlamunye nakufunyaneka lapho abantu abamatjhumi amathathu kwaphela-ke?” USomnini waphendula wathi: “Angekhe ngabhubhisa idorobho nangabe kukhona abamatjhumi amathathu lapho.”

³¹ U-Abrahamu wathi: “Ngombana ngibe nesibindi sokukhuluma noSomnini akhe ngibawe: Asithi-ke mhlamunye kufunyanwe abamatjhumi amabili kwaphela?” USomnini waphendula wathi: “Ngebanga labamatjhumi amabilabo angekhe ngabhubhisa idorobho.”

³² U-Abrahamu wathi: “USomnini angangipheleli ihliziyo hle, nokho sengikhuluma kwamaphelelo. Alo, mhlamunye nakufunyaneka lapho abantu abalitjhumi kwaphela-ke?” USomnini wathi: “Ngebanga labalitjhumabo angekhe ngabhubhisa idorobho.”

³³ Kuthe bona uSomnini aqede ukukhuluma no-Abrahamu, wakhamba. U-Abrahamu naye wabuyela ekhaya.