UGENESISI 17 - IsiNdebele 2012 Translation

Isivumelwano sokusoka

¹ Kuthe u-Abramu naneminyaka ematjhumi alithoba nethoba, uSomnini wabonakala kuye wathi: “NginguZimu oSabekako, nawukhamba nami uzakuba msulwa.

² Isivumelwano engisijamisa phakathi kwami nawe kukuthi: Ngizakupha iinzukulwana ezinenginengi.”

³ Yeke u-Abramu wahloma ihloko phasi. UZimu godu wathi kuye:

⁴ “Isithembiso sami kuwe siqinile: Uzakuba nguyise wezizwe ezinengi.

⁵ Ibizo lakho angekhe lisaba ngu-Abramu, kodwana lizakuba ngu-Abrahamu ngombana ngizakwenza ube nguyise wezizwe ezinengi.

⁶ Ngizakupha imbeleko kangangobana kuwe kuzakuvela izizwe ngezizwe; iye, namakhosi azakuvela kuwe.

⁷ “Ngizakujamisa isivumelwano phakathi kwami nawe kanye neenzukulwana zakho ngokungapheliko. Kuzakuba sivumelwano sanini nanini: Ngibe nguZimakho noZimu weenzukulwana zakho emva kwakho.

⁸ Yoke inarha yeKanana okhonze kiyo le, ngizayipha wena neenzukulwana zakho eziza emva kwakho ibe lilifa lakho neenzukulwana zakho unomphela bengibe nguZimazo.”

⁹ UZimu wathi ku-Abrahamu: “Nawe-ke kufuze ulonde isivumelwano sami, iye, wena neenzukulwana zakho ezizako.

¹⁰ Nasi-ke isivumelwano sami okuzakufanela bona nisilonde wena neenzukulwana zakho eziza emva kwakho: Kufuze kusokwe woke omduna phakathi kwenu.

¹¹ Nizakusoka ijwabu lakhe, lokhu kube litshwayo lesivumelwano phakathi kwami nani.

¹² Eenzukulwaneni zakho ezizako, kuzakufanela bona nisoke woke omduna onamalanga abunane. Labo abangasizo iinzukulwana zakho, okutjho amakhoboka abelethelwe emzinakho namkha athengwe kebakosozizwe, nabo kufuze basokwe.

¹³ Iye, ababelethwe endlinakho namkha obathenge ngemalakho kufuze nakanjani basokwe. Nje-ke isivumelwanesi sizakuba litshwayo elisemzimbenenu nini nanini.

¹⁴ Woke omduna ongasokiko, okungakasuswa kuye ijwabu emzimbenakhe, akasuswe ebantwini bekhabo ngombana wephule isivumelwano sami.”

U-Abrahamu noSara bathenjiswa indodana

¹⁵ UZimu wathi ku-Abrahamu: “Ungasabizi umkakho bona nguSarayi; ukusukela namhlanjesi umbize bona nguSara.

¹⁶ Ngizambusisa, ngikuphe indodana ngaye. Iye, ngizambusisa bona abe ngunina wezizwe; amakhosi wezizwe azakuvela kuye.”

¹⁷ Yeke u-Abrahamu wahloma ihloko phasi kodwana wahleka ngombana wadlumbana wathi: “Ha! Indoda ibe nomntwana sele ineminyaka elikhulu? NoSara abe nomntwana asele aneminyaka ematjhumi alithoba?”

¹⁸ Nje-ke u-Abrahamu wathi kuZimu: “Kwanga u-Itjhimayeli angafunyana isisa eKosinami!”

¹⁹ Kodwana uZimu wathi: “Awa! Umkakho uSara uzakukubelethela indodana. Ithiye ibizo bona ngu-Isaka. Ngizakujamisa isivumelwano sami naye sibe ngesanini nanini, kanye neenzukulwaneni zakhe emva kwakhe.

²⁰ Ngisizwile isibawo sakho ngo-Itjhimayeli, nje-ke ngizambusisa ngimuphe abantwana abanengi bengimandise. Uzakubeletha amakhosana alitjhumi nambili, ngimenze isizwe esikhulu.

²¹ Kodwana ngizakuqinisa isivumelwano sami nendodanakho u-Isaka ozakubelethwa nguSara ngesikhathesi umnyaka ozako.”

²² Kuthe bona uZimu aqede ukukhuluma no-Abrahamu, wakhuphuka wamtjhiya.

Ukusokwa kwabantu baka-Abrahamu

²³ Khona mhlokho u-Abrahamu wenza njengombana uZimu atjhwile. Wasoka amajwabu wabo boke abaduna emzinakhe: indodanakhe u-Itjhimayeli namakhoboka woke abelethelwe emzinakhe nathengwe ngemalakhe.

²⁴ U-Abrahamu wasokwa aneminyaka ematjhumi alithoba nethoba,

²⁵ indodanakhe u-Itjhimayeli beyineminyaka elitjhumi namithathu ubudala nayisokako.

²⁶ Basokwa bobabili langa linye

²⁷ kanye nabo boke abaduna abagade basemzinakhe, ababelethelwe emzinakhe nabathengwe ngemali kebakosozizwe.