UGENESISI 16 - IsiNdebele 2012 Translation

Ukubelethwa kwaka-Itjhimayeli

¹ USarayi, umka-Abramu, azange akhe abelethe umntwana. Begade anekhobokakazi lomGibhide, libizwa bona nguHagari.

² Nje-ke uSarayi wathi ku-Abramu: “Uthi uyabona nje bona uZimu ungivale isibeletho na? Yeke yewungene ikhobokakazi lameli. Mhlamunye lona lingangivusela umndeni.” U-Abramu walalela umkakhe,

³ yeke uSarayi umka-Abramu wathatha uHagari olikhobokakazi lakhe lomGibhide walinikela ku-Abramu umyenakhe bona abe yisimakhe. Lokhu kwenzeka ngemva kokobana u-Abramu ahlezi eKanana iminyaka elitjhumi.

⁴ U-Abramu walala noHagari. UHagari wazithwala. Kuthe lokha nakabona bonyana uzithwele wanyaza uSarayi ikosikazi.

⁵ Yeke uSarayi wathi ku-Abramu: “Nguwe ongingeniselele amanzi ngomsele! Mina ngakunikela yena bona umeyame, kodwana soloko azibone bonyana uzithwele, uyanginyaza. Sengathi uSomnini angagweba phakathi kwami nawe.”

⁶ U-Abramu wamphendula wathi: “Usesenamandla kuye godu. Yeke yenza nanyana yini oyithandako ngaye.” Ngalokho uSarayi waphatha uHagari kumbi khulu, wabe wabaleka.

⁷ Ingilozi kaSomnini yafunyana uHagari hlanu komthombo oserhalawumbeni; lowo bekumthombo ongeqadi kwendlela eya eTjhuri.

⁸ Yathi kuye: “Hagari, khobokakazi lakaSarayi, ubuyaphi, nawulibangisephi?” Waphendula wathi: “Ngibalekela ikosikazi enguSarayi.”

⁹ Ingilozi kaSomnini yathi kuye: “Khamba ubuyele ekosikazini ekuphetheko, ufese uzithobe kiyo.”

¹⁰ Ingilozi kaSomnini yangezelela yathi: “Ngizokupha iinzukulwana ezinengi kangangobana angekhe kukghonakale bona zibalwe.”

¹¹ Godu ingilozi kaSomnini yathi: “Njengombana usidisi nje, uzakubeletha indodana uyithiye ibizo bona ngu-Itjhimayeli, ngombana uSomnini usizwile isililo sokurhubutjhwa kwakho.

¹² Indodana leyo izakuba njengodumbana wommango: Isandla sayo sizakujamelana naye woke umuntu, nesandla sabantu boke sijamelane nayo; izakuhlala iphehla inturhu kibo boke abafowayo.”

¹³ UHagari wathi: “Ingabe kuliqiniso bona ngibone umTjhejami lapha na?” Yeke wathiya uSomnini akhuluma naye ibizo wathi: “UnguZimu ongibonako.”

¹⁴ Ngikho umthombo wabizwa bona yiBheyeri-Larhayi-Royi. Umthombo lowo usese phakathi kweKhadetjhi neBeredi.

¹⁵ UHagari wabelethela u-Abramu indodana. Nje-ke u-Abramu wathiya indodanakhe leyo ayibelethelwa nguHagari ibizo bona ngu-Itjhimayeli.

¹⁶ U-Abramu gade aneminyaka ematjhumi abunane nantandathu lokha uHagari nakabeletha u-Itjhimayeli.