UGENESISI 15 - IsiNdebele 2012 Translation

USomnini uthembisa u-Abramu isizukulwana esikhulu

¹ Emva kwesikhathi esithileko ilizwi lakaSomnini lafika ku-Abramu ngesambulo lathi: “Ungesabi Abramu. Ngisihlangu sakho, nomvuzwakho uzaba mkhulu.”

² Kodwana u-Abramu wathi: “Somnini, Somandla, kusizani bona uSomnini angiphe umvuzo njengombana ngizakukhamba ngingakatjhiyi intonga ebandla nje begodu nendlalifa yendlwami angithi ngu-Eliyezeri weDamaseku?”

³ Godu wathi: “Iye, uSomnini akhange angiphe imbeleko; nje-ke inceku ebelethelwa emzinami izakuba yindlalifami.”

⁴ Yeke ilizwi lakaSomnini leza kuye lathi: “Indoda leyo angekhe ibe yindlalifakho, kodwana indodanakho yeengazi ngiyo ezakuba yindlalifakho.”

⁵ Ngalokho uSomnini wamthatha wamusa ngaphandle kwetende wathi kuye: “Qala phezulu emkayini, ubale iinkwekwezi nakube mbala ungakghona ukuzibala. Sizakuba njalo-ke isizukulwana sakho.”

⁶ U-Abramu wakholwa uSomnini. Yena wambalela bona uqotho.

UZimu wenza isivumelwano no-Abramu

⁷ UZimu wathi ku-Abramu: “NginguSomnini owakukhupha e-Uri lamaKasidi bona ngikuphe inarha le ibe ngeyakho.”

⁸ Kodwana u-Abramu wabuza wathi: “Somnini, Somandla, ngizakwazi ngani bona izakuba ngeyami?”

⁹ USomnini wamphendula wathi: “Ngilethela ithole, imbuzi neqama, zoke njalo kufuze zibe neminyaka emithathu ubudala begodu uzilethe nezuba nesagwayi.”

¹⁰ U-Abramu wakuletha koke lokho kuZimu. Wahlahlela iinlwana phakathi, walunganisa amahlangothazo. Kodwana iinyoni zona akhange azihlahlele phakathi.

¹¹ Amadlanga ehla bona adle inyama leyo, u-Abramu wawaqotjha.

¹² Yeke kuthe ilanga nalitjhingako wabanjwa buthongo obukhulu; khonapho wafikelwa kukwesaba ngombana gade kunzima tshu.

¹³ USomnini wathi kuye: “Yazi mbala bona iinzukulwana zakho zizakuba ziinkhonzi enarheni engasiyo yazo. Zizakulotjha abantu benarha leyo abazazigandelela iminyaka emakhulu amane.

¹⁴ Kodwana ngizakugweba isizwe esibagandelelekweso bekuthi nabaphumako enarheni leyo, baphume nefuyo enengi.

¹⁵ Wena ngokwakho uzakuhlongakala ngokuthula, ubulungwe sewuluphele khulu.

¹⁶ Kuzakuthi esizukulwaneni sesine, abantwabakho babuye godu lapha ngombana ngesikhatheso izono zama-Amori zizabe sele zifike esilinganisweni esipheleleko.”

¹⁷ Kuthe bona ilanga litjhinge sele kurhwalele, qala kwakhamba umtjhitjhi wentuthu nesihlothi esivuthako hlangana namahlangothi weenyama.

¹⁸ Khona mhlokho uSomnini wenza isivumelwano no-Abramu wathi: “Ngithembisa ukunikela iinzukulwana zakho inarha le kusukela emlanjeni weGibhide ukuyofika emlanjeni omkhulu, iYufrathe,

¹⁹ okutjho inarha yamaKheni, yamaKhenizi, yamaKhadimoni,

²⁰ yamaRhithi, yamaPerizi, yamaRefayi,

²¹ yama-Amori, yamaKanana, yamaGirigatjhi neyamaJebusi.”