UGENESISI 14 - IsiNdebele 2012 Translation

U-Abramu usindisa uLothi

¹ Kilesisikhathi u-Amrafeli ikosi yeTjhinari, u-Ariyoki ikosi ye-Elasari, uKedorolawomeri ikosi ye-Elamu noTidali ikosi yeGoyimu

² basahlela uBhera ikosi yeSodoma, uBhiritjha ikosi yeGomora, uTjhinabu ikosi ye-Adma, uTjhemebheri ikosi yeTseboyimu nekosi yeBhela okuyiTsowari.

³ Woke amakhosi lawo ahlangana aba libutho emrhobeni weSidimu okuliLwandle leTswayi namhlanje.

⁴ Amakhosi lawo gade aziinkhonzi zakaKedorolawomeri iminyaka elitjhumi nambili, kwathi emnyakeni wetjhumi nantathu amhlubuka.

⁵ Ngomnyaka wetjhumi nane, uKedorolawomeri namakhosi agade alibutho naye basahlela bebahlula amaRefayi ange-Atjhiterothi-Kharinayimu, amaZuzi ngeHamu, ama-Emi ngeTjhave-Khiriyatayimu

⁶ namaRhori eentatjaneni zenarha yeSeyiri ukuyela nge-Eli-Parana eduze kwerhalawumba.

⁷ Bajika babuyela emuva baya e-Eni-Mitjhipathi okuyiKhadetjhi, bahlula yoke imikhawulo yama-Amalekhi kanye nama-Amori agade ahlala ngeRhatsetsoni-Tamari.

⁸ Nje-ke ikosi yeSodoma yarhwanta yahlela ipi ngemrhobeni weSidimu isekelwe yikosi yeGomora, ye-Adma, yeTseboyimu neyeBhela okuyiTsowari.

⁹ Wona gade ajamelene noKedorolawomeri ikosi ye-Elamu, uTidali ikosi yeGoyimu, u-Amrafeli ikosi yeTjhinari no-Ariyoki ikosi ye-Elasari, kwaba makhosi amane ajamelene namahlanu.

¹⁰ Umrhoba weSidimu bewuzele amadonga lapha kwenjiwa khona isikontiri. Nje-ke kwathi lokha amakhosi weSodoma neGomora nakabalekako, amanye wamajonawo awela ngakiwo, amanye abalekela eentatjaneni.

¹¹ Amakhosi amane aphanga yoke ifuyo yeSodoma neGomora ngitjho kanye nokudla, akhamba.

¹² Godu bathatha noLothi umntakamfowabo laka-Abramu nefuywakhe ngombana gade ahlala eSodoma.

¹³ Owaphunyurhako weza wazokubikela u-Abramu omHebheru indaba leyo. Ngesikhatheso u-Abramu gade ahlala eduze kwemithi kaMamre umAmori omfowabo laka-Etjhikolo no-Aneri. Boke labo bebalijima no-Abramu.

¹⁴ Kuthe bona u-Abramu ezwe bonyana umntakamfowabo uthunjiwe, wahlomisa iinceku ezithembekileko ezazibelethelwe emzinakhe. Walandelela amakhosi lawo bekwaba seDani akhamba namadoda amakhulu amathathu netjhumi nobunane.

¹⁵ Kwathi phakathi kobusuku, u-Abramu wahlela iinceku zakhe ngeenqhema. Wasahlela amakhosi lawo, wawagijimisa ukufika eRhoba, etlhagwini yeDamaseku.

¹⁶ Wabuyisa yoke ifuyo kanye noLothi umntakamfowabo nefuywakhe sekufakwa hlangana abafazi nabanye abantu beSodoma.

¹⁷ Kuthe bona u-Abramu abuye ekuhluleni uKedorolawomeri namakhosi ajame naye, ikosi yeSodoma yaphuma bona imhlangabeze ngemrhobeni weTjhave okumrhoba wekosi.

¹⁸ UMalkitsedekhi ikosi yeSalema ogade amphristi kaZimu ongoPhezulu, wamlethela isikwa newayini.

¹⁹ Yena wabusisa u-Abramu wathi: “U-Abramu akabusiswe nguZimu ongoPhezulu uMdali wezulu nephasi.

²⁰ Akudunyiswe uZimu ongoPhezulu onikele izitha zakho esandleni sakho.” Yeke u-Abramu wamnikela kwetjhumi kwakho koke.

²¹ Ikosi yeSodoma yathi ku-Abramu: “Nginikela abantu bese wena uzigcinela ifuyo.”

²² Kodwana u-Abramu wathi ekosini yeSodoma: “Sengiphakamisele isandla sami kuSomnini uZimu ongoPhezulu, uMdali wezulu nephasi,

²³ ngafunga bonyana angisoze ngamukela litho okungelakho, ngitjho nanyana kungaba mumucwana namkha umtjana wamapatlagwana ukuze ungazibethi isifuba ngami uthi, ‘Nakungu-Abramu, unjingiswe ngimi.’

²⁴ Angifuni litho ngaphandle kwalokho okudliwe ziinceku kanye nesabelo ekungesamadoda akhamba nami okungu-Aneri, u-Etjhikolo noMamre. Labo-ke abafunyane isabelo sabo.”