UGENESISI 13 - IsiNdebele 2012 Translation

Ukuhlukana kwaka-Abramu noLothi

¹ Nje-ke u-Abramu wanyuka asuka eGibhide yena nomkakhe kanye nakho koke egade kungekwakhe wanqomba ngesewula yeKanana. ULothi naye wakhamba naye.

² U-Abramu wanjinga khulu ngefuyo, ngesiliva nangegolide.

³ Ukusuka ngesewula wakhamba iindawo ngeendawo ukuyela ngeBhethe-Eli, lapha itende lakhe belikhona phambilini phakathi kweBhethe-Eli ne-Ayi.

⁴ Endaweni lapha akha khona i-aldari phambilini wafese wathandaza uSomnini.

⁵ ULothi ogade asoloko agega no-Abramu, naye gade anezimvu, iimbuzi, iinkomo namatende.

⁶ Inarha akhange isabanela bona bangahlala bobabili. Bebanefuyo enengi sele kungasakghoneki bona ingakarula ndawonye.

⁷ Nje-ke kwavela ukurhitjhana phakathi kwabelusi baka-Abramu nebakaLothi. Ngesikhatheso amaKanana namaPerizi nawo gade asahlala enarhenapho.

⁸ Yeke u-Abramu wathi kuLothi: “Akungabi khona ukurhitjhana phakathi kwami nawe namkha phakathi kwabelusi bami nebakho ngombana thina sibomfo.

⁹ Yeke kungcono sihlukane mfo. Ummango unabile. Wena nawukhetha ihlangothi langetlhagwini, mina ngizakuthatha langesewula. Nawukhetha ihlangothi langesewula, mina ngizakuthatha langetlhagwini.”

¹⁰ Kodwana uLothi waphakamisela amehlo ngepumalanga, wabona umrhoba weJordani bona uswakamile. Ngaphambi kobana uSomnini atjhabalalise iSodoma neGomora umrhoba weJordani nca ngeTsowari bewunjengesivande sakaZimu nanjengenarha yeGibhide.

¹¹ Yeke uLothi wazikhethela woke umrhoba weJordani. Wanqomba ngepumalanga. Bahlukana njalo-ke abafo laba:

¹² U-Abramu wahlala enarheni yeKanana, uLothi wayokuhlala emrhobeni weJordani. Wahloma amatendakhe hlanu kwamadorobho ukuyela ngeSodoma.

¹³ Abantu beSodoma bebakhohlakele begodu bebasona khulu kuSomnini.

¹⁴ UZimu wakhuluma no-Abramu emva kobana uLothi ahlukene naye wathi: “Phakamisa amehlwakho lapho ukhonapho uqale ngetlhagwini nesewula, epumalanga netjingalanga,

¹⁵ ngombana yoke inarha oyibonako le ngikunikela yona wena neenzukulwana zakho nini nanini.

¹⁶ Ngizakwenza isizukulwana sakho sibe ngangethuli lehlabathi ukuze kuthi nange kungaba nomuntu obala ithuli lehlabathi, khona-ke neenzukulwana zakho zingabaleka.

¹⁷ Yeke sikima, udabule inarha ubude nobubanzi bayo ngombana ngiyinikela wena.”

¹⁸ Nje-ke u-Abramu wathutha amatendakhe wayokuhlala eduze nemithi yeMamre eRhebroni, lapha akhela khona uSomnini i-aldari.