UGENESISI 11 - IsiNdebele 2012 Translation

Umbhotjhongo weBhabheli

¹ Iphasi loke belinelimi linye nekulumo yinye.

² Kwathi lokha abantu nabakhambakhamba ngepumalanga, bafunyana ibala enarheni yeTjhinari, banzinza lapho.

³ Bathi omunye komunye: “Yizani senzeni iintina sizibhage ziqine.” Basebenzisa iintina esikhundleni samatje, isikontiri esikhundleni sedaka.

⁴ Bathi: “Yizani sizakhele idorobho libe nombhotjhongo ophakamela ezulwini. Lokhu kuzasenzela ibizo begodu singasabalali nephasi loke.”

⁵ Nje-ke uSomnini wehla bonyana azokubona idorobho nombhotjhongo ogade wakhiwa babantu.

⁶ USomnini wathi: “Akhese nithi niyaqala, abantwaba bamunye begodu boke bakhuluma limi linye. Yeke bazakghona ukwenza nanyana yini abayitlamako.

⁷ Nambani sehleni, sifese siraranise ilimi labo ukuze bangasakwazi ukuzwana nabakhulumisanako.”

⁸ Ukusuka lapho uSomnini wabasabalalisa iphasi loke, bebalisa ukwakha idorobho.

⁹ Kungebangelo libizwa bona yiBhabheli ngombana lapho uSomnini wararanisa ilimi labantu boke begodu ukusuka lapho wabasabalalisa iphasi loke.

Iinzukulwana zakaTjhemu

¹⁰ Naku-ke umlando weenzukulwana zakaTjhemu: Iminyaka emibili emva komthwalela, lokha uTjhemu nakaneminyaka elikhulu ubudala, wabeletha u-Aripakitjhadi.

¹¹ Emva kobana abelethe u-Aripakitjhadi, uTjhemu waphila iminyaka emakhulu amahlanu. Wabeletha amanye amadodana namadodakazi.

¹² Kuthe lokha u-Aripakitjhadi naneminyaka ematjhumi amathathu namihlanu wabeletha uTjhelarhi.

¹³ Emva kobana abelethe uTjhelarhi, u-Aripakitjhadi waphila iminyaka emakhulu amane nantathu. Wabeletha amanye amadodana namadodakazi.

¹⁴ Kuthe lokha uTjhelarhi naneminyaka ematjhumi amathathu wabeletha u-Ebhere.

¹⁵ Emva kobana abelethe u-Ebhere, uTjhelarhi waphila iminyaka emakhululu amane namithathu. Wabeletha amanye amadodana namadodakazi.

¹⁶ Kuthe lokha u-Ebhere naneminyaka ematjhumi amathathu nane wabeletha uPelegi.

¹⁷ Emva kobana abelethe uPelegi, u-Ebhere waphila iminyaka emakhulu amane namatjhumi amathathu. Wabeletha amanye amadodana namadodakazi.

¹⁸ Kuthe lokha uPelegi naneminyaka ematjhumi amathathu wabeletha uRewu.

¹⁹ Emva kobana abelethe uRewu, uPelegi waphila iminyaka emakhulu amabili nethoba. Wabeletha amanye amadodana namadodakazi.

²⁰ Kuthe lokha uRewu naneminyaka ematjhumi amathathu nambili wabeletha uSerugu.

²¹ Emva kobana abelethe uSerugu, uRewu waphila iminyaka emakhulu amabili namikhomba. Wabeletha amanye amadodana namadodakazi.

²² Kuthe lokha uSerugu naneminyaka ematjhumi amathathu wabeletha uNarhori.

²³ Emva kobana abelethe uNarhori, uSerugu waphila iminyaka emakhulu amabili. Wabeletha amanye amadodana namadodakazi.

²⁴ Kuthe lokha uNarhori naneminyaka ematjhumi amabili nethoba wabeletha uTerarhi.

²⁵ Emva kobana abelethe uTerarhi, uNarhori waphila iminyaka elikhulu netjhumi nethoba. Wabeletha amanye amadodana namadodakazi.

²⁶ Kuthe lokha uTerarhi naneminyaka ematjhumi alikhomba wabeletha u-Abramu, uNarhori noHarana.

Umlando kaTerarhi

²⁷ Naku-ke umlando kaTerarhi: UTerarhi wabeletha u-Abramu, uNarhori noHarana. UHarana wabeletha uLothi.

²⁸ UHarana wahlongakalela e-Uri lamaKasidi, inarha abelethelwa kiyo, uyise uTerarhi asaphila.

²⁹ U-Abramu noNarhori bathatha abafazi bobabili. Ibizo lomka-Abramu bekunguSarayi, lomkaNarhori kunguMilika ogade ayindodakazi kaHarana. UHarana gade anguyise kaMilika noJisika.

³⁰ USarayi gade ayinyumba, ubenganaye umntwana.

³¹ UTerarhi wathatha indodanakhe u-Abramu nomntanomntanakhe uLothi umsa kaHarana kanye nomalukazanakhe uSarayi umka-Abramu; boke baphuma e-Uri lamaKasidi batjhinga eKanana. Kodwana kuthe nabafika eRharana, bafese banzinza lapho.

³² UTerarhi waphila iminyaka emakhulu amabili nahlanu, wahlongakalela eRharana.