UGENESISI 10 - IsiNdebele 2012 Translation

Izizwe ezavela kuNowa

¹ Naku-ke umlando kaTjhemu, uRhamu noJafethi, amadodana kaNowa: Babelethelwa abantwana emva komthwalela.

² Iinzukulwana zakaJafethi bekunguGomere, uMagogi, uMadayi, uJavani, uTubali, uMetjheki noTirasi.

³ Iinzukulwana zakaGomere bekungu-Atjhikenazi, uRifathi noTogarima.

⁴ Iinzukulwana zakaJavani bekungu-Elitjha, uTaratjhitjhi, amaKithi namaDodani.

⁵ Kilabo kwavela abantu abahlala ngokusabalala eduze kwelwandle bonyana kuthi ngemva kwesikhathi ikoro enye nenye yabantwabo ikhulume ilimi layo enarhenayo.

⁶ Iinzukulwana zakaRhamu bekunguKutjhe, uGibhide, uPhuthi noKanana.

⁷ Iinzukulwana zakaKutjhe bekunguSeba, uRhavila, uSabeta, uRama noSabiteka. Iinzukulwana zakaRama kunguTjheba noDedani.

⁸ UKutjhe godu wabeletha uNimrodi owaba yindlhondlho yokuthoma ephasini.

⁹ Gade amuzumi onamandla nowaziwako, kungebangelo kuthiwa: “NjengoNimrodi umzumi onamandla khulu.”

¹⁰ Ikaba yombuswakhe beyiseBhabheli, e-Ereke, e-Akadi neKaline enarheni yeTjhinari.

¹¹ Ukusukela lapho umbuswakhe wanabela e-Asiriya, lapha akha khona iNiniva, iRerhobhothi, i-Iri neKalarha

¹² kanye neReseni, idorobho elikhulu phakathi kweNiniva neKalarha.

¹³ UGibhide gade anguyise wamaLudi, ama-Anamu, amaLehabi, amaNafiturhi,

¹⁴ amaPatrusi, amaKasilurhi (lapha amaFilista avela khona) namaKafitori.

¹⁵ UKanana wabeletha uTsidoni izibulo lakhe walanywa nguRhethi,

¹⁶ godu waba nguyise wamaJebusi, ama-Amori, amaGirigatjhi,

¹⁷ amaRhivi, ama-Ariki, amaSini,

¹⁸ ama-Arivadi, amaTsemari namaRhamathi. Emva kwalokho iinkoro zamaKanana zasabalala.

¹⁹ Imikhawulo yamaKanana yanaba ukusuka eTsidoni ukufika eGerari ngitjho nakude ukuya eGaza. Ukusuka lapho beyinabela eSodoma, eGomora, e-Adama, eTseboyimu ukuyokubetha eLatjha.

²⁰ Lezo bekuziinzukulwana zakaRhamu ngokuya ngezizwe neenkoro zazo namalimazo eenarheni zazo.

²¹ UTjhemu ongumnakwabo lakaJafethi, naye wabelethelwa amadodana. Yena ungukhokho wazo zoke iinzukulwana zaka-Ebhere.

²² Amadodana kaTjhemu bekungu-Elamu, u-Atjhuri u-Aripakitjhadi, uLudi, no-Aramu.

²³ Amadodana ka-Aramu bekungu-Utsi, uRhuli, uGeteri noMatjhi.

²⁴ U-Aripakitjhadi wabeletha uTjhelarhi. UTjhelarhi wabeletha u-Ebhere.

²⁵ U-Ebhere wabeletha amadodana amabili, enye beyibizwa bona nguPelegi ngombana ngeenkhathi zakhe izizwe zephasi bezihlukene. Umnakwabo gade abizwa bona nguJokhithani.

²⁶ UJokhithani wabeletha u-Almodadi, uTjhelefi, uRhatsarimavethi, uJerarhi,

²⁷ uHadoramu, u-Uzali, uDikhila,

²⁸ u-Obhali, u-Abimayeli, uTjheba,

²⁹ u-Ofira, uRhavila noJobabi. Boke labo bekumadodana kaJokhithani.

³⁰ Isifunda agade ahlala kiso besinabe ukusuka eMetjha ukuya eSefari eentabeni zepumalanga.

³¹ Lezo bekuziinzukulwana zakaTjhemu ngokuya ngezizwe neenkoro zazo namalimazo eenarheni zazo.

³² Lezo-ke bekuziinkoro ezadabuka emadodaneni kaNowa ngokuya ngokulandelana kwazo ezizweni zazo. Ukusukela kilezonkoro, izizwe zasabalala nephasi loke emva komthwalela.