UGENESISI 1 - IsiNdebele 2012 Translation

UZimu udala izulu nephasi

¹ Koke kwathoma lokha uZimu nakadala izulu nephasi.

² Nje-ke iphasi belinganabubono begodu linganabuphilo. Bekumnyama koke, iphasi libhibezwe mamanzi amanengi. Kodwana ummoya kaZimu wavunguza phezu kwamanzi.

³ Nje-ke uZimu wathi: “Akubekhona ukukhanya.” Ukukhanya kwavela.

⁴ UZimu wabona bonyana ukukhanya kuhle; yeke wahlukanisa ukukhanya nobumnyama.

⁵ UZimu wabiza ukukhanya bona yimini, ubumnyama wathi busuku. Kwahlwa, kwasa; kwaba lilanga lokuthoma.

⁶ UZimu wathi: “Akubekhona isibanga hlangana kwamanzi, kuhlukaniseke amanzi namanzi.”

⁷ Kungendlela leyo uZimu enza ngayo isibanga, wahlukanisa amanzi angaphasi kwesibanga namanzi angehla kwaso. Mbala kwaba njalo.

⁸ UZimu wabiza isibanga bona mkayi. Kwahlwa, kwasa; kwaba lilanga lesibili.

⁹ UZimu wathi: “Amanzi angaphasi komkayi akabuthane ndawonye, kubekhona indawo eyomileko.” Mbala kwaba njalo.

¹⁰ UZimu wabiza indawo eyomileko bona liphasi, kwathi amanzi abuthene ndawonye wawabiza bona malwandle. UZimu wabona lokho kukuhle.

¹¹ UZimu wathi: “Iphasi aliveze iimila: iintjalo ezinembewu, imithi ethela iinthelo ezinembewu ukuya ngemihlobayo.” Mbala kwaba njalo.

¹² Yeke iphasi laveza iimila: iintjalo ezinembewu ukuya ngemihlobazo nemithi ethela iinthelo ezinembewu ukuya ngemihlobayo. UZimu wabona lokho kukuhle.

¹³ Kwahlwa, kwasa; kwaba lilanga lesithathu.

¹⁴ UZimu wathi: “Akube khona iinkhanyisi emkayini ukuze zihlukanise ubusuku nemini; azibe matshwayo weenkhathi zeminyanya, zikhombe amalanga neminyaka.

¹⁵ Azibe ziinkhanyisi zomkayi zikhanyisele iphasi.” Mbala kwaba njalo.

¹⁶ UZimu wenza iinkhanyisi ezimbili ezikulu; esikhudlwana kunesinye wasenza bona sibuse imini, esincani wasenza bona sibuse ubusuku. Godu wenza neenkwekwezi.

¹⁷ UZimu wathatha iinkhanyisezi wazibeka phezulu emkayini bona zikhanyisele iphasi.

¹⁸ Wazenza bonyana zibuse phezu kobusuku nemini, nokobana zihlukanise umkhanyo nobumnyama. UZimu wabona lokho kukuhle.

¹⁹ Kwahlwa, kwasa; kwaba lilanga lesine.

²⁰ UZimu wathi: “Amanzi akaphithizele yoke imihlobo yeemphili, iinyoni ziphaphe phezulu emkayini.”

²¹ Kungendlela leyo uZimu adala ngayo iimbandana ezikulu zelwandle neemphili zoke eziphithizela ngemanzini ngemihlobazo. Godu wadala iinyoni eziphaphako ngemihlobazo. UZimu wabona lokho kukuhle.

²² Wazibusisa wathi: “Zalanani nande, nigcwale amalwandle neenyoni zande ephasini.”

²³ Kwahlwa, kwasa; kwaba lilanga lesihlanu.

²⁴ UZimu wathi: “Iphasi nalo aliveze iimphili ngemihlobazo: ezifuywako, ezikhakhabako nezommango, zoke zibe ngokuhlukahlukana kwazo.” Mbala kwaba njalo.

²⁵ UZimu wenza iinlwana zommango, ezifuywako kanye nakho koke okukhakhabako ukuya ngemihlobazo. Wabona lokho kukuhle.

²⁶ UZimu wathi: “Asenze umuntu ngomfanekiswethu asifuze, abuse phezu kweenhlambi zelwandle, iinyoni zomkayi, zoke iinlwana zephasi, kanye nakho koke okukhakhaba phezu kwalo.”

²⁷ Yeke uZimu wadala umuntu ngomfanekiswakhe; umuntu waba mfuziselo kaZimu; wadala wembaji nowengubo.

²⁸ UZimu wababusisa wathi kibo: “Belethani nande, nizalise iphasi nilibuse; nibuse phezu kweenhlambi zelwandle, iinyoni zomkayi naphezu kwenyabanyaba yoke ekhamba phezu kwephasi.”

²⁹ UZimu wathi: “Qala, ngininikela zoke iintjalo ezithela imbewu ephasini, nemithi yoke ehloma iinthelo ezinembewu; lokho kuzakuba kukudla kwenu.

³⁰ Koke okulihlaza okumilako ngikunikela bona kube kukudla kweenlwana zephasi, iinyoni zomkayi kanye neenkhakhabi zoke zephasi, okutjho zoke iimphili.” Mbala kwaba njalo.

³¹ UZimu wabona koke akwenzileko bona kuyakarisa. Kwahlwa, kwasa; kwaba lilanga lesithandathu.