UFILIMONI 1 - IsiNdebele 2012 Translation

Ukulotjhisa

¹ UPowula osibotjhwa sakaKrestu Jesu noThimothi umzalwana wethu, kuFilimoni isinini sethu esithandekako nosisebenzi kanye nathi;

² kudade u-Aphiya, ku-Arirhiphusi olibutho kanye nathi kanye nebandleni elingendlinakho:

³ Akube kini umusa nokuthula okuvela kuZimu uBaba neKosini uJesu Krestu.

Ithando nokukholwa kwakaFilimoni

⁴ Ngithokoza uZimu ngeenkhathi zoke lokha nangikukhumbula emithandazwenami

⁵ ngombana ngiyezwa ngethando lakho nokukholwa onakho eKosini uJesu nakibo boke abacwengileko.

⁶ Ngithandaza bona ubudlelwano bakho ekukholweni bube nepumelelo, ube nokuzwisisa okupheleleko ezintweni zoke esinazo kuKrestu.

⁷ Ithando lakho lingilethele ithabo elimangazako nokukhuthazeka ngombana iinhliziyo zabacwengileko zivuselelekile ngawe, mzalwana.

UPowula ubawela u-Onesimu

⁸ Ngalokho, nanyana nginesibindi kuKrestu sokukuyala bona wenze okufaneleko,

⁹ nokho ngebanga lethando ngiyakuncenga. Nje-ke mina Powula njengomuntu osele amdala nosibotjhwa sakaKrestu Jesu njenganje,

¹⁰ ngikubawa ngo-Onesimu indodanami engibe nguyise ngesikhathi sokubotjhwa kwami:

¹¹ Ngaphambilini gade angasilo isizo kuwe, kodwana manjesi sele alisizo kimi nakuwe.

¹² Nje-ke ngimthumela bona abuyele kuwe njengomuntu oyihliziywami.

¹³ Bengithanda bona ahlale nami kobana angisize esikhundleni sakho ngesikhathi ngisesesibotjhwa ngebanga levangeli.

¹⁴ Kodwana angithandi ukwenza ilitho ngaphandle kwemvumo yakho ukuze izenzo zakho ezihle zibe ngezokuzithandela kungabi yinto yokwenziswa.

¹⁵ Mhlamunye kungebangelo ahlukana nawe isikhatjhana khona azakubuyiselwa kuwe unomphela,

¹⁶ angaseselikhoboka kodwana sele angaphezu kwekhoboka, amfowethu othandeka khulukhulu kimi, alo, kangangani-ke kuwe enyameni neKosini.

¹⁷ Nje-ke nangabe ungithatha njengomhlanganyeli nawe, mamukele njengombana bewuzakwamukela mina.

¹⁸ Nangabe kukhona akone ngakho, namkha akubamba khona, kubalele kimi lokho.

¹⁹ Iye, mina Powula, ngitlola ngesandla sami, ngithi: Ngizakuhlawula lokho! Bengingakathandi ukukukhumbuza bona wena ngokwakho ungibamba ubuwena.

²⁰ Iye mfowethu, ngenzela isisa ngebanga leKosi, uvuselele ihliziywami kuKrestu.

²¹ Nginethemba ngokulalela kwakho, ngikutlolela lokhu ngisazi bona uzakwenza ngokungaphezu kwalokho engikubawako.

²² Okhunye godu nakhu: Ngilungiselani ilawu labayeni ngombana nginethemba bona ngemithandazo yenu ngizakubuyiselwa kini.

Ukulayelisa

²³ U-Ephafrasi obotjhwe nami ngebanga lakaKrestu Jesu, uyanilotjhisa,

²⁴ ngokunjalo noMarkosi, u-Aristarirhusi, uDemasi noLukasi ababalingani bami.

²⁵ Sengathi umusa weKosi uJesu Krestu ungaba nani noke.