UDUTERONOMI 9 - IsiNdebele 2012 Translation

USomnini uzakupha ama-Israyeli inarha ngomusa

¹ Lalelani nina ma-Israyeli! Nizakuyama iJordani namhlanje ningene bese nithumba izizwe ezikulu nezinamandla kunani, amadorobho amakhulu anemithangala etjhayisa emkayini,

² okubabantu abanengi nabandlondlobeleko kunathi, iinzukulwana zaka-Anakhi enimaziko benezwa ngaye nakuthiwa: “Akunamuntu ongajama phambi kweenzukulwana zaka-Anakhi!”

³ Yazini-ke namhlanje bonyana loyo okhamba phambi kwenu anjengomlilo oqothulako, nguSomnini uZimenu. Uzaziqeda izizwezo ngokuziguqisa phambi kwenu, nina-ke niziqotjhe benizibhubhise msinyana njengombana uSomnini anithembisile.

⁴ Ningathi ngemva kobana uSomnini uZimenu sele aqotjhe izizwezo phambi kwenu bese nidlumbana nithi: “Kungebanga lokulunga kwethu okwenze uSomnini bonyana asiphe inarha le.” Awa, kungebanga lobukhohlakali bezizwezi okwenze bonyana uSomnini aziqotjhe phambi kwenu.

⁵ Anizokuthumba inarha yezizwezo ngebanga lokulunga kwenu namkha ubumsulwa beenhliziyo zenu, kodwana kungebanga lobukhohlakali bazo kobana uSomnini uZimenu aziqotjhe phambi kwenu nokobana aqinisekise ilizwi alifungela kiboyihlomkhulu u-Abrahamu, u-Isaka noJakopo.

⁶ Yazini-ke bonyana uSomnini uZimenu akakaninikeli inarha ehle le kobana niyithumbe ngebanga lokulunga kwenu. Kuhlekuhle nina nibabantu abaneentanyana!

⁷ Khumbulani begodu ningakhohlwa bona nimthukuthelise njani uSomnini uZimenu naniserhalawumbeni ukusuka mhlana niphuma enarheni yeGibhide bekube kumhlana nifika endaweni le, nilokhu nilwa noSomnini.

⁸ Khulukhulu eRhorebe kulapha nathukuthelisa khona uSomnini. USomnini wasilingeka kangangobana kwakuthi akanirhayile.

⁹ Lokha nangikhuphukela entabeni ukuyokwamukela imiqebethu yesivumelwano uSomnini asenza nani, ngahlala lapho amalanga amatjhumi amane nobusuku bakhona. Azange ngigome isikwa namkha ngisele amanzi.

¹⁰ USomnini wanginikela imiqebethu emibili etlolwe ngomuno kaZimu. Emiqebethwinapho gade kutlolwe woke amezwi uSomnini awakhuluma nani aphakathi komlilo entabeni ngelanga lomhlangano.

¹¹ Kwathi ekupheleni kwamalanga amatjhumi amane nobusuku bakhona uSomnini wanginikela imiqebethu emibili, okungeyesivumelwano,

¹² wathi kimi: “Sikima, wehle msinyana ngombana abantu bakho owabakhupha eGibhide barhubutjhe isivumelwano, baphambuka msinyana endleleni engabayala ngayo, bazenzela isithombesibunjwa.”

¹³ USomnini waraga wathi kimi: “Ngibabonile abantwaba, maye uthi baneentanyana na!

¹⁴ Yewungilise ngibarhayile, ngisule amabizwabo ngaphasi komthunzi welanga, wena ngikwenze isizwe esinamandla nesikhulu kunabo.”

¹⁵ Nje-ke ngafulathela ngehla entabeni, intaba gade ivutha umlilo; imiqebethu emibili yesivumelwano beyisezandleni zami.

¹⁶ Ngaqala ngabona bonyana nonile phambi kwakaSomnini uZimenu; nizenzele ikunzana ebunjiweko. Nirhabile ukuphambuka endleleni uSomnini aniyala ngayo.

¹⁷ Yeke ngagugudlhela imiqebethu emibili leyo ngayimadlha phasi, yephuka niyiqalile.

¹⁸ Ngawa ngobuso phambi kwakaSomnini. Njengaphambilini kwaba malanga amatjhumi amane nobusuku bakhona ngingagomi isikwa namkha ngirhamule amanzi ngebanga lesonokazi enisenzileko ngokwenza ubumbi phambi kwakaSomnini namthukuthelisa.

¹⁹ Gade nginesabela itukuthelo nobukhali bakaSomnini phezu kwenu ngombana bekanidinekele kangangobana besele alungele ukunirhayila. Kodwana nangesikhatheso uSomnini wangilalela.

²⁰ USomnini godu wathukuthelela u-Aroni kangangobana besele alungele ukumrhayila, khonapho naye ngamthandazela.

²¹ Nje-ke ngathatha isinyenyiso senweso, okuyikunzana eniyenzileko, ngasitjhisa ngasiqova iinquqwana, ngasitshidlha saba njengethuli ngarhatjha ithulelo ngemlanjaneni ovela entabeni.

²² Godu eThabhera, eMasa neKhibrothi-Hatava nakhona nahlalela ukuthukuthelisa uSomnini.

²³ Kwathi lokha uSomnini nanisusa eKhadetjhi-Bharineya wathi nikhuphuke nithumbe inarha aniphe yona, nalwa nomyalo kaSomnini uZimenu. Azange nimkholwe namkha nilalele ilizwi lakhe.

²⁴ Benilokhu nilwa noSomnini ukusuka mhlana ngithoma ukunazi.

²⁵ Yeke ngawa ngobuso phambi kwakaSomnini amalanga amatjhumi amane nobusuku bakhona ngombana uSomnini bekathe uzonirhayila.

²⁶ Ngathandaza kuSomnini ngathi: “Maye Somnini Somandla! Ungarhayili abantu bakho abalilifa lakho, owabahlenga ngobukhulu bakho, wabakhupha eGibhide ngesandla esinamandla.

²⁷ Khumbula incekwakho u-Abrahamu, u-Isaka noJakopo, ungayeleli ukunghanghabala kwabantwaba, namkha ubukhohlakali babo nanyana isono sabo,

²⁸ ngombana inarha owasikhupha kiyo izakuthi, ‘USomnini uhlulekile ukubafikisa enarheni abathembise yona, nokubazonda bekabazonda, ubakhuphele zonezi enarheni kobana abarhayilele erhalawumbeni.’

²⁹ Bababantu bakho nelifa lakho, owalikhupha ngamandlakho amakhulu nangesiphanga sakho.”