UDUTERONOMI 8 - IsiNdebele 2012 Translation

Ukuyalwa kwama-Israyeli bona angakhohlwa uSomnini

¹ Nitjheje ukwenza yoke imiyalo enginiyala ngayo namhlanje ukuze niphile, nande, beningene nithumbe inarha uSomnini afunga bonyana uzayinikela aboyihlomkhulu.

² Nikhumbule yoke indlela uSomnini uZimenu anirhole ngayo eminyakeni ematjhumi amane erhalawumbeni. Wanithoba lokha nakanihlolako bonyana azi okuseenhliziywenu zenu nokobana nizakulalela imiyalwakhe namkha njani.

³ Ngambala wanithoba ngokunibulalisa ngendlala. Wanondla ngemana ebeningayazi, ngitjho naboyihlomkhulu bebangayazi ukuze anifundise bonyana umuntu akaphili ngesikwa kwaphela kodwana uphila nangelinye nelinye ilizwi eliphuma emlonyeni kaSomnini.

⁴ Kiyo yoke leminyaka ematjhumi amane, izambatho zenu azange zirhaluke neenyawo zenu azange zivuvuke.

⁵ Yazini-ke eenhliziyweni zenu bonyana njengobaba nakhalima umntwanakhe, ngokunjalo noZimu uyanikhalima.

⁶ Ngalokho gcinani imiyalo kaSomnini uZimenu ngokukhamba eendleleni zakhe nangokumesaba.

⁷ USomnini uZimenu uniletha enarheni ehle, inarha enemilanjana neeyalu, okutjho amanzi avinyilika emirhobeni neentabeni,

⁸ inarha yekoroyi nebhali, iindiribe, amakhiwani namarharinada, inarha yeliju namafutha we-oliva,

⁹ inarha lapha nizagoma khona isikwa singapheli, lapha ningekhe naswela khona, inarha lapha amatje wakhona kungewesimbi, lapha ningemba khona ikoporo emibundwini yakhona.

¹⁰ Nizagoma nibethe esimonyongwana, nikhakhazise uSomnini uZimenu ngobuhle benarha aniphe yona.

¹¹ Yelelani bona ningakhohlwa uSomnini uZimenu ngokungalaleli imiyalwakhe, imithethwakhe kanye neemiso zakhe enginiyala ngazo namhlanje.

¹² Nasele nigome nasutha, nakha iinkumba zamabono benahlala kizo,

¹³ nalokha iinkomo, izimvu neembuzi zenu nasele zandile, isiliva negolide lenu nalo landile nakho koke eninakho sele kwandile,

¹⁴ ningazikhukhumezi, nikhohlwe uSomnini uZimenu owanikhupha eGibhide ekumbeni yobukhoboka.

¹⁵ Iye, uSomnini owanirhola erhalawumbeni elikhulu nelesabekako elineenyoka ezinesihlungu nabofezela kanye nequlwani eyomileko lapha bekunganamanzi khona, wanipha amanzi ngitjho edwaleni.

¹⁶ Wanondla niserhalawumbeni ngemana naboyihlomkhulu abangayaziko ukuze anithobe abe anizizinye, kuthi ekugcineni nizuze.

¹⁷ Ningathi eenhliziyweni zenu: “Umnono ongaka lo, kazi mjuluko wamandla nezandla zethu.”

¹⁸ Kodwana khumbulani uSomnini uZimenu ngombana nguye onipha amandla wokufumana umnono ukuze aqinisekise isivumelwano sakhe asifunga kiboyihlomkhulu njengombana kunjalo namhlanje.

¹⁹ Yazini bonyana nange ningakhohlwa uSomnini uZimenu, nidlhemadlheme ngemva kwabosingazimu, nibalotjhe benibakhothamele, ngiyafunga namhlanje bona nizakubhubha nya.

²⁰ Iye, nizakubhubha njengezizwe uSomnini azibhubhise phambi kwenu ngombana anilaleli ilizwi lakaSomnini uZimenu.