UDUTERONOMI 7 - IsiNdebele 2012 Translation

Imiyalo malungana nokuthunjwa kwenarha

¹ Lokha uSomnini uZimenu aniletha enarheni eningena kiyo bona niyithumbe bese aqotjhe izizwe ezinengi phambi kwenu, okumaRhithi, amaGirigatjhi, ama-Amori, amaKanana, amaPerizi, amaRhivi namaJebusi, izizwe ezilikhomba ezikulu nezinamandla kunani,

² nalokha uSomnini uZimenu anikela izizwezo kini bese nizihlule; nizakufanela bonyana nizirhayile nya. Ningenzi isivumelwano nazo begodu ningabi nomusa phezu kwazo.

³ Ningakhi isikhozi nazo ngokwendisela amadodakazenu emadodanenazo namkha nithathele amadodanenu amadodakazazo.

⁴ Nakungasinjalo, zizakudurhisa amadodanenu angasalandeli uSomnini bese alotjha abosingazimu. Itukuthelo kaSomnini izakuvutha phezu kwenu, anirhayile masinyana.

⁵ Kodwana nakhu enizakwenza kizo: Bhuruzani ama-aldarazo, niphahlaze amatje akhethekileko, nigawule nemifanekiso yabo-Atjhera bese nitjhisa iinthombembazwa zazo.

⁶ Nina nibabantu abacwengileko kuSomnini uZimenu. USomnini uZimenu unikhethe kobana nibe sisizwe esingesakhe hlangana nabo boke abantu abasephasinapha.

⁷ USomnini akakabeki ihliziywakhe kini bewanikhetha ngebanga lokobana nibanengi ngesibalo kunabanye (emanyeni benilidlanzana khulu kibo boke abantu),

⁸ kodwana kungebanga lokobana uSomnini uyanithanda nokobana ufeza isithembiso asifunga kiboyihlomkhulu. Ngebangelo uSomnini unikhuphe ngesandla esinamandla, wanihlenga ekumbeni yobukhoboka, esandleni sakaFaro ikosi yeGibhide.

⁹ Ngalokho yazini-ke bonyana uZimenu nguye yedwa uZimu, uZimu othembekileko ngokugcina isivumelwano. Uthembekile kilabo abamkhathalelako balonde imiyalwakhe, eenkulungwaneni zeenzukulwana,

¹⁰ kodwana uhlunguphaza labo abangakathembeki kuye, abarhayile. Akazokuhlehlisa isibetho songakathembeki kuye kodwana uzomhlunguphaza.

¹¹ Ngalokho niyelele ukwenza imiyalo, iimiso nemithetho enginiyala ngayo namhlanje.

¹² Ngebanga lokobana nilalele imithetho leyo, nayilonda benayenza, uSomnini uZimenu uzakulonda isivumelwano nokwethembeka akufungela kiboyihlomkhulu bona uzakwenza.

¹³ USomnini uzanithanda, anibusise abe anandise enarheni ayifunga kiboyihlomkhulu bona uzaninikela yona. Uzakubusisa imbelekwenu, inzalo yeenkomo nezimvu zenu, neentjalo zenu okutjho ikoroyi, iwayini namafuthenu we-oliva.

¹⁴ Nizakubusiseka ngaphezu kwezizwe zoke: Akuzukuba nenyumba phakathi kwenu, komduna namkha komsikazi. Ngitjho nefuywenu ayikho ezakuhlala ingazali.

¹⁵ USomnini uzakususa zoke izifo phezu kwenu. Angeze anehlisela amagulo amambi weGibhide enakhe nawabona, kodwana uzawehlisela phezu kwabo boke abanizondako.

¹⁶ Nizakuqeda boke abantu uSomnini uZimenu azabanikela ezandleni zenu, amehlwenu angabarhawukeli. Ningalotjhi abosingazimu babo ngombana lokho kuzakuba sisifu kini.

¹⁷ Mhlamunye ningadlumbana nithi: “Izizwezi zikulu kunathi, alo singazirhayila njani?”

¹⁸ Ningazesabi, kodwana khumbulani kuhle lokho uSomnini uZimenu akwenza ngoFaro nabo boke eGibhide:

¹⁹ USomnini uZimenu wanenyula eGibhide ngamatshwenyeko amakhulu niqalile, iimbonakaliso nemikarisomraro, ngesandla esinamandla nangesiphanga sakhe. Ngaleyondlela uSomnini uZimenu uzakwenza soneso kibo boke abantu enibesabakwaba.

²⁰ Ngaphezu kwalokho uSomnini uZimenu uzabathumelela abonondovu kufikela lapha labo abaseleko nabazifihlele nina barhayilwa khona.

²¹ Ningabi nevalo ngabo ngombana uSomnini uZimenu uphakathi kwenu, uZimu omkhulu nosabekako.

²² USomnini uZimenu uzakutjhabalalisa izizwezi phambi kwenu kancani kancani, anizoziqeda zoke kanye kanye. Nakungasinjalo kuzakwanda iimbandana zommango ezingaba yingozi kini.

²³ Kodwana uSomnini uZimenu uzakunikela izizwezi ezandleni zenu bese uzihlanganisa iinhloko kufikela lapha zirhayileka khona.

²⁴ USomnini uzakunikela amakhosi wazo ezandleni zenu, nitjhabalalise amabizwawo ngaphasi komthunzi welanga. Akunamuntu ozakghona ukujamelana nani kufikela lapha nibarhayila khona.

²⁵ Nitjhise iinthombembazwa zabosingazimu bazo, ningarhaleli namkha nizithathele isiliva namkha igolide elikibosingazimu labo ngombana lizanibamba njengesifu. Izintwezo zisinyenyiso kuSomnini uZimenu.

²⁶ Ngalokho ningalethi izinto ezinyenyisakwezo ngeenkumbeni zenu bese niba ngabathuwelelisiweko njengazo. Ninyenye benigonyuluke ngalokho ngombana kuzizinto ezithuwelelisiweko.