UDUTERONOMI 6 - IsiNdebele 2012 Translation

Umyalo omkhulu

¹ Le-ke miyalo, okutjho iimiso nemithetho uSomnini uZimenu angiyale bonyana nginifundise ukuze niyenze enarheni enizokungena kiyo niyithumbe.

² Umnqopho womyalo lo kukobana nesabe uSomnini uZimenu ngokulonda iimiso nemithethwakhe enginiyala ngayo. Yenzeni nina, abantwabenu neenzukulwana zenu imihla yoke yokuphila kwenu ukuze niphile isikhathi eside.

³ Yelelani nina ma-Israyeli niphethe imiyalo ngokupheleleko ukuze koke kunikhambele kuhle enarheni egeleza ibisi neliju, nokobana nande khulu njengombana uSomnini uZimu waboyihlomkhulu anithembisile.

⁴ Yizwa wena Israyeli! USomnini nguZimethu, nguye yedwa uSomnini.

⁵ Ngalokho uzakukhathalela uSomnini uZimakho ngayo yoke ihliziywakho, nangomphefumulwakho woke nangawo woke amandlakho.

⁶ Amezwi la engikuyala ngawo namhlanje azakuba sehliziywenakho.

⁷ Uwabuyekeze njalo ebantwaneni bakho ngokuzimisela, ukhulume ngawo nawuhlezi emzinakho, nalokha nawukhamba endleleni, nawulalako nalokha nawuvukako.

⁸ Uzawabopha njengenyongo esandleni nanjengomkhala ehloko abe sikhumbuzo.

⁹ Uzawatlola egosenini yekumbakho nemasangwenakho.

¹⁰ USomnini uZimenu uzaningenisa enarheni ayifungela kiboyihlomkhulu, ku-Abrahama, u-Isaka noJakopo. Lokha nayininikela amadorobho amakhulu namahle eningazange niwakhe,

¹¹ neenkumba ezizele ipahla ehle eningazange niyisebenzele, imiphathamanzi eningazange niyembe, iindiribe nemithi ye-oliva eningazange niyitjale, nalokha nigoma, nisutha,

¹² yelelani bona ningakhohlwa uSomnini owanikhupha enarheni yeGibhide, ekumbeni yobukhoboka.

¹³ Yesabani uSomnini uZimenu kwaphela; nimlotjhe benifunge ngebizo lakhe.

¹⁴ Ningadlhemadlhemi ngemva kwabosingazimu babantu abanibhodileko,

¹⁵ ngombana uSomnini ophakathi kwenu unguZimu onesikhwele; ubukhali bakhe buzakuvutha phezu kwenu, anirhayile ebusweni bephasi.

¹⁶ Ningazizinyi uSomnini uZimenu njengombana nenza eMasa.

¹⁷ Gcinani ngokuzimisela imiyalo kaSomnini uZimenu nobufakazi bakhe neemiso zakhe aniyale ngazo.

¹⁸ Nenze okulungileko nokuhle phambi kwakaSomnini ukuze izinto zinikhambele kuhle, nokobana nikwazi ukungena nithumbe inarha ehle uSomnini ayifungela kiboyihlomkhulu

¹⁹ ngokuqotjha zoke izitha zenu phambi kwenu njengombana uSomnini wathembisa.

²⁰ Amadodanenu azanibuza ngamunye esikhathini esizako athi: “Butjho ukuthini ubufakazi, iimiso nemithetho uSomnini uZimethu aniyale ngakho?”

²¹ Yeke nizawaphendula nithi: “Sasimakhoboka kaFaro eGibhide, kodwana uSomnini wasikhupha lapho ngesandla esinamandla;

²² wasikhombisa iimbonakaliso nemikarisomraro emikhulu nesabekako ngokujamelana noFaro kanye naso soke isigodlo sakhe, siqalile.

²³ Wasikhupha-ke thina lapho kobana asilethe abe asiphe inarha ayifungela kibobamkhulu.

²⁴ Nje-ke uSomnini usiyale bonyana senze yoke imithetho le, ukwesaba uSomnini uZimethu kobana izinto zisikhambele kuhle isikhathi soke, asigcine siphilile njengombana kunjalo namhlanje.

²⁵ Lokho kuzakuba buqotho kithi nakube siyelela bonyana senze yoke imiyalo le phambi kwakaSomnini uZimethu njengombana asiyalile.”