UDUTERONOMI 5 - IsiNdebele 2012 Translation

¹ UMosi wabiza woke ama-Israyeli wabeka kiwo ikulumo le: Yizwani nina ma-Israyeli, iimiso nemithetho engiyikhulume kini namhlanje ukuze niyifunde beniyelele ukuyenza.

² USomnini uZimethu wenza isivumelwano nathi eRhorebe.

³ USomnini azange enze isivumelwanesi nabobaba kodwana usenze nathi soke esilapha esisaphilako namhlanje.

⁴ USomnini wakhuluma nani ubuso nobuso entabeni aphakathi komlilo,

⁵ mina ngangijame hlangana noSomnini nani ngesikhatheso kobana ngimemezele kini ilizwi lakaSomnini ngombana gade nesaba ngebanga lomlilo; ngalokho azange nenyukele entabeni. USomnini wathi:

⁶ “Mina Somnini nginguZimakho owakukhupha enarheni yeGibhide ekumbeni yobukhoboka.

⁷ Ungalotjhi abosingazimu, lotjha mina kwaphela.

⁸ Ungazenzeli isithombesibazwa, namkha umfanekiso wananyana yini esezulwini phezulu namkha ephasini phasi nanyana ngemanzini ngaphasi kwephasi.

⁹ Ungazikhothameli izintwezo, ungazilotjhi ngombana mina Somnini nginguZimakho. NginguZimu onesikhwele owehlisela isibetho sezono zaboyise phezu kwabantwababo besizukulwana sesithathu nesesine salabo abangenzi intandwami.

¹⁰ Kodwana ukwethembeka kwami kuzakuhlala eenkulungwaneni zeenzukulwana zalabo abangikhathalelako nabalonda imiyalwami.

¹¹ Ungakhulumeli butjhilweni ngebizo lakaSomnini uZimakho ngombana uSomnini uzambeka umlandu loyo ophatha ibizo lakhe butjhilweni.

¹² Hlonipha ilanga leSabatha, ulilonde ngokucwenga njengombana uSomnini uZimakho akuyala.

¹³ Sebenza amalanga asithandathu, wenze woke umsebenzakho;

¹⁴ kodwana ilanga lekhomba liliSabatha, lahlukaniselwe uSomnini uZimakho. Mhlokho ungasebenzi ngitjho nakancani, wena, indodanakho nendodakazakho, ikhoboka nekhobokakazi lakho, ikomakho nodumbanakho, okutjho yoke ifuywakho namkha isikhonzi esihlala nawe; ukuze ikhoboka nekhobokakazi lakho liphumule njengawe.

¹⁵ Ukhumbule bonyana gade ulikhoboka enarheni yeGibhide, uSomnini uZimakho wakukhupha lapho ngesandla esinamandla nangesiphanga sakhe. Ngalokho uZimakho wakuyala bonyana ugidinge ilanga leSabatha.

¹⁶ Yazisa uyihlo nonyoko njengombana uyalwe nguSomnini uZimakho ukuze kwande amalangakho wokuphila nokobana izinto zikukhambele kuhle endaweni oyiphiwa nguSomnini uZimakho.

¹⁷ Ungabulali umuntu.

¹⁸ Ungahlobongi.

¹⁹ Ungebi.

²⁰ Ungafakazi amala ngomunye umuntu.

²¹ Ungakhanukeli umfazi womunye umuntu, ungafisi ikumbakhe, isimakhe, ikhoboka namkha ikhobokakazi lakhe, ikomakhe, udumbanakhe nanyana yini engeyomunye umuntu.”

²² Amezwi lawo akhulunywa nguSomnini kiwo woke umkhambathi wenu entabeni aphakathi komlilo, elifini elimabhombo nelimnyama ngelizwi elikhulu begodu azange angezelele. Wawatlola emiqebethwini emibili wanginikela wona.

²³ Kwathi lokha nanizwa ilizwi phakathi kobumnyama, lokha intaba nayitjhako, natjhidela eduze kwami nazo zoke iinhloko zeenkoro zenu kanye nabaphathi benu

²⁴ nathi: “Qala uSomnini uZimethu usikhombise iphazimulo nobukhulu bakhe, nje-ke silizwile ilizwi lakhe lihlangana nomlilo, namhlanje sibone uZimu akhuluma nomuntu kodwana umuntu usaphila.

²⁵ Alo, thina sizakufelani? Umlilo omkhulu lo uzosiqothula; nange singabuya godu sizwe ilizwi lakaSomnini uZimethu, ngiqinisile ngithi sizokufa.

²⁶ Ngubani phakathi kwayo yoke inyama owakhe wezwa ilizwi lakaZimu ophilako likhuluma phakathi komlilo njengombana kwenzeka kithi, kodwana waphila?

²⁷ Tjhidela wena uzwe koke uSomnini uZimethu azokutjho, usitjele koke uSomnini uZimethu azokukhuluma nawe, thina-ke sizakulalela besenze.”

²⁸ Ngambala uSomnini wawezwa amezwi wenu lokha nanikhuluma nami, wathi kimi: “Ngiwezwile amezwi abantwaba abawakhulume kuwe; koke abakutjhwileko kuwe kulungile.

²⁹ Inga bangahlala banomkhumbulo onjalo wokobana bangesabe bebagcine yoke imiyalwami ngeenkhathi zoke ukuze izinto zibakhambele kuhle nabantwababo isiphelani!

³⁰ Khamba ufese ubatjele bonyana babuyele ematendenabo.

³¹ Kodwana wena jama eduze namapha, ngizakutjela yoke imiyalo, iimiso nemithetho ozabafundisa yona kobana bayenze enarheni engibanikela yona njengelifa labo.”

³² Ngalokho yelelani nenze koke uSomnini uZimenu aniyale ngakho; ningaphambukeli ngesigomeni namkha ngesinceleni.

³³ Nikhambe endleleni yoke uSomnini uZimenu aniyale ngayo ukuze niphile nokobana koke kunikhambele kuhle, niphile isikhathi eside enarheni enizayithumba.