UDUTERONOMI 34 - IsiNdebele 2012 Translation

Ukuhlongakala kwakaMosi

¹ UMosi wakhuphukela emrhobeni weJordani kwaMowabi entabeni iNebo, esiqongolweni sePisiga, emalungana neJerikho. USomnini wamkhombisa yoke inarha: ukusuka eGiliyadi ukuyokufika kwaDani,

² yoke iNafitali, inarha yakwa-Efrayimu neyakwaManase, yoke inarha yakwaJuda ukuyokufika elwandle elingetjingalanga,

³ isewula yenarha nomrhoba weJordani, okutjho umrhula weJerikho idorobho lamasundu, ukuyokufika eTsowari.

⁴ USomnini wathi kuye: “Nasi inarha engayifungela ku-Abrahamu, u-Isaka noJakopo ngathi ngizayinikela iinzukulwana zabo. Ngikuvumele bonyana uyibone ngamehlwakho, kodwana awuzukungena kiyo.”

⁵ Yeke uMosi inceku kaSomnini wahlongakalela lapho enarheni yakwaMowabi ukuya ngelizwi lakaSomnini.

⁶ USomnini wambulungela ngakeminye yemirhoba enarheni yakwaMowabi malungana neBhethe-Pewori. Akunamuntu owazi ithuna lakhe bekube namhlanje.

⁷ UMosi gade aneminyaka elikhulu namatjhumi amabili lokha nahlongakalako. Amehlwakhe gade asabona kuhle begodu asese namandla emzimbeni.

⁸ Ama-Israyeli alilela uMosi kwaMowabi ngemrhobeni weJordani amalanga amatjhumi amathathu. Ngemva kwalapho amalanga wokulila nokuzila aphela.

⁹ UJotjhuwa umsa kaNuni wayezele ngommoya wokuhlakanipha ngombana uMosi wayembeke izandla. Yeke ama-Israyeli amlalela, enza njengombana uSomnini ayale uMosi.

¹⁰ Nje-ke solo kwalokho azange bekusaba nomphorofidi onjengoMosi kwa-Israyeli uSomnini atjhidelene khulu naye.

¹¹ Azange kube nonjengaye uSomnini amnikela zoke iimbonakaliso nemikarisomraro kobana azenze enarheni yeGibhide kuFaro nakizo zoke iinceku zakhe nenarhenakhe yoke.

¹² Woke ama-Israyeli awabona amandla amakhulu nezenzo ezesabekako ezikulu uMosi azenzako.