UDUTERONOMI 33 - IsiNdebele 2012 Translation

UMosi ubusisa iinkoro zakwa-Israyeli

¹ Lesi sibusiso uMosi umuntu kaZimu abusisa ngaso ama-Israyeli ngaphambi kobana ahlongakale.

² Wathi: “USomnini wavela eSinayi, wakhanyisela abantu bakhe eSeyiri, waphazimula eentabeni zeParana; wavela neenkulungwana ezilitjhumi zabacwengileko ngesidleni sakhe bekunomkhambathi wezulwini.

³ Iye, Somnini, wena othanda izizwe, boke abacwengileko basesandleni sakho; bazithoba eenyaweni zakho, benza imiyalwakho.

⁴ UMosi wasiyala ngomthetho, njengelifa lehlangano kaJakopo.

⁵ UZimu waba yikosi kaJetjhuruni, lokha iinhloko nazibutheneko, iye, nakuhlangene iinkoro zakwa-Israyeli.

⁶ “URubeni akaphile, angafi nebutho lakhe linganciphi.

⁷ “NgoJuda uMosi wathi: “Somnini, yewulalele ilizwi lakaJuda, umlethe ebantwini bekhabo. Yiba zizandla zakhe ezimlwelako, isizo ezitheni zakhe.

⁸ “NgoLevi wathi: “Ithumimi ne-urimakho Somnini, ngezabathembekileko kuwe; labo owabazizinya eMasa, wabasola emanzini weMeriba.

⁹ Abantwabo bathi kiboyise nabonina: Siyabahlubuka! Baphika abafowabo, babeba abantwababo; Kodwana bayelela ilizwi lakho, Somnini, balonda isivumelwano sakho.

¹⁰ Bafundisa uJakopo imiyalwakho, u-Israyeli umthethwakho; batjhisa itjhwalo phambi kwakho nomhlabelo otjhiswa woke e-aldarini lakho.

¹¹ Somnini, busisa amandla wamaLevi, wamukele nemisebenzi yezandla zawo; uphorhoze amadini wezitha zawo, lezo eziwazondako, ukuze zingasavuki.

¹² “NgoBhenjamini wathi: “Othandiweko kaSomnini, uzakuhlala aphephile kuye; amsibekele ngesikhathi soke, uzakuhlala hlangana neentaba zakaSomnini.”

¹³ “NgoJosefa wathi: “Inarhakhe ibusiswe nguSomnini, ngombethe, isipho somkayi, ngamanzi wangaphasi,

¹⁴ ngesipho seenthelo zomnyaka, iye, imikhiqizo yeenkhathi zomnyaka,

¹⁵ ngemikhiqizo ephambili yeentaba zekadeni, iye, isipho semibundu yanini nanini,

¹⁶ ngezipho ezikhethekileko iphasi elingaba nazo. Umusa waloyo ohlala esithukghwaneni inga ungaba phezu kwehloko kaJosefa, iye, phezu kwepandla yekosana yabafowabo.

¹⁷ Unedumo njengekunzi elizibulo, iimpondo zakhe ngezekukhama; usunduza ngazo izizwe, bekube semikhawulweni yephasi; abanjalo ziinkulungwana ezilitjhumi zaka-Efrayimu, abanjalo ziinkulungwana zakaManase.

¹⁸ “NgoZebuloni wathi: “Jabula wena Zebuloni ekuphumeni kwakho ipi, nawe Isakari ngematendenakho.

¹⁹ Babizela izizwe entabeni, bahlabele khona imihlabelo yokulunga ngombana bamunya umnono welwandle namagugu afihlakeleko wetjhwabatjhwaba.

²⁰ “NgoGadi wathi: “Akabusiswe onabisa uGadi! UGadi uphila njengebhubezi, udabula umkhono nepandla.

²¹ Uzikhethela indawo ekhethekileko ebegade ingakhethwa mrholi. Lokha iinhloko zeenkoro zihlangana lapho, yena ufeza okulungileko kwakaSomnini nemithethwakhe ku-Israyeli.

²² “NgoDani wathi: “UDani libhubezana eleqa lisuka eBhatjhani.

²³ “NgoNafitali wathi: “UNafitali waneliswe mumusa, uzele iimbusiso zakaSomnini, inga angathumba itjingalanga nesewula.

²⁴ “Ngo-Atjheri wathi: “U-Atjheri akabusiswe ngaphezu kwamadodana, akathandwe bafowabo, acwilise inyawo lakhe emafutheni.

²⁵ Iinqabo zakho zizakuba ngezesimbi nezekoporo, amandlakho abe njengamalangakho.

²⁶ “Akakho onjengoZimu kaJetjhuruni, oza ngephazimulwakhe, adabule umkayi namafu bona azokusiza.

²⁷ UZimu wanini nanini usiphephelo, imikhonwakhe ikuthwala isiphelani. Uqotjha izitha zakho lokha nathi, ‘Bhubhisa!’

²⁸ U-Israyeli uhlezi ngokuphepha, uJakopo unzinzile enarheni yekoroyi newayini, iye, umkayi wakhona wehlisa umbethe.

²⁹ Ubusisekile wena Israyeli! Ngubani nje ofana nawe, isizwe esisindiswa nguSomnini! Nguye osihlangu esikuvikelako nesabula yokuhlula kwakho! Izitha zakho zizakuza zikhasa kuwe, wena ubeke iinyawo zakho emahlombazo.”