UDUTERONOMI 32 - IsiNdebele 2012 Translation

¹ Lalelani, nina mazulu ngikhulume, nomhlaba uzwe amezwi womlomami.

² Ifundiswami ayehle njengezulu, ikulumami iwe njengombethe, iwuluke njengemvula phezu kwehlungu nanjengomfefezwana phezu kweemila.

³ Ngambala ngizakumemezela ibizo lakaSomnini; nje-ke, dumisani ubukhulu bakaZimethu!

⁴ Ulidwala, umsebenzakhe uphelele, iye, zoke iindlela zakhe zilungile. UnguZimu wokwethembeka, uZimu onganasiphambeko, umsulwa begodu uneqiniso.

⁵ Kodwana abantwabakhe baziphethe ngameswe, kusukela kwakade basizukulwana esiphambeneko nesikhohlakeleko.

⁶ Leyo yindlela enithokoza ngayo uSomnini na? Nibabantu abaziindlhadlha nabanganangqondo! USomnini akasiyihlo owanidalako na? Iye, nguye owanenza bewaninzinzisa!

⁷ Khumbulani isikhathi esadlulako, niyelele okwenzeka ngesizukulwana ngesizukulwana; nibuze aboyihlo banikhombise, abaphathi benu, banidembele.

⁸ Lokha uZimu ongoPhezulu anikela izizwe ilifa lazo, nalokha nahlukanisa amadodana wabantu, wajamisa imikhawulo yabantu ukuya ngesibalo samadodana kaZimu.

⁹ Kodwana uSomnini wathatha abantu bakhe njengesabelo sakhe, iye, uJakopo waba lilifa lakhe.

¹⁰ Wamfumana enarheni elirhalawumba, endaweni engahlalwa muntu, emajukujukwini anabaphaphi; wamgona, wamtjheja, wambabalela njengehlavu yelihlo lakhe.

¹¹ Njengekhozi elikhanukeza idzinyani lalo ukuphapha, liphuphuruze ngehla kwalo, livule amaphikwalo, lilibambe, lilithwale ngawo,

¹² ngokunjalo noSomnini nguye kwaphela owamrholako; kungekho singazimu hlanu kwakhe.

¹³ Wamkhweza eendaweni eziphakemeko zenarha, wagoma iinthelo zommango; wamenza wazitika ngeliju edwaleni namafutha we-oliva elitjeni legwari.

¹⁴ Wazitika ngamakghamatha weenkomo nebisi leembuzi kanye namafutha weemvana; wazitika ngamaqama weBhatjhani neembuzi kanye namafutha wehliziyo yekoroyi; wazitika ngomhluzi wamadiribe, iye, wasela iwayini elisabilako.

¹⁵ Kodwana uJetjhuruni wanona bewatjakadula, iye, wanona, waba sibhumbudu bewaragalala. Watjhiya uZimu owamdalako, wanyefula iDwala lesindiswakhe.

¹⁶ Abantu bakaZimu bamvusela isikhwele ngabosingazimu abatjhili, bamthukuthelisa ngemifanekiso enyenyisako.

¹⁷ Bahlabela imimoya emimbi, izinto ezibosingazimu, okubozinyana abangazange babazi, izinto ezifike izolo, naboyihlo abangazange bazazi.

¹⁸ Ngitjho neDwala elakubelethako walikhohlwa, walibala uZimu owezwa ubuhlungu ngawe.

¹⁹ Lokha uSomnini nabona lokho, wathukuthela khulu ngebanga lokudabukiswa madodana namadodakazakhe

²⁰ bewathi: “Ngizokufihla ubuso bami kiwo, khengibone bonyana azokuphelelaphi ngombana asizukulwana esikhohlakeleko, abantwana abangathembekiko:

²¹ Bangivusela isikhwele ngento engasinguzimu, bangithukuthelisa ngezinto ezingatjho litho. Nje-ke, mina ngizabavusela isikhwele ngesingasizwe, ngibathukuthelise ngeendlhayela zabantu.

²² Lokha itukuthelwami nayivutha umlilo ubabule bekube sekuzikeni kwendawo yabafileko; uzakuqothula iphasi nesivuno salo, ukhothe isisekelo seentaba.

²³ Ngizabadindela ngamatshwenyeko, ngibarhululele ngemisubelami.

²⁴ Indlala izabaqoba, badliwe matshwenyeko nobhubhani wesifo. Ngizabanikelela ngamazinyo weembandana nangesihlungu seenrhurhubi.

²⁵ Endleleni isabula izabathathela abantwana, emizinabo kubuse ukwesaba. Kuzakubhubha amasokana kanye namatlawu, amasana kanye nabathukgheleko.

²⁶ Bengithe ngizabathanyela, ngisuse ukukhunjulwa kwabo ebantwini,

²⁷ kodwana azange ngifune ukuzwa isiphoqo sesitha sabo: Abajamelani babo bebazazitjhaya ngamanga, bathi, ‘Izandla zethu ngizo ezihlulileko; akusinguSomnini owenze koke lokhu.’ ”

²⁸ Basisizwe esinganatlha, abanawo umbono phakathi kwabo.

²⁹ Nangathana bebahlakaniphile, bebazakghona ukuzwisisa lokhu, bahlole bona siyini isiphetho sabo.

³⁰ Umuntu munye angeze agijimisa abaziinkulungwana nababili angeze balwise itjhumi leenkulungwana, ngaphandle kwanange iDwala labo libathengisile; iye, iKosabo ibalahlile!

³¹ Idwala abalithembako alifani neDwala lethu nezitha zethu kumele zikubone lokho.

³² Godu uSomnini wathi: “Amadiribabo abuya eSodoma esidiribeni seGomora. Amadiribabo anesihlungu nesitjhutha sakhona simunyu.

³³ Iwayini abazolisela lisihlungu seenyoka, isihlungu esibulalako samabululu.

³⁴ Lokhu kubulungwe kimi, kuvalelwe ngekumbenami yamagugu.

³⁵ Ukubuyiselela nokuhlomulisa kungokwami, ngesikhathi sakhona iinyawo zabo zizakutjhelela. Ngambala ilanga labo lehlekelele selitjhidele, iye, ilangelo libarhabile.”

³⁶ Iye, uSomnini uzokumela abantu bakhe abe nesirhawu eencekwini zakhe. Lokha nabona bonyana amandlazo aphelile sekusele bona zinyamalale zoke,

³⁷ uzakuthi: “Alo, baphi-ke abozinyana babo abalidwala ababalekela kilo,

³⁸ abozinyana abagoma amafutha wemihlabelwabo basele iwayini lomphahlwabo na? Abavele phela banisize! Baninikele umthunzi!

³⁹ Qalani-ke gadesi, mina ngingimi kwaphela; akunaZimu ngaphandle kwami! Mina ngiyabulala, ngibuye ngiphilise, nangilimazileko, ngibuye ngipholise; akakho ongasindisa esandleni sami.

⁴⁰ Ngambala ngiphakamisela isandla sami ezulwini ngifunge ngithi, ‘Ngokuphila kwami kwanini nanini:

⁴¹ Nangilola isabulami emanyazelako, isandla sami siyibambe bona ngigwebe, ngizazibuyiselela ezitheni zami, ngibuyiselele kilabo abangizondako.

⁴² Ngizakucwilisa imisubelami eengazini zababuleweko nabathunjiweko; khibe isabulami irhiribidela inyama yabosaziwako bezitha.’ ”

⁴³ Nina zizwe, thokozisani abantu bakaSomnini ngombana uzokubuyiselela iingazi zeenceku zakhe. Lokha nazibuyiselela ezitheni zakhe uzabe enzela abantu bakhe nenarhakhe itethelelo.

⁴⁴ UMosi wakhuluma woke amezwi wengoma leyo eendlebeni zabantu ngokusekelwa nguJotjhuwa umsa kaNuni.

⁴⁵ Kwathi lokha uMosi naqeda yoke ikulumakhe kuma-Israyeli woke,

⁴⁶ wathi: “Yelelani woke amezwi womthetho engiwamemezele njengobufakazi kini namhlanje ukuze niyale abantwabenu kobana bawalalele ngokutjheja.

⁴⁷ Akusimamezwi nje angatjho litho kini, kodwana abuphilo benu. Ngawo nizakuphila isikhathi eside enarheni eniyama iJordani kobana niyoyithumba.”

USomnini wazisa uMosi ngokuhlongakala kwakhe

⁴⁸ Khona mhlokho uSomnini wathi kuMosi:

⁴⁹ “Khuphukela entabeni i-Abarimu kwaMowabi, okuyintaba iNebo ngepumalanga yeJerikho bese ubukela iKanana, inarha engizoyinikela ama-Israyeli njengelifa lawo.

⁵⁰ Uzakuhlongakalela entabeni oya kiyo leyo, ulandele bekhenu njengombana no-Aroni umfowenu wahlongakala entabeni iRhori walandela bekhabo.

⁵¹ Lokhu kungebanga lokobana nobabili nalahlekelwa kungethemba phambi kwama-Israyeli emanzini weMeriba eKhadetjhi naniserhalawumbeni leTsini. Lapho azange nikhombise ukungihlonipha emehlweni wama-Israyeli.

⁵² Yeke uzakubona inarha leyo buqamama kwaphela, kodwana awuzungena enarheni engiyinikela ama-Israyeli.”