UDUTERONOMI 3 - IsiNdebele 2012 Translation

Ukuhlulwa kwaka-Ogi ikosi yeBhatjhani

¹ Sajika-ke sakhuphuka ngendlela yeBhatjhani. U-Ogi ikosi yakhona yaphuma nebutho layo loke bonyana isisahlele ngepi e-Edreyi.

² Kodwana uSomnini wathi kimi: “Ungamesabi ngombana ngimnikele esandleni sakho, yena nabo boke abantu bakhe kanye nenarhakhe. Umenze isenzo owasenza uSirhoni ikosi yama-Amori ogade ahlala eRhetjhibhoni.”

³ Yeke uSomnini uZimethu wanikela u-Ogi ikosi yeBhatjhani esandleni sethu kanye nabo boke abantu bakhe. Samumadlha bekwatlhoga namunye wabantu bakhe ophunyurhako.

⁴ Sathatha woke amadorobhakhe ngesikhatheso. Akunadorojana esingazange simemuke lona. Kwakumadorobho amatjhumi asithandathu, sahlanganisa soke isifunda i-Arigobho, okumbuso ka-Ogi eBhatjhani.

⁵ Woke lawo bekumadorobho aqiniswe ngemithangala ephakamileko, amasango neenqabo. Sathatha godu nemizi eminengi enganamithangala.

⁶ Sawarhayila nya njengombana senza kuSirhoni ikosi yeRhetjhibhoni nasirhayila elinye nelinye idorobho, okutjho amadoda, abafazi nababuthakathaka.

⁷ Kodwana yoke ifuyo nepango yedorobho sazithathela yona.

⁸ Nje-ke ngesikhatheso samuka amakhosi amabili wama-Amori ebegade angepumalanga yeJordani inarha, ukusuka emrhobeni we-Arinoni ukuya entabeni iRherimoni.

⁹ (AmaTsidoni abiza iRherimoni bona yiSiriyoni khibe ama-Amori wona athi yiSeniri. )

¹⁰ Iye, sathatha woke amadorobho wenarha yemibundu eligagadu, okutjho iGiliyadi yoke neBhatjhani yoke ukuyokufika eSaleka ne-Edreyi okumadorobho wombuso ka-Ogi weBhatjhani.

¹¹ (Ngu-Ogi yedwa ikosi yeBhatjhani owasalako kumisalela yamaRafa. Qala, umbhedakhe gade wenziwe ngesimbi, useRabha okuyihlokodorobho yama-Amoni. Gade umamitha amane ubude, ulimitha nesiquntu nesiqunjwana ububanzi ngesilinganiso esijayelekileko. )

Ukwabiwa kwenarha ngepumalanga yeJordani

¹² Lokha nasithumba inarha le ngesikhatheso, nganikela amaRubeni namaGadi isifunda ukusuka e-Aroweri okulidorobho elingemrhobeni we-Arinoni ukuyela ngetlhagwini kanye nesiquntu senarha yemibundu yakwaGiliyadi namadorobho wakhona.

¹³ Inarha eseleko yakwaGiliyadi nayo yoke iBhatjhani, okumbuso waka-Ogi, ngakunikela isiquntu sekoro kaManase. (Soke isifunda se-Arigobho, okutjho yoke iBhatjhani, godu sibizwa bonyana yinarha yeRafa.

¹⁴ UJayire osizukulwana sakaManase wathatha soke isifunda se-Arigobho okutjho iBhatjhani, ukuyokufika emkhawulweni wamaGetjhuri newamaMakathi. Wathiyelela isifundeso ngebizo lakhe wathi yiRhavothi-Jayire njengombana saziwa njalo nanamhlanje.)

¹⁵ UMakiri ngamnikela isifunda esingetlhagwini yeGiliyadi

¹⁶ bese amaRubeni namaGadi ngawanikela isifunda esingesewula yeGiliyadi ukuyokufika emrhobeni we-Arinoni. Imikhawulo yawo bekumlanjana we-Arinoni ngesewula, umlanjana weJabokhi ngetlhagwini, isifunda sama-Amoni ngetlhagwini-pumalanga,

¹⁷ umrhoba i-Araba ngetjingalanga (okutjho umlambo iJordani ukusuka eKinerethi ukuyokufika elwandle le-Araba, okulilwandle leTswayi). Umkhawulo ngesewula-pumalanga bekumathomo wentaba iPisiga.

¹⁸ Nganiyala ngesikhatheso ngathi: “USomnini uZimenu uninikele inarha le bona ibe lilifa lenu. Woke amadoda anesibindi azakuyama ahlomile ngaphambi kwabafowenu ama-Israyeli.

¹⁹ Kodwana abafazi benu, ababuthakathaka benu kanye nefuywenu njengombana ninefuyo enengi nje, bazakusala ngemadorobheni engininikele wona;

²⁰ bekube kulapha uSomnini anikela khona abafowenu ukuphumula njengombana wenza kini, nabo bathumba inarha ebayiphiwa nguSomnini uZimenu ngaphetjheya kweJordani. Ngemva kwalapho-ke nizakubuyela omunye nomunye endawenakhe enganinikela yona.”

Ukubekwa kwakaJotjhuwa esikhundleni sakaMosi

²¹ Ngesikhatheso ngayala uJotjhuwa ngathi: “Amehlwakho abone koke uSomnini uZimenu akwenze emakhosini amabili la. USomnini uzakwenza soneso nemibusweni enizokudabula kiyo.

²² Anizuyesaba ngombana nguSomnini uZimenu onilwelako.”

²³ Yeke ngabawa uSomnini ngesikhatheso ngathi:

²⁴ “Awu, Somnini Somandla, sewuthome ukutjengisa incekwakho ubukhulu bakho nesandla sakho esinamandla. Ngimuphi uzinyana emkayini namkha ephasini ongenza imisebenzi engaka kanye nezenzo ezikulu ezinjengezakho na?

²⁵ Bengithi uSomnini akangivumele ngiyame, ngiyokubona inarha ehle ngaphetjheya kweJordani, inarha ehle yeentatjana kanye neLibhanoni.”

²⁶ Kodwana uSomnini wangithukuthelela ngebanga lenu, azange angilalele, wathi kimi: “Sekwanele, ungabe usakhuluma litho kimi ngendaba le.

²⁷ Yenyukela esiqongolweni sePisiga, uphakamisele amehlwakho ngetjingalanga, ngetlhagwini, ngesewula nangepumalanga, uzibonele wena ngokwakho ngombana awuzokuyama iJordani le.

²⁸ Kodwana yala uJotjhuwa, umkhuthaze bewumqinise ngombana nguye ozakuyama nabantwaba. Yena uzabathumbisa inarha ozayibona.”

²⁹ Nje-ke sahlala emrhobeni ngaphetjheya kweBhethe-Pewori.