UDUTERONOMI 29 - IsiNdebele 2012 Translation

Isivumelwano kumele sivuselelwe qobe mnyaka

¹ Naka amezwi wesivumelwano uSomnini ayala ngawo uMosi bona asenze nama-Israyeli enarheni yakwaMowabi, ngaphandle kwaleso asenza nawo eHorebe.

² UMosi wabiza woke ama-Israyeli wathi kiwo: “Nikubonile koke uSomnini akwenze phambi kwenu enarheni yeGibhide kuFaro neencekwini zakhe zoke kanye nenarhenakhe yoke.

³ Lokhu kutjho amatshwenyeko amakhulu enzeka phambi kwenu, iimbonakaliso nemikarisomraro emikhulu.

⁴ Kodwana kunamhlanje kwaphela lapha uSomnini aniphe umkhumbulo wokuzwisisa, amehlo wokubona neendlebe zokuzwa.

⁵ Nginirhole iminyaka ematjhumi amane erhalawumbeni, izambatho zenu azange zirhalukele emizimbenenu, namapatlagwanenu azange adabuke eenyaweni zenu.

⁶ Azange nigome isikwa, azange nisele iwayini namkha utjwala ukuze nazi bonyana uSomnini unguZimenu.

⁷ “Bona nifike endaweni le, uSirhoni ikosi yeRhetjhibhoni no-Ogi ikosi yeBhatjhani bajamelana nathi epini kodwana sabahlula.

⁸ Sathatha inarhabo sayinikela bakwaRubeni, bakwaGadi kanye nesiquntu sekoro yakwaManase njengelifa labo.

⁹ Ngalokho tjhejani ukwenza amezwi wesivumelwaneso ukuze niphumelele kikho koke enikwenzako.

¹⁰ “Noke nijame namhlanje phambi kwakaSomnini uZimenu, iinhloko zeenkoro zenu, abaphathi benu kanye neenkhulu zenu, woke amadoda wakwa-Israyeli,

¹¹ abantwabenu, abafazi benu, neenkhonzi ezisekampenenu, ngitjho nabanithezela iinkuni nabanikhela amanzi

¹² ukuze ningene esivumelwaneni sakaSomnini uZimenu asenza nani namhlanje kanye nokuzithathela amanikelela akhambisana naso.

¹³ Ngaleyondlela uSomnini unenze abantu bakhe namhlanje, naye uzakuba nguZimenu njengombana anithembisile nanjengombana afunga kiboyihlomkhulu u-Abrahamu, u-Isaka noJakopo.

¹⁴ Isivumelwanesi namanikelela akhambisana naso angisenzi nani kwaphela;

¹⁵ ngisenza nanamkha ngubani ojame nathi phambi kwakaSomnini uZimethu namhlanje kanye nalabo abangekho lapha.

¹⁶ “Niyazi bonyana besihlala njani enarheni yeGibhide, nokobana saphuma njani hlangana nezizwe esadlula kizo.

¹⁷ Godu nibonile iinyenyiso zazo, okutjho abozinyana beengodo nebamatje, besiliva nebegolide ezibalotjhako.

¹⁸ Mhlamunye kungaba khona phakathi kwenu indoda, umfazi, umndeni namkha ikoro enehliziyo esele ihlanuke uSomnini uZimethu bona idlhemadlheme ngemva kwabosingazimu bezizwezo. Nakube kunjalo kuzakumila umrabhu onobuthi neenthelo ezimunyu:

¹⁹ Umuntu onjalo uzakuthi nezwa amezwi wamanikelela akhambisana nesivumelwano lawo azibusise ehliziywenakhe athi, ‘Nokho ngizakubulungeka, ije ngikhamba ngikhunyalele kangaka ehliziywenami ngombana uSomnini akazukuvuthisa isikhuni esomileko hlangana nezimanzi.’

²⁰ USomnini angeze amcolela kodwana itukuthelo kaSomnini nesikhwele sakhe kuzakuvutha phezu komuntu loyo, namanikelela atlolwe encwadinapha azakwehlela phezu kwakhe bese uSomnini usula ibizo lakhe ngaphasi komthunzi welanga.

²¹ USomnini uzamkhupha hlangana nazo zoke iinkoro zakwa-Israyeli ehlelwe yihlekelele ukuya ngawo woke amanikelela akhambisana nesivumelwano atlolwe ngencwadini yomthetho le.

²² Isizukulwana esizako, okutjho abantwabenu abazakuvela ngemva kwenu, nomqhamuka ovela ezizweni uzakubona woke amahlungu wenarha nezifo uSomnini aziphose phezu kwayo.

²³ Inarha yoke izakwembathwa litswayi nesibabula ibe mlotha lapha kungeze kwatjalwa bekwamila litho khona. Ngitjho neemila angeze zamila lapho. Kuzakuba njengeSodoma neGomora, i-Adima neTseboyimu uSomnini aziketula ngetukuthelo evuthako.

²⁴ Zoke izizwe zizakubuza zithi, ‘Kubayini uSomnini enze into enje enarheni le? Kutheni ngetukuthelo evutha kangaka?’

²⁵ “Kuzaphendulwa kuthiwe, ‘Kungombana bahlanuke isivumelwano sakaSomnini uZimu waboyisemkhulu, asenza nabo nabakhupha enarheni yeGibhide.

²⁶ Badlhemadlhema bayokulotjha abosingazimu bebabakhothamela. Abosingazimu abangabaziko begodu uSomnini angazange abanikele kibo.

²⁷ Ngalokho-ke itukuthelo kaSomnini yavutha phezu kwenarha le, wayehlisela woke amanikelela atlolwe encwadinapha.

²⁸ USomnini wabaruthula enarhenabo ngetukuthelo, ngobukhali nangelaka elikhulu, wabalahlela enarheni enye njengombana kunjalo namhlanje.’

²⁹ “Izinto ezifihlakeleko ngezikaSomnini uZimethu, kodwana lokho okwambuliweko kungekwethu nabantwabethu isiphelani ukuze senze woke amezwi womthetho lo.”