UDUTERONOMI 28 - IsiNdebele 2012 Translation

Iimbusiso zabagcina isivumelwano

¹ Nanilalela ilizwi lakaSomnini uZimenu, niyelela ukwenza yoke imiyalwakhe enginiyala ngayo namhlanje, uSomnini uZimenu uzoniphakamisa ngaphezu kwazo zoke izizwe zephasi.

² Iye, nanilalela ilizwi lakaSomnini uZimenu, zoke iimbusiswezi zizakwehlela phezu kwenu, zinembathe.

³ Nizakubusiswa ngedorobheni, nibusiswe nemasimini.

⁴ Kuzakubusiswa iimbeletho zenu, iinthelo zequlwanenu, inzalo yeenlwana zenu: Iinkomo, izimvu neembuzi zenu zizakwanda.

⁵ Kuzakubusiswa iinqwebu zenu nezitja zenu zokudubela.

⁶ Nizakubusiswa naningenako nalokha naniphumako.

⁷ USomnini uzakwenza bonyana izitha zenu ezinivukelako zihlulwe phambi kwenu, zizanisahlela ngandlelanye, zibaleke phambi kwenu ngeendlela ezilikhomba.

⁸ USomnini uzakuvulela iimbusiso phezu kweenlulu zenu nakikho koke enikwenzako. Iye, uzanibusisa enarheni aninikela yona.

⁹ USomnini uzanijamisa njengesizwe esicwengileko kuye njengombana afunga kini, iye, nanigcina imiyalo kaSomnini uZimenu benikhambe eendleleni zakhe.

¹⁰ Boke abantu bephasi bazakubona bonyana nibizwa ngebizo lakaSomnini, yeke bazanesaba.

¹¹ USomnini uzanandisela ipumelelo: Nizakuba nabantwana abanengi, ifuyo enengi neenthelo ezinengi zequlwani enarheni ayifungele ukuyinikela aboyihlomkhulu.

¹² USomnini uzanivulela umnonwakhe omuhle, okumazulu, kobana aniphe izulu enarhenenu ngesikhathi sakhona abe abusise woke umsebenzi wezandla zenu. Nizakuboleka izizwe ezinengi kodwana nina ningaboleki litho kizo.

¹³ USomnini uzanenza ihloko, ningabi msila. Nizakukhuphuka njalo ningehli. Lokho kuzakwenzeka kwaphela nanilalela imiyalo kaSomnini uZimenu enginiyala ngayo namhlanje kobana niyilonde beniyenze,

¹⁴ nalokha naningaphambukiko emazwini enginiyala ngawo namhlanje ngokudlhemadlhema ngemva kwabosingazimu nibalotjhe.

Amanikelela wabangagcini isivumelwano

¹⁵ Naningalaleli ilizwi lakaSomnini uZimenu namkha ningatjheji ukwenza yoke imiyalwakhe neemiso zakhe enginiyale ngazo namhlanje, yeke woke amanikelela la azakwehlela phezu kwenu anembathe.

¹⁶ Nizakunikelelwa edorobheni, ninikelelwe nemasimini.

¹⁷ Kuzakunikelelwa iinqwebu zenu, kunikelelwe nezitja zenu zokudubela.

¹⁸ Kuzakunikelelwa iimbeletho zenu, iinthelo zequlwanenu, iinkomo, izimvu neembuzi zenu.

¹⁹ Nizakunikelelwa naningenako, ninikelelwe nalokha naniphumako.

²⁰ USomnini uzanithumelela iinthuweleliso, ihlangahlangano nokungezwani kikho koke enikwenzako kufikela lapha nirhayileka khona. Nizakuphela msinyana ngebanga lezenzo zenu ezimbi nanimhlubukako.

²¹ USomnini uzakubangela bonyana amatshwenyeko aninamathele abe aniqotjhe enarheni eningena kiyo bonyana niyithumbe:

²² Izanibetha ngesifo esiqeda amandla nangomgomani, nokutjhisa komzimba nokuhlangahlangana kwengqondo; inibethe ngesomiso, ububori nokukghora. Koke lokhu kuzaninamathela bekunibhubhise nya.

²³ Umkayi ngehla kwenu uzakuba yikoporo nomhlaba ngaphasi kwenu ube yisimbi.

²⁴ USomnini uzakwenza izulu enarhenenu libe lithuli neputjhana, uzakwehlela phezu kwenu avela emkayini abe anirhayile nya.

²⁵ USomnini uzanenza nihlulwe zizitha zenu, nizisahlele ngandlelanye kodwana nizakubaleka phambi kwazo ngeendlela ezilikhomba. Nizakuba sibonelo esesabekako emibusweni yoke yephasi:

²⁶ Iindumbu zenu zizakuba kugoma kwazo zoke iinyoni zomkayi neembandana zephasi. Kuzakutlhogeka umuntu wokuzethusa.

²⁷ USomnini uzanibetha ngamathumba weGibhide, iinlonda, ukubhibhidlha nangobuzikazikani besikhumba okungapholiko.

²⁸ USomnini uzanibetha ngokurhapha nangobuphofu, nihlangane iinhloko,

²⁹ nizakuphumbutha emini ka bha inga kusemnyameni njengesiphofu. Anizukuphumelela eendleleni zenu, nizakuhlala nigandelelwe benidlelezelwe njalo, nizakutlhoga umuntu ozanisiza.

³⁰ Omunye wenu nabona intombi, omunye umuntu uzayigagadlhela. Nizakwakha iinkumba kodwana ningazihlali, nitjale isidiribe kodwana ninganandiphi neenthelo zakhona.

³¹ Kuzakuhlatjwa iinkomo zenu niqalile, ningagomi neqatjhana lakhona. Kuthathwe abodumbana benu ngekani niqalile, bangasabuyiselwa kini. Izimvu zenu zizakunikelwa izitha zenu, kungabi nomuntu onisizako.

³² Amadodana namadodakazenu azakunikelwa abanye abantu ningabi namandla wokukukhandela lokho. Kwenu kuzakuba kuhlala nigolozele ukubuya kwawo.

³³ Isizwe eningasaziko sizakurhiribidela iinthelo zequlwanenu nomsebenzi woke wezandla zenu. Nizakuhlala nigandelelwe njalo beniphathwe kumbi

³⁴ kufikela lapha nihlanyiswa khona ngilokho enikubonako.

³⁵ USomnini uzonibetha ngamathumba amambi nangalaphekiko emadolweni neenyonga, ehlele eenyaweni abe akhuphukele neenhloko.

³⁶ USomnini uZimu uzanithatha nekosi enizibekele yona inise esizweni eningasaziko nina naboyihlomkhulu. Lapho-ke nizakulotjha abosingazimu besigodo nebelitje.

³⁷ Nizakuba sithuko, isiga nesiphoqo phakathi kwabo boke abantu lapha uSomnini azanisa khona.

³⁸ Nizakutjala imbewu enengi emasimini, kodwana nivune idlanzana ngombana isivuno senu sizakurhiribidelwa yintethe.

³⁹ Nizakutjala isidiribe benisihlunge, kodwana anizukusela iwayini lakhona namkha nikhe amadiribe wakhona ngombana azakudliwa ziimbungu zobubori.

⁴⁰ Nizakuba nemithi ye-oliva esifundeni senu soke, kodwana anizozizesa ngamafutha wakhona ngombana ama-olivenu azakuthintitheka.

⁴¹ Nizakubeletha amadodana namadodakazi, kodwana akazukuba ngewenu ngombana azakuthunjwa.

⁴² Intethe izakumumela yoke imithenu neenthelo zequlwanenu.

⁴³ Isikhonzi esiphakathi kwenu sizakuphumelela sindlondlobale sibe ngehla kwenu, nina nichake nehlele phasi phasi.

⁴⁴ Nizakuboleka kiso, kungasaba ngiso esiboleka kini, sizakuba yihloko nina nibe msila.

⁴⁵ Woke amanikelela la azanehlela, anilale nje, abe anembathe kufikela lapha nirhayileka khona nya ngombana azange nilalele ilizwi lakaSomnini uZimenu, ukulonda imiyalwakhe nemithethwakhe aniyale ngayo.

⁴⁶ Azakuba njengesibonakaliso nesimangaliso phezu kwenu naphezu kweenzukulwana zenu nini nanini.

⁴⁷ Ngombana nakhu anizange nilotjhe uSomnini uZimenu ngethabo nangokuthokoza kwehliziyo ngebanga lokobana benisutha,

⁴⁸ ngalokho nizakusebenzela izitha zenu uSomnini azazithumela bona zijamelane nani. Zizanibulalisa ngendlala, zinibangele umrhawu, zinihlubulise nibe bhunubhunu niswele koke. USomnini uzakubeka ijogi lesimbi eentanyeni zenu abe anibhubhise nya.

⁴⁹ USomnini uzakuletha isizwe esizakujamelana nani esivela kude epelazwe, esizakufika inga likhozi, isizwe eningazi ilimi laso,

⁵⁰ isizwe esinelunya nesingekhe sarhawukela umuntu omdala namkha sibe nomusa ebantwaneni.

⁵¹ Sizakufika siqothule inzalo yefuywenu neenthelo zequlwanenu kufikela lapha nirhayileka khona: Angeze sanitjhiyela ikoroyi, iwayini namkha amafutha we-oliva. Singanitjhiyeli inzalo yeenkomo, yezimvu neembuzi zenu kufikela lapha sinibhubhisa khona.

⁵² Sizanivimbezela kiwo woke amadorobhenu enarhenenu yoke, kufikela lapha kugirika khona imithangalenu ephakamileko neqinileko enithembele kiyo. Iye, sizanivimbezela kiwo woke amadorobhenu enarhenenu yoke eniyinikelwe nguSomnini uZimenu

⁵³ benitle abantwabenu, inyama yamadodanenu namadodakazenu eniwaphiwe nguSomnini uZimenu. Lokho kuzakwenzeka esizini nebudisini enizakuhlunguphazwa ngabo zizitha zenu.

⁵⁴ Ngitjho nendoda ephakathi kwenu ethambileko ngombana ikhuliswe ngokutotoswa khulu, mhlokho ayizukutlhuwela umfowayo, umkayo emthanda khulu kanye nomntwanayo esele kusele yena yedwa zwi.

⁵⁵ Ayizukupha namunye wabo inyama yabantwabayo eyigomako ngombana kuzabe kungasenalitho layo eliseleko. Lokho kuzakwenzeka esizini nebudisini enizakuhlunguphazwa ngabo zizitha zenu kiwo woke amadorobhenu.

⁵⁶ Ngitjho nomfazi ophakathi kwenu othambileko nodedesa khulu, ongekhe agadanga ubunyonyo ngendlela adedesa ngayo, mhlokho angeze atlhuwela indodakhe ayithanda khulu, indodanakhe nendodakazakhe.

⁵⁷ Akazukubapha ingubo yomntwana ephuma hlangana nemilenzakhe nenyama yomtwanakhe ambelethako. Koke lokho uzakutlela ngemsitheleni ngebanga lokuswela kwakhe. Lokho kuzakwenzeka esizini nebudisini enizakuhlunguphazwa ngabo zizitha zenu emadorobhenenu.

⁵⁸ Naningaqapheli ukwenza woke amezwi womthetho lo atlolwe encwadinapha ukuze nesabe ibizo elidumileko nelesabekako lakaSomnini uZimenu,

⁵⁹ khona-ke uSomnini uzanehlisela nina neenzukulwana zenu amatshwenyeko eningazange kheniwabone, amatshwenyeko amakhulu nangapheliko kanye namagulo amambi angalaphekiko.

⁶⁰ Uzanehlisela zoke izifo zeGibhide ebenizesaba, ngithi zizaninamatha.

⁶¹ Godu uzanehlisela woke amagulo namatshwenyeko angakatlolwa ngencwadini yomthetho le benirhayileke nya.

⁶² Nizakusala niyikereketjhana phezu kobana beniliwoma njengeenkwekwezi zomkayi ngombana azange nilalele ilizwi lakaSomnini uZimenu.

⁶³ Njengombana uSomnini athabela ukunenzela okuhle abe anandise, ngokunjalo uzakuthabela ukuniqeda abe anirhayile. Nizakuqotjhwa enarheni eningena kiyo bona niyithumbe.

⁶⁴ USomnini uzanihlakaza hlangana nabantu boke, ukusuka egumbini elinye lephasi ukuya kelinye. Lapho nizakulotjha abosingazimu besigodo nebelitje eningabaziko nina ngitjho naboyihlomkhulu.

⁶⁵ Anizukufumana ukuthula hlangana nezizwezi; iye, iinyawo zenu angeze zaphumula. USomnini uzokwenza iinhliziyo zenu zithuthumele, amehlwenu afifiyele nemiphefumulwenu iphelelwe mamandla;

⁶⁶ ipilwenu izakulengela erharheni. Ubusuku nemini nizakuphila ngevalo ningabi nesiqiniseko ngepilwenu.

⁶⁷ Ngebanga lokugcwala kwevalo eenhliziyweni zenu nalokhu okuzakubonwa mamehlwenu, nizakuthi ekuseni, “Hayi, thana sele kusebusuku!” bese kuthi entambama nithi, “Hayi, thana sekusile!”

⁶⁸ USomnini uzanibuyisela eGibhide ngemikhumbi, ikhambo enganithembisa bona angeze nisalibona. Lapho nizazinikela ezitheni zenu njengamakhoboka namakhobokakazi, kodwana akunamuntu ozanithenga.