UDUTERONOMI 27 - IsiNdebele 2012 Translation

Ukwakhiwa kwe-aldari entabeni i-Ebali

¹ UMosi ngokusekelwa baphathi bakwa-Israyeli wayala abantu ngamezwi alandelako: Gcinani yoke imiyalo enginiyala ngayo namhlanje.

² Mhlana niyama iJordani niya enarheni uSomnini uZimenu aninikela yona, zilungiseleleni ukubeka amatje amakhulu nokuwatjhatjha ngepembe,

³ ukuze nitlole phezu kwawo woke amezwi womthetho lo. Lokho nikwenze naniyamako kobana ningene enarheni uSomnini uZimenu aninikela yona, inarha egeleza ibisi neliju, njengombana uSomnini uZimu waboyihlomkhulu anithembisa.

⁴ Nasele niyame iJordani, nizakubeka amatje enginiyale ngawo namhlanje la, entabeni i-Ebali, niwatjhatjhe ngepembe.

⁵ Nakhele lapho uSomnini uZimenu i-aldari lamatje, ningawaqoqodi ngesisetjenziswa sesimbi.

⁶ Nizakwakhela uSomnini uZimenu i-aldari lamatje angakabazwa, nenzele uSomnini uZimenu iminikelo yokutjhiswa kilo.

⁷ Yenzelani lapho iminikelo yetjhebiswano, nigomele khonapho benijekezele phambi kwakaSomnini uZimenu.

⁸ Qinisekisani bonyana nitlole woke amezwi womthetho lo phezu kwamatjapho abonakale kuhle.

Ukumenyezelwa kwamanikelela entabeni i-Ebali

⁹ UMosi ngokusekelwa baphristi bamaLevi wathi kiwo woke ama-Israyeli ngamezwi alandelako: Thulani nithi du, nilalele nina ma-Israyeli: Namhlanje sele nibabantu bakaSomnini uZimenu.

¹⁰ Ngalokho lalelani uSomnini uZimenu, nilonde imiyalwakhe neemiso zakhe, enginiyala ngazo namhlanje.

¹¹ Godu uMosi wayala abantu khona mhlokho ngamezwi la:

¹² Nasele niyame iJordani, iinkoro ezilandelako zizakujama e-aldarini ngehlangothini lentaba iGerizimu lokha nakumenyezelwa iimbusiso: bakwaSimiyoni, bakwaLevi, bakwaJuda, bakwa-Isakari, bakwaJosefa nebakwaBhenjamini.

¹³ Iinkoro ezilandelako zizakujama e-aldarini ngehlangothini lentaba i-Ebali lokha nakumenyezelwa amanikelela: bakwaRubeni, bakwaGadi, bakwa-Atjhere, bakwaZebuloni, bakwaDani nebakwaNafitali.

¹⁴ AmaLevi azakumemezela kibo boke abantu bakwa-Israyeli ngelizwi elikhulu athi:

¹⁵ “Akanikelelwe umuntu obaza namkha obumba isithombe bese asijamise ngemsitheleni, okuyinto eyenziwe ngezandla zakasosino. Lokho kusinyenyiso kuSomnini.” Boke abantu bazakuphendula bathi: “Amen!”

¹⁶ “Akanikelelwe umuntu odelela uyise nonina.” Boke abantu bazakuthi: “Amen!”

¹⁷ “Akanikelelwe otjhidisa isikhonkhwani sakamakhelwana.” Boke abantu bazakuthi: “Amen!”

¹⁸ “Akanikelelwe umuntu odurhisa isiphofu endleleni.” Boke abantu bazakuthi: “Amen!”

¹⁹ “Akanikelelwe umuntu ohlanakezela ilungelo lesikhonzi, lentandani nelomhlolokazi.” Boke abantu bazakuthi: “Amen!”

²⁰ “Akanikelelwe umuntu olalana nomkayise ngombana wembule ubuze bomkayise.” Boke abantu bazakuthi: “Amen!”

²¹ “Akanikelelwe umuntu olalana nanamkha mhlobo bani wesilwana.” Boke abantu bazakuthi: “Amen!”

²² “Akanikelelwe umuntu olalana nodadwabo, kungaba yindodakazi kayise namkha indodakazi kanina.” Boke abantu bazakuthi: “Amen!”

²³ “Akanikelelwe umuntu olalana nomkhwekazakhe.” Boke abantu bazakuthi: “Amen!”

²⁴ “Akanikelelwe umuntu obulala omunye umuntu ngemsitheleni.” Boke abantu bazakuthi: “Amen!”

²⁵ “Akanikelelwe umuntu owamukela ukufunjathiswa kobana abulale umuntu, ngokwenza njalo athulule iingazi ezimsulwa.” Boke abantu bazakuthi: “Amen!”

²⁶ “Akanikelelwe umuntu ongadzimeleli emazwini womthetho lo.” Boke abantu bazakuthi: “Amen!”