UDUTERONOMI 26 - IsiNdebele 2012 Translation

Iinthelo zokuthoma neminikelo yokwetjhumi

¹ Nawufika enarheni uSomnini uZimakho akunikela yona kobana ibe lilifa lakho bese uyayithumba, uhlale kiyo,

² uzakuthatha ezinye zazo zoke iinthelo zokuthoma zequlwanakho, ozivuna enarhenakho oyiphiwe nguSomnini uZimakho, uzifake ngesiqwebini, uye endaweni ezakukhethwa nguSomnini uZimakho kobana ajamise ibizo lakhe lapho.

³ Uye kumphristi osesikhundleni ngesikhatheso, uthi kuye: “Ngimemezela ilangeli kuSomnini uZimakho kobana ngifikile enarheni uSomnini ayifungela kibobamkhulu kobana uzanginikela yona.”

⁴ Yeke umphristi uzakuthatha isiqwebu esandleni sakho asibeke phambi kwe-aldari lakaSomnini uZimakho.

⁵ Uzakuvuma phambi kwakaSomnini uZimakho uthi: “Ubaba gade amAramiya onguzulani, wehlela eGibhide waba sikhonzi lapho, umndenakhe ulidlanzana. Lapho wanda waba sisizwe esikhulu, okutjho esinamandla nesinengi ngesibalo.

⁶ AmaGibhide thina asiphatha kumbi, asigandelela, asithwesa umthwalo obudisi.

⁷ Salila kuSomnini uZimu wabobamkhulu. USomnini wasizwa isililo sethu, wabona isizi lethu, ubudisi nokuhlunguphazwa kwethu.

⁸ Wasikhupha eGibhide ngesandla esinamandla nangesiphanga sakhe, ngokwesabeka okukhulu, ngeembonakaliso nemikarisomraro.

⁹ Wasiletha lapha, wasinikela inarha le, inarha egeleza ibisi neliju.

¹⁰ Qala-ke, gadesi ngiletha iinthelo zokuthoma zequlwani uSomnini anginikele yona.” Uzakubeka isiqwebu phambi kwakaSomnini uZimakho, ukhothame phambi kwakhe.

¹¹ Uzakujekezela kibo boke ubuhle obenzelwe nguSomnini uZimakho wena nomndenakho, umLevi kanye nesikhonzi esikhonze phakathi kwenu.

¹² Nasele uqede ukukhokha koke kwetjhumi kwesivuno sakho emnyakeni wesithathu, okumnyaka wokwetjhumi ukunikele umLevi, isikhonzi, intandani nomhlolokazi ukuze bagome basuthe edorobheni lakho.

¹³ Nje-ke uzakuthi phambi kwakaSomnini uZimakho: “Ngisisusile isipho esikhethekileko endlinami, khulukhulu ngisinikele umLevi, isikhonzi, intandani kanye nomhlolokazi ukuya ngayo yoke imiyalo uSomnini angiyale ngayo, azange ngeqe namunye godu azange ngiyikhohlwe.

¹⁴ “Azange ngigome kokwetjhumi nangizilileko; azange ngisuse ingcenye yakhona nangisasilapheleko; azange ngiphahle ngengcenye yakhona kwabafileko. “Ngilalele ilizwi lakaSomnini uZimami. Ngenze koke engikuyalwe nguSomnini.

¹⁵ USomnini akaqale asendawenakhe ecwengileko, ezulwini bese abusise abantu bakhe u-Israyeli kanye nequlwani uSomnini asinikele yona njengombana uSomnini afunga kibobamkhulu, inarha egeleza ibisi neliju.”

Isimemezelo sokulalela imiyalo kaSomnini

¹⁶ Namhlanje uSomnini uZimenu uyaniyala kobana nenze iimiso nemithetho le. Ngalokho tjhejani niyenze ngeenhliziyo zenu nangemiphefumulwenu epheleleko.

¹⁷ Nivumile namhlanje kobana uSomnini unguZimenu, nathi nizokukhamba eendleleni zakhe, nilonde iimiso zakhe nemiyalwakhe kanye nemithethwakhe, nilalele ilizwi lakhe.

¹⁸ USomnini naye umemezele namhlanje bona nisisizwe esingesakhe njengombana anithembisile. Ngalokho londani yoke imiyalwakhe.

¹⁹ USomnini uzaniphakamisa ngaphezu kwazo zoke izizwe azidalileko, ngokudunyiswa, ngokwaziwa nangokuhlonitjhwa. Nizakuba babantu abacwengileko kuSomnini uZimenu njengombana akhulumile.