UDUTERONOMI 25 - IsiNdebele 2012 Translation

¹ Nakube amadoda ayararana bese aya ebandla, umgwebi abange umlandwawo, akhuphe omsulwa, asole onomlandu

² bese indoda enomlandu leyo kumele irithwe, umgwebi uzayibhambalalisa phasi irithwe phambi kwakhe kube mivuvu ekhambisana nomlandwayo.

³ Ingarithwa imivuvu ematjhumi amane, kodwana kungadluli lapho. Namritha ukudlula lapho umfowenu lo, uzakuhlaziseka emehlwenenu.

⁴ Ungafaki ikomo isifonyo lokha nayibhula ibhali nekoroyi.

⁵ Nakube abafo bahlala ndawonye bese omunye wabo uhlongakala anganandodana, umfazi wohlongakeleko angaphakeli umuntu ongasingowomndeni, okutjho iphandle. Kumele aphakele umfowabo lendodakhe, amthathe abe mkakhe, agcine isiko kuye njengomrharibakhe.

⁶ Indodana elizibulo ezakubelethwa, izakuba ngeyomfowabo ohlongakeleko ukuze ibizo lakhe lingasuswa kwa-Israyeli.

⁷ Nakube indoda leyo ayithandi ukungena umkamfowabo, umkamfowabo uzakukhuphukela kubaphathi esangweni afike athi: “Umrharibami kazi uyala ukuvusa ibizo lomfowabo kwa-Israyeli. Akafuni ukugcina isiko kimapha.”

⁸ Abaphathi bedorobho bazambiza-ke bakhulume naye. Nakube uyaragalala athi: “Ngithi angimfuni!”

⁹ Khona-ke umkamfowabo loyo uzakuya kuye phambi kwabaphathi afese amhlubulise ipatlagwana, amkhafulele ebusweni athi kuye: “Kuzakuba njalo endodeni engafuni ukuvusa umuzi womfowabo.”

¹⁰ Umndenakhe uzakwaziwa kwa-Israyeli bona ngowaHlutjuliswa iPatlagwana.

¹¹ Nakube amadoda ayalwa bese umfazi wendodenye atjhidele bona alamulele indodakwakhe ebhudungelweko, atjhubelele indoda leyo ngepahlayo yangaphasi,

¹² nizakuqunta isandla somfazi loyo, ilihlo lenu lingamtlhuweli.

¹³ Ningabi nemihlobo emibili yamatje wokulinganisa, amakhulu namancani, ngeembadeni zenu.

¹⁴ Ningabi namathungana amabili wokulinganisa, amakhulu namancani, ngeenkumbeni zenu.

¹⁵ Yibani nesilinganiso sinye seqiniso, okulilitje nethungana ukuze amalangenu ande enarheni uSomnini uZimenu aninikela yona.

¹⁶ Iye, uSomnini uZimenu uyabanyenya boke abenza izinto ezinjalo, okutjho abarhweba ngekohliso.

¹⁷ Khumbulani enakwenziwa ngu-Amalekhi naniphuma eGibhide:

¹⁸ Kwathi lokha nanidiniweko begodu niphelelwe mamandla wanisahlela endleleni. Warhayila boke ebebasemuva, wangesaba uZimu.

¹⁹ Ngalokho emva kobana uSomnini uZimenu aninikele ukuphumula ezitheni zenu zoke, enarheni uSomnini uZimenu aninikela yona bona ibe lilifa lenu, susani zoke iinkhumbuzo zaka-Amalekhi ngaphasi komthunzi welanga. Ningakhohlwa.