UDUTERONOMI 24 - IsiNdebele 2012 Translation

¹ Nakube indoda ithatha umfazi ibe myenakhe, kuthi ngemva kwesikhathi izifumane ingasenakareko ngaye ngebanga lokobana ibone ubutjhophori kuye, kumele itlole incwadi yesahlukaniso imnikele yona esandleni, imkhuphe emzinayo.

² Nakube umfazi loyo uyaphuma akhambe emzini wendoda leyo, athathwe ngenye indoda,

³ nayo izizwe inesicasucasu ngaye itlole incwadi yesahlukaniso imnikele yona esandleni beyimkhuphe emzinayo, namkha nakube iyahlongakala,

⁴ indodakhe yokuthoma eyamtlhalako ayisenalungelo lokumthatha godu njengomkayo ngemva kobana arhubutjhiwe. Lokho kusinyenyiso phambi kwakaSomnini. Ningalethi umlandu enarheni uSomnini uZimenu aninikela yona bona ibe lilifa lenu.

⁵ Nakube indoda iqeda ukuthatha, ingaphumi nepi namkha inikelwe nanyana ngimuphi umsebenzi okatelelako. Kumele itjhaphuluke ibe sekhaya umnyaka munye kobana ithokozise umkayo emthetheko.

⁶ Kungabi nomuntu othatha ilitje lokugayela njengesibambiso ngitjho nanyana kungaba yimbokotho ngombana uzabe abambisa ngepilo.

⁷ Nakube indoda ifunyanwa yeba omunye wabafowabo, okumumuntu wakwa-Israyeli bese yenane ngaye njengekhoboka namkha imthengise, yeke alibulawe iselelo. Ngalokho nizakuthanyela ubumbi phakathi kwenu.

⁸ Yelelani bona nanisahlelwe likhwekhwe, nitjheje ukwenza ukuya ngakho koke abaphristi bamaLevi abanifundise ngakho. Tjhejani ukwenza ngendlela engayala ngayo abaphristabo.

⁹ Khumbulani okwenziwa nguSomnini uZimenu kuMiriyamu endleleni lokha nanibuya eGibhide.

¹⁰ Nawuboleka omunye umuntu nanyana yini, ungayi ekumbenakhe ukuyokuthatha isibambiso sakhe.

¹¹ Jama ngaphandle bese umuntu ombolekileko alethe isibambiso kuwe.

¹² Nakube mumuntu odobha phasi, ungalali usaphethe isibambiso sakhe.

¹³ Nakutjhinga ilanga, uzambuyisela isibambiso sakhe ukuze akghone ukulala ngengubakhe leyo akuthokoze. Lokho kuzakuba kulunga kuwe phambi kwakaSomnini uZimakho.

¹⁴ Ungagandeleli isisebenzi esiqatjhiweko esidobha phasi nesiswelako, nanyana kungaba ngomunye wabafowenu nanyana osikhonzi esisenarhenenu ngemadorobhenenu.

¹⁵ Sikhokhele umrholwaso ilanga elinye nelinye ngaphambi kokutjhinga kwelanga ngombana sidududu, sithembele emrholweni lowo. Nakungasinjalo sizakulila ngawe phambi kwakaSomnini bese kuba sisono kuwe.

¹⁶ Aboyise bangabulawa ngebanga labantwana, nabantwana abangabulawa ngebanga laboyise. Omunye nomunye uzakufela isono sakhe.

¹⁷ Ningahlanakezeli ilungelo lesikhonzi namkha intandani. Godu ningathathi ingubo yomhlolokazi njengesibambiso.

¹⁸ Khumbulani kobana benimakhoboka eGibhide, uSomnini uZimenu wanihlenga. Ngalokho ngiyaniyala bona nikwenze lokho.

¹⁹ Nanivuna isivuno senu emasiminenu bese nikhohlwa isitjherefu emasiminapho, ningabuyeli niyosithatha; sizakuba ngesesikhonzi, intandani nomhlolokazi ukuze uSomnini uZimenu anibusise kiyo yoke imisebenzi yezandla zenu.

²⁰ Lokha nanitlhwara imithenu ye-oliva ningayitlhwarisisi; okusele lapho kuzakuba ngokwesikhonzi, intandani nomhlolokazi.

²¹ Lokha nanivuna amadiribe wesidiribe senu, ningawaburuji ngemva kwalokho; azakuba ngewesikhonzi, intandani nomhlolokazi.

²² Khumbulani bona benimakhoboka enarheni yeGibhide, ngalokho ngiyaniyala bona nikwenze lokho.