UDUTERONOMI 23 - IsiNdebele 2012 Translation

Abantu abangakavunyelwa ehlanganweni kaSomnini

¹ Opatlazwe amahlwayi namkha oquntwe ubudoda akazukungena ehlanganweni kaSomnini.

² Umntwana wephandle akazukungena ehlanganweni kaSomnini, ngitjho nesizukulwaneni sakhe setjhumi akakho ozakungena ehlanganweni kaSomnini.

³ Akunamu-Amoni namkha umuMowabi ozakungena ehlanganweni kaSomnini, ngitjho nesizukulwaneni setjhumi. Iye, akunamuntu womndenabo ozakungena ehlanganweni kaSomnini nini nanini,

⁴ ngombana azange banihlangabeze ngesikwa namanzi nanisendleleni lokha nanibuya eGibhide. Godu baqatjha uBhiliyamu umsa kaBhewori ngePetora eMesopotamiya kobana anithuke.

⁵ USomnini uZimenu azange alalele uBhiliyamu, kodwana waphendula isithukweso saba sibusiso kini ngombana uSomnini uZimenu uyanithanda.

⁶ Epilwenenu yoke ningasekeli ukuthula kwabo nepumelelwabo.

⁷ Ninganyenyi umEdomu ngombana ngumfowenu, ninganyenyi umGibhide ngombana nakhe naba ziinkhonzi enarheni yekhabo.

⁸ Abantwana besizukulwana sabo sesithathu bangangena ehlanganweni kaSomnini.

Ukuhlanzeka kwekampa epini yama-Israyeli

⁹ Naniyokulwa nezitha zenu bese nihlala ekampeni, zilondeni kikho koke okumbi.

¹⁰ Nakube kunomuntu phakathi kwenu ongakahlambuluki ngebanga lokuzitsanyazela ebusuku, akaphumele ngaphandle kwekampa, angatjhideli eduze kwayo.

¹¹ Kodwana kuzakuthi ntambama, adude bese nakutjhinga ilanga angene-ke ngekampeni.

¹² Yibani nendawana ngaphandle kwekampa lapha nizazithumela khona.

¹³ Niphathe ingembo eenkhalini zenu enizakwemba ngayo umgodi nanizithumako bese naniqedako nidibizese uthuvi benu lobo,

¹⁴ ngombana uSomnini uZimenu ukhamba phakathi kwenu ekampeni kobana anisindise abe anikele izitha zenu phambi kwenu. Ngalokho ikampenu kumele ihlanzeke ukuze uSomnini angakhambi abona ameswe wenu bese uyanifulathela.

Imihlobohlobo yemithetho

¹⁵ Lokha ikhoboka nalibalekele kini ningalibuyiseli kumninilo,

¹⁶ alihlale nani, libe phakathi kwenu, endaweni elizayikhetha hlangana namadorobhenu, lapha lithanda khona, ningaligandeleli.

¹⁷ Kungabi nesitjhatjha sendawo ecwengileko emadodakazini nemadodaneni wakwa-Israyeli.

¹⁸ Ningalethi ikokhelo yengwadla namkha umrholo wenja ngekumbeni kaSomnini uZimenu kobana kukhokhelwe nanyana ngisiphi isifungo ngombana kokubili lokho kusinyenyiso kuSomnini uZimenu.

¹⁹ Ungathi nawuboleka umfowenu imali, okugonywako namkha nanyana yini ebolekwako, umbize inzalo.

²⁰ Nakumqhamuka wona ungawubiza inzalo nawuwubolekako, kodwana umfowenu ungambizi inzalo nawumbolekako ukuze uSomnini uZimakho akubusise kikho koke okwenzako enarheni eningena kiyo bona niyithumbe.

²¹ Lokha nawenza isithembiso kuSomnini uZimakho, ungadosi iinyawo nakumele usiphethe ngombana ngambala uSomnini uZimakho uzasifuna kuwe begodu kuzakuba sisono nawungasiphethiko.

²² Kodwana nawungathembisiko, akuzukuba sisono kuwe.

²³ Okuthembise ngomlomakho, kulonde bewukwenze ngombana isithembisweso usenze kuSomnini uZimakho ngokuthanda kwakho.

²⁴ Lokha nawuya esidiribeni somunye umuntu, ungagoma usuthe amadiribe, kube ngendlela ofuna ngayo, kodwana ungaphathi umphako.

²⁵ Lokha nawungena esimini yekoroyi yomunye umuntu, ungakha iinqwambi ngesandla, kodwana ungayigwebi ngesegere.