UDUTERONOMI 22 - IsiNdebele 2012 Translation

¹ Ungathi nawubona ikomo namkha imvu kamfowenu ilahleka bese uyayilisa. Irage uyibuyisele kumfowenu.

² Nakube akasiseduze nawe, namkha nakube awumazi, iragele kwakho, ihlale kwakho kufikela lapha umfowenu afuna ukutholatholiswa yona bese uyamtholatholisa-ke.

³ Wenze soneso nangodumbanakhe, ngesambatho ngitjho nangananyana yini yomfowenu emlahlekeleko nawuyitholileko, ungagodli isizo lakho kuye.

⁴ Ungathi nawubona udumbana namkha ikomo kamfowenu iphareme endleleni uyilise. Msize kobana niyivuse ijame godu.

⁵ Umfazi angavunuli litho eliphathelene namadoda, nendoda ingembathi iimvunulo zabafazi ngombana nanyana ngubani owenza njalo usinyenyiso kuSomnini uZimenu.

⁶ Nakwenzeka uzithele phezu kwesihlakana senyoni, kinamkha ngimuphi umuthi namkha equlwanini, sinamadzinyani namkha sinamaqanda khibe unina wakhona uhlezi phezu kwawo, ungathatha amaqanda namkha amadzinyani kodwana ulise unina.

⁷ Tjhaphulula unina akhambe, kodwana abantwana ungazithathela bona ukuze kukukhambele kuhle nokobana uphile isikhathi eside.

⁸ Nawakha ikumba etja, yakha nesirhodlwana seengodo phezu kwephahla layo ukuze ungaziletheli umlandu weengazi nakwenzeka bona kube nomuntu othi asephahlenapho amadlheke phasi.

⁹ Ungatjali umhlobo omunye wembewu esidiribeni sakho. Nakungasinjalo zoke iinthelo zakhona zizakuba ngezendawo ecwengileko: isivuno ositjalileko kanye neenthelo zesidiribe.

¹⁰ Ungalimi ngokubophela ikomo nodumbana ndawonye.

¹¹ Ungembathi izambatho ezivangeneko, okuyiwulu nelineni ndawonye.

¹² Zenzeleni amatjharha emiphethweni yengubo enizembesa ngayo.

¹³ Kungenzeka umuntu athathe umfazi, amngene bese angasathokozi ngaye

¹⁴ amsolele ngamanga, amlethele ibizo elimbi ngokuthi: “Ngithethe umfazi lo, ngathi nangimtjhidelako, ngafunyana bonyana akasese litlawu.”

¹⁵ Nakwenzeka njalo yeke usomntazana nonomntazana bazakuthatha ubufakazi bobutlawu bakhe babuse kubaphathi bedorobho esangweni.

¹⁶ Usomntazana uzafese athi kubaphathi: “Nginikele umrhali lo indodakazami bona ibe mkayo, nje-ke nangu akasathokozi ngayo.

¹⁷ Usolele indodakazami ngamanga batjho uyifumene ingasese litlawu. Kodwana nginobufakazi napu obukhomba ubutlawu bendodakazami.” Bazakwendlala ingubo leyo phambi kwabaphathi bedorobho.

¹⁸ Abaphathi bedorobho bazakuthatha indoda leyo bayirithe

¹⁹ bese bayihlawulise isiliva elikhilogremu nesiqunjwana bayinikele usomntazana ngombana ilethe ibizo elimbi phezu kwetlawu lakwa-Israyeli. Umntazana loyo uzakuba mkayo begodu angeze isabe isamtlhala ipilwayo yoke.

²⁰ Kodwana nakube indaba leyo iliqiniso, kobana azange kufunyanwe ubufakazi bobutlawu emntazanenapho,

²¹ khona-ke bazakuletha umntazana loyo esangweni lomuzi kayise bese amadoda wedorobho amkhande ngamatje abe afe ngombana wenze ubuhlola kwa-Israyeli ngokufeba emzini kayise. Ngalokho nizakuthanyela ubumbi phakathi kwenu.

²² Nakube indoda ibanjwa ilele nomfazi wenye indoda, ababulawe bobabili njalo. Ngalokho nizakuthanyela ubumbi phakathi kwenu.

²³ Nakube kunetlawu eliboniweko bese lihlangane nendoda ngedorobheni, indoda leyo ilale nalo,

²⁴ baletheni bobabili njalo esangweni ledorobho, nibakhande ngamatje bebafe ngombana itlawelo azange lirhuwelele libawe isizo phezu kobana belingedorobheni. Indoda leyo yona irhubutjhe umfazi womunye umuntu. Ngalokho nizakuthanyela ubumbi phakathi kwenu.

²⁵ Kodwana nakube kusemmangweni, indoda ihlangane nomntazana oboniweko bese iyamgagadlhela, yindoda leyo kwaphela ezakubulawa.

²⁶ Nakulitlawelo lona ningalenzi litho. Itlawu alinamlandu wesibetho sokufa. Umlandu onje ufana nowalokha umuntu nasahlele bewabulala omunye umuntu

²⁷ ngombana uliragelele emmangweni; nanyana itlawu eliboniwekwelo lirhuwelele libawa isizo azange kube nomuntu olisizako.

²⁸ Nakube indoda ihlangana netlawu elingakabonwa, ilibambe ilale nalo bese kuyaziwa,

²⁹ indoda leyo izakunikela usomntazana loyo isiliva engaphezu kwesiquntu sekhilogremu bese umntazana loyo uba mkayo ngombana imrhubutjhile. Ingabe isamtlhala epilwenayo yoke.

³⁰ Indoda ingathathi umfazi kayise namkha yambule ubuze bomfazi kayise.