UDUTERONOMI 21 - IsiNdebele 2012 Translation

Itethelelo yokuthuluka kweengazi ezinganafakazi

¹ Nakube enarheni eniyiphiwa nguSomnini uZimenu kobana ibe lilifa lenu, kufunyanwa umuntu abulewe, adindilize emmangweni, kungaziwa bonyana ubulewe ngubani,

² abaphathi benu nabagwebi benu bazakuza bafese balinganise ibanga eliphakathi komuntu obuleweko namadorobho aseduze.

³ Abaphathi bedorobho eliseduze khulu nomuntu obuleweko bazakuthatha ithokazi elingazange khelibotjhelwe.

⁴ Abaphathi bedorobho bazakwehlela nethokazelo emlanjaneni lapha kungalimeki namkha kutjaleke khona. Bazafese balephule intamo emlanjanenapho.

⁵ Abaphristi abamadodana kaLevi bazakuza ngombana uSomnini uZimenu ubakhethile bona bamlotjhe bebabusise ebizweni lakhe. Ngibo ekumele babenelizwi lokha nakunokurarana namkha inturhu.

⁶ Boke abaphathi bedorobho eliseduze khulu nomuntu obuleweko bazakuhlambela izandla ngehla kwethokazi elephulwe intamo emrhobeni,

⁷ bafakaze bathi: “Izandla zethu azange zithulule iingazezi, ngitjho namehlwethu azange abone ukuthuluka kweengazokho.

⁸ USomnini akathethelele abantu bakhe u-Israyeli, abahlengako; angabeki umlandu weengazi ezimsulwa phakathi kwabantu bakhe u-Israyeli.” Nje-ke bazakuthethelelwa emlandwini weengazi lowo.

⁹ Ngalokho nizakutjhaphuluka emlandwini weengazi ezimsulwa. Ngaleyondlela nizakwenza okulungileko phambi kwakaSomnini.

Imithetho yobudlelwano bomndeni kanye neemiso ezithileko

¹⁰ Lokha u-Israyeli naya epini ayokulwa nezitha zakhe, uSomnini uZimakhe azinikele ezandleni zakhe, azithumbe

¹¹ bese kuthi phakathi kwabathunjwa ubone isimomondiya somfazi osithandako nofuna ukusithatha bona sibe mkakho,

¹² ungakhamba naso ekhenu. Lapho-ke umfazi loyo uzazirhuna ihloko aqunte namaziphakhe,

¹³ ahlubule izambatho zakhe zobukhoboka, ahlale endlinakho alilele uyise nonina inyanga yoke. Ngemva kwalokho ungamngena-ke, ube yindodakhe, yena abe mkakho.

¹⁴ Nakube ngemva kwesikhathi awusathokozi ngomfazi loyo, mtjhaphulule azikhambele aye lapha athanda ukuya khona. Awukavunyelwa ukumthengisa namkha wenane ngaye ngombana umrhubutjhile.

¹⁵ Nakube indoda inabafazi ababili, omunye ayintandokazi omunye asisaliwakazi bese bobabili bambelethele abantwana, izibulo libe ngelesaliwakazi,

¹⁶ mhlana yabela amadodanayo ilifa ingathathi indodana yentandokazi iyenze izibulo phezu kwendodana elizibulo yesaliwakazi.

¹⁷ Ayamukele izibulo eliyindodana yesaliwakazi ngokuyinikela isabelo esibuyelelwe kabili kesomunye kwakho koke enakho ngombana imamandlayo wokuthoma. Ilungelo lobuzibulo ngelayo.

¹⁸ Nakube indoda inendodana enekani netjhingako engalaleli ilizwi lakayise namkha lakanina, kuthi nanyana bayikhalima ingabalaleli,

¹⁹ khona-ke uyise nonina bazayibamba bayilethe kubaphathi bedorobho lekhabo abasesangweni lendawo leyo.

²⁰ Bazakuthi kubaphathi: “Indodanethu le kazi inekani begodu iyatjhinga, ayilaleli ilizwi lethu. Isirhiribideli nesidakwa.”

²¹ Nje-ke woke amadoda wedorobho azayikhanda ngamatje ibe ife. Ngalokho nizakuthanyela ubumbi phakathi kwenu. Woke u-Israyeli uzakuzwa bese uyesaba.

²² Nakube umuntu wenze ubulelesi besibetho sokufa bese ngambala uyabulawa, nimhlomele esigodweni,

²³ isidumbu sakhe singahlali ubusuku boke sisesigodwenapho. Kodwana mbulungeni khona mhlokho ngombana umuntu ohlonywe esigodweni uthuweleliswe nguZimu. Ningasilaphazi inarhenu eniyiphiwa nguSomnini uZimenu kobana ibe lilifa lenu.