UDUTERONOMI 20 - IsiNdebele 2012 Translation

Imithetho yepi

¹ Lokha naniya epini niyokulwa nezitha zenu bese nibona iinjomani neenkarana nebutho elikhulu kunelenu, ningesabi ngombana uSomnini uZimenu owanikhupha enarheni yeGibhide unani.

² Nasele nitjhidele epini, umphristi uzakuza ngaphambili akhulume nebutho

³ athi kilo: “Lalela Israyeli, namhlanje uze epini ukuzokulwa nezitha zakho. Ihliziywakho ayingadani, ungesabi ubaleke ngebanga levalo ngazo

⁴ ngombana uSomnini uZimakho nguye okhamba nawe bona akulwele ezitheni zakho, akunikele ukuhlula.”

⁵ Iinkhulu zizakukhuluma nebutho zithi: “Nakube omunye wenu wakhe ikumba etja kodwana wangayivula, akabuyele ekumbenakhe. Nakungasinjalo uzakufela epini bese ivulwa ngomunye umuntu.

⁶ Nakube omunye wenu utjele isidiribe kodwana wangagoma iinthelo zakhona, akabuyele ekhaya. Nakungasinjalo uzakufela epini bese omunye umuntu ugoma iinthelo zakhona.

⁷ Nakube omunye wenu sele aveze indaba kodwana wangasathatha intombakhe leyo, akabuyele ekhaya. Nakungasinjalo uzakufela epini bese enye indoda izithathela intombakhe leyo.”

⁸ Iinkhulu zizakuragela phambili nokukhuluma nebutho zithi: “Nakube omunye wenu unevalo entanyeni njengesirhwarhwa akabuyele ekhaya. Nakungasinjalo iinhliziyo zabafowabo zizakuphelelwa mamandla njengeyakhe.”

⁹ Nasele iinkhulu ziqedile ukukhuluma nebutho, kuzakubekwa iinduna ezizakurhola ibuthwelo.

¹⁰ Nanitjhidela eduze kwedorobho kobana nilwe nalo, thomani ngokubekelana nalo imibandela.

¹¹ Nakube ipendulwalo ingeyokuthula bese linivulela amasango, boke abangaphakathi kwalo bazanenzela umsebenzi okatelelako bese bayanisebenzela.

¹² Kodwana nakube idorobhelo alibi nokuthula nani bese lilwa nani, khona-ke nizalivimbezela,

¹³ kuzakuthi lokha uSomnini uZimenu nakalinikela ezandleni zenu, nibulale boke abaduna balo ngesabula.

¹⁴ Nizithathele abafazi nabantwana, ifuyo nakho koke okunye okungedorobheni, okutjho yoke ipango yalo. Nizibusise ngepango yezitha zenu leyo eniyiphiwe nguSomnini uZimenu.

¹⁵ Nenze soneso kiwo woke amadorobho akude nani okungasi madorobho wezizwe eziseduze.

¹⁶ Kodwana emadorobheni wabantu uSomnini aninikela wona njengelifa lenu, ningatjhiyi litho eliphefumulako.

¹⁷ Bhubhisani nya izizwe zamaRhithi nama-Amori, amaKanana namaPerizi, amaRhivi namaJebusi njengombana uSomnini uZimenu ayalile

¹⁸ ukuze zinganifundisi imikhuba yazo enyenyisako eziyenza nazilotjha abosingazimu bazo bese niyona phambi kwakaSomnini uZimenu.

¹⁹ Nanivimbezela idorobho isikhathi eside benilwe nalo ukuze nilithumbe, ningarhayili imithi yalo ngokuyikghedlha ngezembe, kodwana gomani iinthelo zayo, yeke ningayigawuli. Kanti imithi le sese ifana nabantu bonyana ningabeze niyivimbezele nayo na?

²⁰ Mimithi enaziko bona akusi ngegonywako kwaphela ekumele niyirhayile beniyigawule ukuze nivimbezele ngayo idorobho elilwa nani kufikela beliwe.