UDUTERONOMI 2 - IsiNdebele 2012 Translation

¹ safuduka saya erhalawumbeni ngendlela yelwandle lomGaba njengombana uSomnini gade angitjelile. Sathatha isikhathi eside silokhu sibhoduluka intaba iSeyiri.

² USomnini wathi kimi:

³ “Sekwanele bonyana nilokhu nibhoduluka ummango weentaba lo, jikelani ngetlhagwini.

⁴ Utjele abantu bonyana sele nizokudlula emkhawulweni wenarha yabafowenu okuziinzukulwana zaka-Esewu ezihlala eSeyiri. Zizonesaba, nje-ke yelelani kuhle:

⁵ Ningalwi nazo ngombana angeze nganinikela ngitjho nesiqetjhana senarhazo. Intaba iSeyiri ngayinikela u-Esewu kobana kube lilifa lakhe.

⁶ Nizakuthenga kibo ukugoma ngesiliva kobana nigome. Nithenge namanzi kibo ngesiliva kobana nisuse umrhawu.

⁷ USomnini uZimenu unibusisile kiyo yoke imisebenzi yezandla zenu. Uyakwazi ukukhamba kwenu phakathi kwerhalawumbakazeli. USomnini uZimu ube nani eminyakeni ematjhumi amane le, akhange niswele litho.”

⁸ Njalo-ke saragela phambili sagegeda inarha yabafowethu okuziinzukulwana zaka-Esewu ezihlala eSeyiri, kude nendlela ye-Elathi ne-Etsiyoni-Gebhere phakathi komrhoba we-Araba. Sajika sakhamba ngendlela yerhalawumbeni lakwaMowabi.

⁹ Ngesikhatheso uSomnini wathi kimi: “Ningethuseli amaMowabi namkha nilwe nawo ngepi ngombana angizuninikela inarhawo bona ibe lilifa lenu ngebanga lokobana nginikele iinzukulwana zakaLothi i-Ari bonyana ibe lilifa lazo.

^10-13 Nje-ke zilungiseleleni nikhuphukele emrhobeni iZeredi.” (Ngaphambilini ama-Emi gade ahlala kwaMowabi. Wona bekasisizwe esikhulu nesinengi kanti godu mindondotjhiya yabantu abeluleke inga ma-Anakhi. Njengama-Anakhi, ama-Emi nawo bekathathwa bonyana maRafa, kodwana amaMowabi awabiza bona ma-Emi. Ekuthomeni amaRhori nawo gade ahlala eSeyiri kodwana amadodana ka-Esewu awaqotjha, awabhubhisa abe azithathela indawawo njengombana no-Israyeli enza ngenarha yelifa lawo ayiphiwa nguSomnini.) Sayama-ke umrhoba iZeredi.

¹⁴ Isikhathi esasithatha ukuthoma mhla sisuka eKhadetjhi-Bharineya ukufikela lapha sayama khona umrhoba iZeredi sasiminyaka ematjhumi amathathu nabunane, bekwabhubha soke isizukulwana esasimadoda wepi ekampeni njengombana uSomnini bekafungile kiso.

¹⁵ Ngambala isandla sakaSomnini gade sijamelene naso kobana siphume hlangana nabantu ekampeni kufikela lapha siphela khona nya.

¹⁶ Kwathi bona woke amadoda wepi abhubhe nya hlangana nabantu,

¹⁷ USomnini wathi kimi:

¹⁸ “Namhlanje nina nizakudabula i-Ari okuyinarha yakwaMowabi.

¹⁹ Lokha nanifika emikhawulweni yama-Amoni, ningawethuseli namkha nilwe nawo ngepi. Angeze nganinikela inarhawo kobana ibe lilifa lenu ngombana sele ngiyinikele iinzukulwana zakaLothi kobana ibe lilifa lazo.”

²⁰ (Inarha leyo godu beyithathwa bonyana yinarha yamaRafa. AmaRafa ngiwo agade ahlala lapho ekuthomeni, kodwana ama-Amoni gade awabiza bona maZamzumi.

²¹ Gade kubabantu abakhulu begodu babanengi. Bekumindondotjhiya kwanga ma-Anakhi. Kodwana uSomnini wabarhayila nya phambi kwama-Amoni. Ama-Amoni awaqotjha amaZamzumi lawo abe ahlala enarhenawo.

²² USomnini wazenzela njalo neenzukulwana zaka-Esewu ezihlala eSeyiri lokha narhayila amaRhori phambi kwazo. Zawaqotjha zabe zathumba indawawo bekube kunamhlanje.

²³ Nakuma-Avi agade ahlala emizaneni yeGaza, arhayilwa maKafitori avela ngeKafitori abe ahlala eendaweni zawo.)

Ukuhlulwa kwakaSirhoni ikosi yama-Amori

²⁴ USomnini wathi: “Fudukani niyame umrhoba we-Arinoni. Qala, nginikele uSirhoni umAmori ikosi yeRhetjhibhoni ezandleni zenu kanye nenarhakhe. Thomani-ke nithumbe ilifa bese nilwa naye ngepi.

²⁵ Namhlanje ngizokuthoma ukufaka ivalo ebantwini abangaphasi kwawo woke umthunzi welanga kobana banesabe. Lokha nabezwa ngeendaba zakho bazakuthuthumela bavevezele phambi kwakho.”

²⁶ Nje-ke ngathumela iinthunywa zasuka erhalawumbeni leKhedemothi zaya kuSirhoni ikosi yeRhetjhibhoni ziphethe amazwi wokuthula athi:

²⁷ “Ngivumela ngidlule enarhenakho, ngizakhamba ngendlela kwaphela, angeze ngaphambukela ngesigomeni namkha ngesinceleni.

²⁸ Uzangithengisela ukugoma ngesiliva kobana ngigome, namanzi kobana ngisele. Ngivumela kwaphela bonyana ngidlule ngeenyawo,

²⁹ njengombana neenzukulwana zaka-Esewu ezihlala eSeyiri namaMowabi ahlala e-Ari enza kimi. Ngipha indlela bengeyame iJordani ngiye enarheni uSomnini uZimethu asinikela yona.”

³⁰ Kodwana uSirhoni ikosi yeRhetjhibhoni azange asivumele bonyana sidlule ngakuye ngombana uSomnini uZimenu waqinisa ummoyakhe, wakhunyalalisa nehliziywakhe kobana amnikele esandleni senu njengombana kwenzekile namhlanje.

³¹ USomnini wathi kimi: “Qala sele ngithome ukunikela uSirhoni nenarhakhe kuwe. Thoma-ke uzihlele kobana uthumbe inarhakhe.”

³² Nje-ke uSirhoni waphuma kobana asikhandele, yena nabo boke abantu bakhe kobana silwe eJahatsi.

³³ USomnini uZimethu wamnikela kithi, samumadlha yena namadodanakhe nabo boke abantu bakhe.

³⁴ Sathumba woke amadorobhakhe ngesikhatheso, sawarhayila nya. Kelinye nelinye idorobho sarhayila amadoda, abafazi nababuthakathaka. Azange sitjhiye namunye aphila,

³⁵ ngaphandle kwefuyo esazithathela yona njengepango kanye nepahla yamadorobho esawathumbako.

³⁶ Ukusuka emlanjaneni we-Arinoni okutjho idorobho le-Aroweri elingemrhobeni ukuyela ngeGiliyadi, azange kube nedorobho eliphakeme khulu kithi. USomnini uZimethu wawanikela woke njalo ezandleni zethu.

³⁷ Kusenarheni yama-Amoni kwaphela lapha ungazange utjhidele khona, okutjho kiyo yoke indawo eseempambosini zomlanjana iJabokhi kanye namadorobho weentatjaneni nakho koke lapha uSomnini uZimethu wasalela khona bona singene.