UDUTERONOMI 19 - IsiNdebele 2012 Translation

Amadorobho wobuphephelo

¹ Lokha uSomnini uZimakho narhayila izizwe aninikele inarhazo, niziqotjhe bese nihlala emadorobhenazo neenkumbeni zazo,

² nizakwahlukanisela amadorobhenu amathathu enarheni uSomnini uZimenu aninikela yona bona niyithumbe.

³ Nizakulinganisa iindlela bese nihlukanisa kathathu umkhawulo wenarha uSomnini uZimenu aninikela yona bona ibe lilifa lenu ukuze nanyana ngubani obulala angakahlosi abalekele lapho.

⁴ Umbulali angabalekela emadorobheni lawo asindise ipilwakhe kwaphela nakube ubulele omunye umuntu ngaphandle kwehloso begodu angakhange amzonde ngaphambilini.

⁵ Isibonelo salokho kukulokha mhlambe umuntu naya ngehlathini nomunye umuntu ukuyokutheza iinkuni bese athi nagawula isigodo, ihloko yezembe itsomuke emphinini imadlhe umuntu loyo abe ahlongakale. Nakunjalo, obuleleko loyo angabalekela emadorobheni lawo kobana asindise ipilwakhe.

⁶ Nakube idorobho lobuphephelo likude umbuyiseleli weengazi othukutheleko, lokha nagijimisa umbulali, uzambamba bese uyambulala, khibe akanamlandu wokubulawa ngombana umbulali bekangakamzondi ambuleleko loyo ngaphambilini.

⁷ Ngalokho ngiyaniyala bona nihlukanisele amadorobho amathathu.

^8-9 Yengezani amadorobho amathathu lawo ngamanye amathathu lokha uSomnini uZimenu nakhulisa umkhawulwenu njengombana afunga kiboyihlomkhulu. Iye, uzaninikela inarha yoke ayithembisa ukuyinikela aboyihlomkhulu, kwaphela nakube niyatjheja ukugcina yoke imiyalo enginiyala ngayo le namhlanje, kobana nikhathalele uSomnini uZimenu nokobana nikhambe eendleleni zakhe.

¹⁰ Ngaleyondlela iingazi ezinganamlandu angeze zathululwa enarheni uSomnini uZimenu aninikela yona kobana ibe lilifa lenu. Nakungasinjalo umlandu wokuthuluka kweengazi uzakuba phezu kwenu.

¹¹ Nakube kunomuntu ozonda omunye, amlalele endleleni bese uyameqela, amumadlhe phasi abe ahlongakale, nje-ke umbulali loyo abalekele kelinye lamadorobho lawo,

¹² abaphathi bedorobho lapho abuya khona bazakuthumela bona azokuthathwa asiwe esandleni sombuyiseleli weengazi, abulawe.

¹³ Ningamtlhuweli kodwana phelisani umlandu wokuthululwa kweengazi ezimsulwa kwa-Israyeli ukuze izinto zinikhambele kuhle.

Okuphathelene nabofakazi

¹⁴ Ningatjhidisi isikhonkhwani sakamakhelwana esabekwa ngabadala elifeni eliyinarha enayabelwa nguSomnini uZimenu kobana ibe ngeyenu.

¹⁵ Ningathathi ubufakazi bomuntu oyedwa emlandwini wokusolwa komuntu owenze ubulelesi namkha owone nganamkha ngimuphi umlandu. Akube nabofakazi ababili namkha abathathu ngaphambi kobana ningalalela umlandu lowo.

¹⁶ Nakube kuvela ufakazi onobuqili avukele omunye umuntu amfungele ngamanga,

¹⁷ bobabili njalo bazakuvela phambi kwakaSomnini, phambi kwabaphristi naphambi kwabagwebi abasesikhundleni ngesikhatheso.

¹⁸ Abagwebi bazabaphenyisisa bese nakube ufakazi loyo ngowamanga begodu ufungele umfowabo ngamanga,

¹⁹ yenzani kuye lokho ebegade akuhlose ngomfowabo. Ngaleyondlela nizabe nithanyela ubumbi phakathi kwenu.

²⁰ Inengi lizakuzwa, lesabe bese lingasalingi ukwenza ubumbi obunjalo phakathi kwenu.

²¹ Ilihlo lenu lingatlhuweli, akube yipilo ngepilo, ilihlo ngelihlo, izinyo ngezinyo, isandla ngesandla, inyawo ngenyawo.