UDUTERONOMI 18 - IsiNdebele 2012 Translation

¹ Abaphristi bamaLevi, okutjho yoke ikoro yamaLevi, ayizukuba nesabelo namkha ilifa kwa-Israyeli. Ilifa labo liminikelo ekhethekileko kuSomnini, ngilokho abamele bakugome.

² Abazukuba nelifa kubafowabo, kodwana ilifa labo nguSomnini njengombana athembisa.

³ Iminikelo ekhethekileko izakuba lilungelo labaphristi elibuya ebantwini abaletha imihlabelo, okungaba ziinkomo, izimvu namkha iimbuzi. Umphristi osebenza e-aldarini uzakunikelwa umkhono, imihlathi emibili nomrhoru.

⁴ Iinthelo zokuthoma zekoroyi yenu, zewayini lenu nezamafuthenu we-oliva kanye noboya bokuthoma bezimvu zenu nikunikele umphristi.

⁵ USomnini uZimakho ukhethe uLevi hlangana neenkoro zenu kobana abe yincekwakhe elotjha ebizweni lakhe, yena namadodanakhe nini nanini.

⁶ UmLevi obuya lapha aqube khona kinamkha ngiliphi lamadorobhenu kilo loke lakwa-Israyeli, angeza endaweni ekhethwe nguSomnini nanyana kunini nafunako.

⁷ Lapho-ke angalotjha ebizweni lakaSomnini uZimakhe njengawo woke amaLevi wekhabo alotjha phambi kwakaSomnini.

⁸ Uzakufumana isabelo sokugoma esilingana nesabafowabo, ngaphandle kwaleso asifumene ekuthengiseni kwakhe ipahlakhe.

⁹ Lokha nanifika enarheni eniyiphiwa nguSomnini uZimenu, ningafundi ukwenza imikhuba enyenyisako yezizwezo.

¹⁰ Phakathi kwenu kungafunyanwa umuntu otjhisa indodanakhe namkha indodakazakhe emlilweni njengomnikelo namkha umuntu osisangoma, osisanusi, omloyi, oyinyanga,

¹¹ ongusomlingo, othukulako, obhulako nophahla abezimu.

¹² Nanyana ngubani owenza lokhu, usinyenyiso kuSomnini begodu ngebanga lemikhuba enyenyisako leyo uSomnini uZimenu uqotjha izizwezo phambi kwenu.

¹³ Yibani msulwa phambi kwakaSomnini uZimenu.

¹⁴ Izizwe enizoziphangezi, zilalela izanusi nezangoma, kodwana nina uSomnini uZimenu azange anivumele kobana nenze njalo.

¹⁵ USomnini uZimenu uzanivusela umphorofidi onjengami phakathi kwenu, kubafowenu. Nguye okufanele nimlalele.

¹⁶ Kuzakuba njengombana nanifuna uSomnini uZimenu eRhorebe ngelanga lomhlangano lokha nanithi: “Asisakwazi ukulalela umdumo welizwi lakaSomnini uZimethu nokubona umlilokazi lo ngombana sizokufa!”

¹⁷ USomnini wathi kimi: “Koke abakutjhwileko kuwe kulungile.

¹⁸ Ngizabavusela umphorofidi onjengawe phakathi kwabafowabo, ngibeke amezwami emlonyenakhe, abatjele koke engimyale ngakho.

¹⁹ Nanyana ngubani ongeze alalela amezwami umphorofidi azabe awakhuluma ebizweni lami, mina ngokwami ngizakubona ukuqeda ngaye.

²⁰ Kodwana umphorofidi okhuluma ebizweni lami ngokuzitjhaya khibe angikamthumi, namkha okhuluma ebizweni labozinyana, akabulawe.”

²¹ Ningazibuza nithi: “Sizahlukanisa njani bona leli akusilo ilizwi elikhulunywe nguSomnini?”

²² Ipendulo kukobana nakube umphorofidi ukhuluma ebizweni lakaSomnini bese lokho akutjhoko akwenzeki namkha akubi liqiniso, kuzabe kungasilo ilizwi elikhulunywe nguSomnini. Umphorofidi loyo uzabe akhuluma ngokuzitjhaya, yeke ningamesabi onjalo.