UDUTERONOMI 16 - IsiNdebele 2012 Translation

Iminyanya kaSomnini

¹ Gcinani inyanga ka-Abibi, nenzele uSomnini uZimenu iPhasika ngombana ngenyanga ka-Abibi uSomnini uZimenu wanikhupha eGibhide ebusuku.

² Nizakuhlabela uSomnini uZimenu iPhasika eenkomeni, ezimvini neembuzini zenu endaweni ezakukhethwa nguSomnini kobana ajamise ibizo lakhe lapho.

³ Ningaligomi ngesikwa esinengumelo. Ligomeni amalanga alikhomba ngesikwa esinganangumelo, isikwa esinikhumbuza igandelelo ukuze kiwo woke amalanga wokuphila kwenu nikhumbule ilanga enaphuma ngalo eGibhide nirhabile.

⁴ Kungabi nehlama enengumelo phakathi kwenu kiyo yoke imikhawulwenu amalanga alikhomba. Inyama eniyihlabe ntambama elangeni lokuthoma, ingahlali bekuse.

⁵ Anikavunyelwa ukuhlaba iPhasika kinamkha ngiliphi lamadorobhenu eniwaphiwe nguSomnini uZimenu

⁶ ngaphandle kwendawo ezakukhethwa nguSomnini uZimenu, bona ajamise ibizo lakhe lapho. Nizakuhlaba iPhasika lapho ntambama nakutjhinga ilanga ngesikhathi enaphuma ngaso eGibhide.

⁷ Nipheke inyama yakhona niyigomele endaweni ezakukhethwa nguSomnini uZimenu bese ekuseni nibuyele lapha nihlala khona.

⁸ Nizakugoma isikwa esinganangumelo amalanga alikhomba bese elangeni lekhomba nenzele uSomnini uZimenu umgidi omkhulu. Nje-ke mhlokho ningawuthinti umsebenzi.

⁹ Nizakubala iimveke ezilikhomba ukusuka ngesikhathi nithoma ukugweba ibhali.

¹⁰ Nigidinge umnyanya weemVeke kuSomnini uZimenu ngokunikela ngomnikelo wesihle ukuya ngendlela uSomnini uZimenu anibusise ngayo.

¹¹ Nijekezele phambi kwakaSomnini uZimenu, nina namadodana namadodakazenu, amakhoboka namakhobokakazenu, amaLevi asemadorobhenenu, iinkhonzi, iintandani kanye nabahlolokazi abaphakathi kwenu, endaweni ezakukhethwa nguSomnini uZimenu bona ajamise ibizo lakhe lapho.

¹² Nizakhumbula bonyana nakhe naba makhoboka eGibhide, ngalokho nitjheje ukugcina iimiswezo.

¹³ Gidingani umnyanya wemiTlhatlhana amalanga alikhomba lokha nanibutha eselelweni nebutlhodlhelweni benu.

¹⁴ Yenamani ngomnyanyenu lowo, nina namadodana namadodakazenu, amakhoboka namakhobokakazenu, amaLevi, iinkhonzi, iintandani nabahlolokazi abaphakathi kwamadorobhenu.

¹⁵ Gidingani umnyanya kaSomnini uZimenu amalanga alikhomba endaweni ezakukhethwa nguSomnini ngombana uzanibusisa kiyo yoke imikhiqizwenu nakiyo yoke imisebenzi yezandla zenu ukuze nename noke.

¹⁶ Kuzakuthi kathathu ngomnyaka boke abaduna benu bavele phambi kwakaSomnini uZimenu endaweni azayikhetha: ngomnyanya wesiKwa esinganaNgumelo, emnyanyeni weemVeke nemnyanyeni wemiTlhatlhana. Ningaveli phambi kwakaSomnini nimkhonoze,

¹⁷ kodwana woke umuntu akanikele ngendlela akghona ngayo ukuya ngesibusiso sakaSomnini uZimenu ambusise ngaso.

Okuphathelene nabagwebi, amakhosi, abaphristi nabaphorofidi

¹⁸ Khethani abagwebi neenkhulu kiwo woke amadorobhenu uSomnini uZimenu anipha wona ukuya ngeenkoro zenu bese bagweba abantu ngeengwebo ezinokulunga.

¹⁹ Ningahlanakeli ubulungiswa, ningakhethi ubuso, ningamukeli ukufunjathiswa ngombana ukufunjathiswa kuphophaza amehlo wohlakaniphileko bese kwenza abaneqiniso babe bakhohlisi.

²⁰ Yenzani ubulungiswa kwaphela ukuze niphile benizuze inarha eniyiphiwa nguSomnini uZimenu.

²¹ Ningathi nanakha i-aldari lakaSomnini uZimenu bese nitjala umuthi ojamele u-Atjhera eqadi kwalo.

²² Ningazijamiseli amatje akhethekileko ngombana uSomnini uZimenu uyazizonda izintwezo.