UDUTERONOMI 15 - IsiNdebele 2012 Translation

Umnyaka wokusulwa kweenkolodo

¹ Njalo ekupheleni komnyaka wekhomba nisule iinkolodo.

² Nasi indlela enizakusula ngayo iinkolodo: Omunye nomunye okolodwako uzakusula lokho akukolodwa ngomunye umuntu. Angalandeleli umuntu loyo namkha umfowabo kobana amkhokhele ngombana ukusulwa kweenkolodo sele kumenyezelwe ebizweni lakaSomnini.

³ Umqhamuka wona kumele ukukhokhele, kodwana usule nanyana ngisiphi isikolodo umfowenu akukoloda sona.

⁴ Nanyana kunjalo akuzukuba nesichaka phakathi kwenu ngombana uSomnini uzonibusisa enarheni aniphe yona kobana ibe lilifa lenu,

⁵ kwaphela nakube nilalela ilizwi lakaSomnini uZimenu, niyelele ukwenza yoke imiyalo enginiyala ngayo namhlanje.

⁶ Ngambala uSomnini uZimenu uzanibusisa njengombana anithembisa. Izizwe ezinengi zizokugogela kini kodwana nina ningagogeli litho kizo, nilawule izizwe ezinengi kodwana zona zinganilawuli.

⁷ Nakube kunesichaka phakathi kwenu, esingomunye wabafowenu, kinamkha ngiliphi lamadorobhenu enarhenenu eniyiphiwe nguSomnini uZimenu, ningaqinisi iinhliziyo zenu nirhunyeze izandla zenu kumfowenu ochakileko,

⁸ kodwana mvuleleni izandla, nimboleke ngokwanele iindingo zakhe, nanyana kungaba yini.

⁹ Yelelani kungabi nobumenemene eenhliziywenu zenu bese nithi: “Afe-ke, umnyaka wekhomba wokusulwa kweenkolodo sele useduze!” Bese ninyokoloza umfowenu ochakileko ngelihlo elimbi, ningamnikeli litho. Uzakulila ngani kuSomnini, lokho kube sisono kini.

¹⁰ Mupheni nitjhaphulukile, ningamnikeli ngeenhliziyo ezigugunekako ngombana uSomnini uZimenu uzanibusisa kiwo woke umsebenzenu nakikho koke enitlama ukukwenza.

¹¹ Abadududu angeze baphela enarheni, ngalokho ngiyaniyala bona nivule izandla zenu ngokupheleleko namukele umfowenu, okutjho otlhagako kanye nodududu enarheni.

Ukutjhatjhululwa kwamakhoboka

¹² Nakube umfowenu, okuyindoda namkha umfazi omHebheru, azithengisa kuwe bona akukhonze, uzakusebenzela iminyaka esithandathu bese kuthi emnyakeni wekhomba umtjhaphulule kuwe.

¹³ Nawumtjhaphululako kuwe, ungamkhambisi amkhonoze;

¹⁴ kodwana mtshayele ngokutjhaphulukileko ezimvini neembuzini, umabele eselelweni nebutlhodlhelweni bakho ukuya ngendlela uSomnini uZimenu akubusise ngayo.

¹⁵ Khumbula bonyana benimakhoboka enarheni yeGibhide, nje-ke uSomnini uZimenu wanihlenga, ngalokho ngiyakuyala-ke ngamezwi la namhlanje.

¹⁶ Kodwana nakube umuntu loyo athi akazukusuka kuwe ngombana akuthanda wena nomndenakho begodu ahlezi kamnandi nawe,

¹⁷ yeke uzakuthatha isungulo umthumbuselele indlebe ngalo emnyango bese uba sisebenzi sakho sanini nanini. Nesisebenzini esimfazi uzakwenza soneso.

¹⁸ Kungabi nzima kuwe ukumtjhaphulula simahla bonyana akhambe ngombana ukusebenzele iminyaka esithandathu ngesiquntu senani lokuqatjhwa kwesisebenzi. Ngalokho uSomnini uZimakho uzakubusisa kikho koke okwenzako.

Amazibulo aduna weenlwana ngewakaSomnini

¹⁹ Hlukaniselani uSomnini uZimenu woke amazibulo aduna weenkomo, izimvu neembuzi zenu. Kungabi nomsebenzi eniwenza ngamazibulo aziinkunzana namkha nirhune amazibulo wezimvu neembuzi zenu.

²⁰ Agomeni qobe mnyaka nina nemindenenu phambi kwakaSomnini uZimenu endaweni ekhethwe nguSomnini.

²¹ Kodwana nakube amazibulo lawo anomphambo, kungaba kuhluza namkha ukuphophala namkha kungaba sizila sananyana yini, ningawanikeli kuSomnini uZimenu.

²² Agomeleni ngemadorobhenenu; abahlambulukileko nabangakahlambuluki ngokufanako abagome njengombana kwenziwa nakuyitsephe namkha ihlangumataka.

²³ Kwaphela ningagomi iingazi zakhona, kodwana zithululeleni equlwanini njengamanzi.